¹ Bena lau ese goadabada aneruna ta ma na itaia guba amo e diho e maiva. Ia be ori e hahedokilaia, kwarana daenai be kevaru ta. Ia vairana be dina na heto bona aena be lahi du-udia na heheto. ² Ia na buka maragina ta vada eabia, una be hekeho ia imanai. Ia aena idibana palapalana be davara latana ai eatoa bona aena laurina palapalana be tano latana ai eatoa. ³ Bena ia vada gadona badana ai e lolo isi e karamu leona ta e gigiva na heto. Ia e lolo neganai ai, guba-rahurahu hitu-osi sibodia gadodia amo e hereva lasi. ⁴ Guba rahu-rahu hitu-osi e hereva lasi neganai, lau nato baina toredia, a gado ta na kamonaia guba amo, e tomamu, "Guba rahu-rahu hitu-osi edia hereva na ba hunidia. Basio torea diho." ⁵ Bena lau ese na itaiava aneruna davara ai bona tano ai e gini imana idibana vada eabia isi guba e dudui henia. ⁶ Ia vada e gwauhamata noho-hanai Diravana, guba mai anina idoinai e karaia, tanobada mai anina idoinai, bona davara mai anina idoinai, e karadia ladanai, eto, "Nega halahena na lasi. ⁷ A aneru ihahituna erena dinadiai, ena kibi do baine hiriria neganai, Dirava ena hereva hehunina do bae momokani, ena hesiai peroveta taudia sivarai namo e hamorolaidia hegeregerena." ⁸ Bena gado guba amo na kamonaia ese vada e hereva henigu bona e hamaorogu, eto, "Aola, davara ai bona tano ai e ginimu aneruna imana amo buka hekehona na bavabia." ⁹ Bena aneru dekena vada nala bona na hamaoroa buka maragina na baine henigu. Ia eto, "Avabia bona avania. Bogamu na be haiditaiamu, a udumu ai be bada-ranuna digarana na heto." ¹⁰ Bena buka maragina aneru imana amo vada na abia bona na ania. Udugu ai digarana be bada-ranuna na heto. Vada na ania murina ai, lau bogagu vada e idita. ¹¹ Bena taunimanima ta ese e hamaorogu, e tomava, "Oi na taunimanima momo, bese momo, gado momo, bona pavapava momo daidiai ba peroveta lou." Translation done by: Elder Peter English, on Monday (25/09/23), time: 8.09 am, ready for quality checking.