¹ E hamaorodia eto, "na hamaoromui momokanimu, haida ini o ginimu taumui ese mase mamina basio dibamu ela bona Dirava ena basileia mai siahuna ida baine kau." ² Dina tauratoi vada ela, Iesu ese Petero bona Iakobo bona Ioane e abidia ororo badana ta ai e hakaudia dara, idia sibodia mo. Bena idia vairadiai ia toana e idau. ³ Ena dabua e hururuhururu, kurokakuroka, tanobada ai dabua ihurina tauna ta ese unu basinema hakurokuroa toma. ⁴ Bena Elia bona Mose ida vairadiai e hedinarai, bena Iesu ida e hereva-hereva. ⁵ Petero e haere bena Iesu e hamaoroa eto, "Hahediba e, ita ini seniai ta nohomu na namo herea, mani kalaga atoi ai a kara, auta oi emu, auta Mose ena, auta Elia ena." ⁶ (Badina be asi dibana ede baine hereva toma, badina idia na e gari dainai.) ⁷ Bena ori ta ese e govadia ahu. Bena ere/gado ta ori lalona amo ema eto, "Ina na natugu egu lalokau. Ba kamonai henia." ⁸ Idia na e roharoha, to tau ta asie itaia, Iesu mo sibona idia ida. ⁹ Ororo amo e hekeiva ai, ia ese e haganidia idia ese e ita gaudia ta basie e hamaoroalaia, ela bona Taunimanima Natuna na mase amo baine toreisi lou. ¹⁰ Idia sibodia ese ina hereva na lalodiai eatoa, a sibodia e henanadai heheni "ina mase toreisi lou anina be dahaka. ¹¹ Idia ese e nanadaia eto, "Dahaka dainai itorena taudia e gwaumu Elia na do bainema guna?" ¹² Ia na e haere eto, "Elia na vada ema guna, gau iboudiai ihamatamatadia. Dahaka ede e torea toma, Taunimanima natuna na hisihisi diagau baine ani bona bae dadaraia? ¹³ A na hamaoromuimu Elia na vada ema, bona edia ura karadia ia enai vada e kara vaitani, e tore guna herevadia hegeregeredia. ¹⁴ Ena hahediba ediai e kau ai, e itadia hutuma ese e ginidia hegege bena itorena taudia ida e hepapa-ahuahu. ¹⁵ Idia ese Iesu e itaia, bena aru taudia na e hoa bona dekena e heau lao, e hanamoa. ¹⁶ Iesu ese ena hahediba e nanadaidia eto, idia ida dahaka o herevalaiamu? ¹⁷ Bena hutuma bogaradia amo ta e haere eto, Hahediba tauna e, lau natugu na oi dekemu na mailaia. Mu laumana ese e boloamu. ¹⁸ E butua taomu bona e tahoa dobimu uduna e gwara-gwaramu, gadigadina (isena) e hahedaidiamu, bona tauna e tororo-tororomu (rigid). Emu hahediba na noidiamu ena amo bae lulua lasi, to idia na asi dibadia." ¹⁹ Bena Iesu ese e gwau henidia eto, "Asi emui abidadama uruna, Lau na dekemui ai baina noho ela bona edena nega ai? Baina haheauka henimui ela bona edena nega ai? Dekegu a mailaia." ²⁰ Idia ese mero na dekena e laohaia. Bena lauma ese Iesu e itaia, bena tauna e heude-heude (convulsion-shaken). Mero na tano ai e moru bona uduna e gwara-gwara. ²¹ Iesu ese tamana e nanadaia eto, "Ede daudau na ini eme heto? Tamana eto,"Maragina negana ai. ²² Nega momo lahi ai e tahoa kauva, ranu ai e tahoa dobiva, aine hamasea e tomava. Bema igaukaralaina mai dibamu, mani boma bogamai hisi bona boma durumai. ²³ Iesu ese e hamaoroa eto, "Bema igaukaralaina mai dibagu o tomu? Abidadama tauna na gau iboudiai ikaradia dibana." ²⁴ Bena mero tamana e tai lolo eto, "Lau na vada abidadama! A durugu egu abidadama maragi-maragi amo!" ²⁵ Iesu ese aru taudia e itadia, idia e heau henidia, bena ia ese una lauma dikana e gwau henia eto, "Mu bona taia kudima laumana, na haganimumu, iena amo a raka lasi, bona ia lalonai basio vareai lou. ²⁶ Bena e tai lolo, tauanina e heude-heude bena vada e lasi. A mero na mase tauna na heto, hutuma e tomava, "Ia na e mase." ²⁷ A Iesu ese ia imana eabia e veria tore, bena vada e gini. ²⁸ Rumai e raka vareai negana ai, ena hahediba ese e nanadaia hehuni eto, "Dahaka dainai ai ese asia lulua lasi?" ²⁹ Ia eto, "Ini hetomana na ilulu-ohona dalana ta lasi guriguri mo sibona. ³⁰ Unu amo raka lasi bena Galileia tanona amo e raka hanai. Se urava ta baine diba idia be ede kahai, ³¹ badina ena hahediba e hadibadiava. Eto, Taunimanima Natuna na taunimanima ediai taona bae torea, bae alaia mase, a dina toi murinai ia na baine tore isi lou." ³² a idia na lalodia asie parara, bona inanadaina danu e gari. ³³ Bena Kaperanaumai e kau. Ruma lalonai e vareai ia ese e nanadaidia, eto, "Umui dala ai be dahaka o herevalaiva?" ³⁴ A idia na asie haere, badina be dala ai sibodia vada e hepapa-ahuahu daika be hereadae. ³⁵ Bena ia na e helai diho, gwauta-ruaosi e boiridia bena e hereva henidia eto, "Baine guna e tomamu tauna, na gabe taunai bainela iboudiai isiaidia baine lao heni." ³⁶ Bena ia ese mero-mero maragina ta eabia bogaradia ai e haginia. E rosia imanai eto, ³⁷ Lau ladagu ai mero-mero inihetomana ta eabia daemu; tauna ese lau danu e abigu daemu, bona lau e abigu daemu tauna ese dia lau mo lau e siaigu Diravana danu e abia daemu." ³⁸ Ioane ese e hamaoroa eto, Hahediba taumu e, ai na tau ta aitaia oi ladamu ai lauma dikadia e luludia bena a gwaua tao badina be ia na dia ita bamodia. ³⁹ Iesu eto, Basioma gwaua tao, lau ladagu ai kara siahuna e karaiamu tauna na lau ihadikagu asi dibana. ⁴⁰ Se laoda ahumu tauna ese e kahadamu. ⁴¹ Na hamaoromui momokanimu, ta ese ranu kurita baine henimui, umui na Keriso ena dainai, ia na davana ai basine dabu. ⁴² A ini e abiabiraigumu memero-memerodia ta baine hahekwakwanaia tauna na huro badana ta aiona ai bema mataia,davara ai bema negea dobi, bema namo. ⁴³ Imamu ese baine hahekwakwanaimu, ba utua oho: namo mai imamu dokona mauri ai ba vareai, dika mai imamu rua Gehena lahi se bodomu gabuna, baola. ⁴⁴ Unuseni ai edia uloulo basine mase, bona lahi na basine bodo. ⁴⁵ Aemu ese baine hahekwakwanaimu, ba utua oho, namo mai aemu dokona mauri ai ba vareai, dika mai aemu rua Gehena ai bae tahomu dobi. ⁴⁶ Unuseni ai edia uloulo basine mase, bona lahi na basine bodo. ⁴⁷ Matamu ese baine hahekwakwanaimu, ba giboa lasi, namo Dirava ena basileia lalonai ba raka vareai mai matamu tamona, dika mai matamu rua Gehena ai bae tahomu dobi. ⁴⁸ Unuseni ai edia uloulo basine mase, bona lahi na basine bodo. ⁴⁹ Taunimanima iboudiai na lahi amo bae hagoevadia. ⁵⁰ Damena na gau namona, a damena basinema tadika-tadika, ede bae hatadikaia toma? Damena lalomui ai bavabia, bona ba noho hebou mai mainomui ida.