¹ Iesu na una gabu e rakatania bena ela Iudea tanona bona ela Ioridaena sinavaina kahana, bona taunimanima hutuma danu ia dekena ela. E henia gaukarana dainai ia ese idia na e hadibadibadiava. ² Bena Farasia taudia na dekena ema e nanadaia ia itohona dalanai bena eto, "Taravatu ai tau ta adavana baine hadihoa ina be maoro eiava? ³ Ia e haere eto, "Mose ena taravatu umu emui be dahaka, a? ⁴ Idia e haere eto, "Mose ese tau ta na e hamaoroamu revareva ta baine torea, hahine baine henia bena hahine na baine hadihoa." ⁵ Ina na umui kudou auka-auka taumui dainai ina taravatu e torea. ⁶ Iesu ese e hamaorodia. To tanobada e karaia matama neganai, Dirava ese tau bona hahine e karadia. ⁷ Una dainai tau ta na tamana bona sinana e rakatanidiamu bona adavana ida e tamonamu, ⁸ bona raruosi na tauani tamona ai e laomu. Bena idia na dia rarua, a tauani tamona. ⁹ Una dainai dahaka Dirava ese e haboua tamonai, tau ta ese na basine hapararaia. ¹⁰ Idia na ruma ai bena ena hahediba memerodia ese ma e nanadaia-lou. ¹¹ Ia ese e haere henidia eto, "Tau ta ese adavana eha dihoamu bona hahine ta ma e adavaiamu tauna na heuda-hanai tauna. ¹² Bema hahine ese tau eha dihoamu bena tau ta ma e adavaiamu hahinena na heuda-hanai hahinena! ¹³ Bena haida ese natudia e laohaidia ia dekena ia ese baine dau dia-toho, to ena hahediba memero ese e gwau henidia. ¹⁴ A Iesu ese una kara e itaia neganai ia lalona na se moale ena hahediba ediai bena e hamaorodia eto, ene maragidia na lau dekegu aema, bona asio koudia, badina ba Dirava ena basileia na ene hetomadia edia. ¹⁵ Momokani na hamaoromuimu, daika ese Dirava ena basileia na asine abia daemu ina maragina ta asio abia daemu hegeregerenai, danu na do basie vareai diba. ¹⁶ Bena ia ese hari maragidia na e abidia hebou, ima na latadiai e ato bena e hanamodia. ¹⁷ Ia ena laolao ma e matamaia neganai, tau ta na ia e heau henia vairanai e gorudiho bena e noia eto, "Hahediba Tauna namona e, lau be dahaka baina kara mauri hanaihanai do baina abia? ¹⁸ Iesu eto, "Dahaka dainai lau namogu e gwauraiamu, a? Ta na dia namo to Dirava sibona mo. ¹⁹ Oi na taravatu herevadia mai dibamu, "Basio ala-ala, basio heuda-hanai, basio henao, basio habade koikoi, basio kara koikoi, tamamu bona sinamu ba matauraidia." ²⁰ Una tau e hereva eto, "Hahediba tauna e, ini iboudiai na lau merogu neganai vada na badinadia. ²¹ Iesu ese e itaia bona e ura henia. Ia ese e hamaoroa eto, "Gau tamona oi emu ai o dabumu. Oi na emu kohu iboudiai ba hoihoilaidia bena ogogami taudia ba henidia bena kohu namona do bavabia guba ai. Bena baoma murigu ai ba raka." ²² A una hereva dainai, ia lalona na asine moale, bona e raka oho mai lalo-hisihisina ida badina ia na mai ena kohu momo tauna ²³ Iesu na e roharoha, bona ena hahediba memerodia e hamaorodia eto, Taga taudia ediai na mai hekwakwanaina Dirava ena basileia lalonai do ba vareai. ²⁴ Ena hahediba memerodia na e hoa unu ena hereva daidiai. A Iesu ese ma e hereva henia lou eto, "Natugu e, Dirava ena basileia ai ba raka vareai na auka! ²⁵ Ina na dia auka kamelo ta nila matana amo baine vareai, to taga tauna enai na auka Dirava ena basileia lalonai baine vareai. ²⁶ Idia na e hoa dikadika bona sibodia e hereva heheni eto, "bena daika be do baine mauri, a? ²⁷ Iesu ese e raraidia bena eto, "Taunimanima ediai ikarana na asi dibadia to dia Dirava enai, badina Dirava enai gau iboudiai ikaradia na mai dibana. ²⁸ Petero ese e hereva henia eto, "Aitaia ai na emai gau iboudiai vada a rakatanidia bona oi muimu ai ame raka." ²⁹ Momokani vaitani na hamaoromuimu, asi tauna ta lasi vaitani ia ese ena ruma, eiava tadina, eiava taihuna, eiava sinana, eiava tamana, eiava natuna, eiava ena tano vada e rakatanidia, lau daigu ai bona sivarai namo dainai, ³⁰ ia na nega sinahu-ta do basine davari hari ina tanobada ai; ruma bona tadina, bona taihuna, bona sinana bona natuna, bona ena tano, mai hisihisina ida, bona vaira tanobadanai, mauri hanaihanai basine abia. ³¹ A hutuma daidia be vaira na do bae gabe, bona gabe taudia na do bae guna. ³² Idia na dala amo e laova Ierusalema, bona Iesu na idia vairadiai e raka guna. Ena hahediba memerodia na e hoa bona haida ia murinai e raka taudia na e gari. Bena Iesu ese ena hahediba memero gwauta-ruaosi na e boiridia-oho bona e hamaorodia matama nega sisinai dahaka do baine vara ia enai. ³³ Eto "Aitaia, ita na ta daradaemu Ierusalema ai bona Taunimanima Natuna na be henia hanaimu Dubu helaga taudia bona Itorena taudia ediai. idia ese be henia hanaimu Idau bese taudia ediai. ³⁴ Idia ese be kirikirilaiamu, be kanudiamu, be kwadiamu, bona be hamaseamu. To dina toi murinai do baine toreisi." ³⁵ Iakobo bona Ioane, Zebedeo natudia ruaosi ia dekena ema bena eto, "Hahediba Tauna e, ai a uramu a noiamu gauna na boma kara henimai." ³⁶ Ia ese e hamaorodia eto, "Umui be o uramu dahaka emui ai baina karaia a? ³⁷ Idia eto, "Oi hairaimu o abiamu neganai, bavabimai oi ida baita helai hebou, ta idibamu kahanai bona ta laurimu kahanai." ³⁸ To Iesu ese e hamaorodia eto, "Umui na asi dibamui dahaka e noimu. Lau ese do baina inua keherena umui ese ba inua diba a, eiava lau baine bapatisolaigu bapatisona umui ese ba haheauka-laia diba a? ³⁹ Idia eto "oibe". Iesu ese eha maorodia eto, "Lau ese baina inua keherena na umui ese danu ba inua, bona lau eha-bapatisogu bapatisona na umu danu ba bapataisolaimui. ⁴⁰ To, daika be lau idibagu eiava lau laurigu ai baine helai na dia lau ese baina henia eha-hegaegaedia taudia edia. ⁴¹ Hahediba gwauta-osi ese e kamonaia neganai idia na e badu dikadika Iakobo bona Ioane ediai. ⁴² Iesu ese ena hahediba memerodia e boiridia hebou bena eto, "Umui na mai dibamui, e gwauradiamu Idau bese lohiadia edia lohia henudiai e nohomu bona edia tau badadia edia maoro na e gaukaralaidiamu idia latadiai. ⁴³ To dia una dala ai umui latamui ai. Umui padamui ai daika e uramu baine hereadae na hesiai tauna ai bainela, ⁴⁴ bona daika e uramu baine hegunalai na umui iboumui ai isiaimu baine laoheni. ⁴⁵ Badina be Taunimanima Natuna na dia isiaina ba laoheni to ia ese isiaimui baine laoheni bona ena mauri baine heni taunimanima momo ihamauridiai." ⁴⁶ Idia na Ieriko ai e gini dae. Mai ena hahediba memerodia bona hutuma danu murinai ia ida Ieriko e rakataniava lalonai, Timaeus natuna ladana Batelomiu, mata kepulu bona noi hegame tauna na dala isenai helai. ⁴⁷ Ia na e kamonai una na Iesu tau Nasareta, ia na e boi-lolo bona eto, "Iesu, Davida Natuna e, a bogagu hisi." ⁴⁸ Hutuma ese mata kepulu tauna na e gwau henia basine boi-lolo. To ia na dounu e boilou boilou e tomava, "Davida Natuna e, a bogaguhisi. " ⁴⁹ "Iesu na e gini bona e hamaoroa bainema ia dekena. Idia ese mata kepulu tauna na e boiria bona e hamaoroa eto, "A goada! A toreisi ia na oi e boirimumu." ⁵⁰ Ia na ena dabua e tahoa tabe e toreisi bona Iesu dekena ela. ⁵¹ Iesu ese e haere henia eto, "oi be dahaka o uramu emu ai baina kara a? Mata kepulu tauna e hereva eto, "Rabbi e, launa na uramu baina roharoha." ⁵² Bena Iesu ese e hamaoroa eto, "Aola, emu abidadama dainai ome namo guguru. Nega tamona, ia na e roharoha lou bona dala amo Iesu murinai e raka.