¹ Iesu na Betelehema Iudea ai e vara, pavapava tauna Heroda ese Iudea e lohiaia negana ai, aonega taudia be dina dae kahana amo Ierusalema ai e lasi, ² idia na e henanadai eto, "Iudea edia pavapava harihari eme vara be edeseni ai? Badina be ena hisiu mairiveina kahana ai a itaia, bona itomadiho henina ama." ³ Heroda pavapava tauna ese una hereva e kamonaia neganai, kudouna e hetaha, bona Ierusalema taudia iboudiai danu. ⁴ Bena Heroda ese hahelaga taudia iboudiai bona itorena taudia e haboudia bena e nanadaidia eto, Keriso be edeseni ai baine vara e tomamu? ⁵ Bena idia na e haere eto, Betelehema Iudea ai, badina be peroveta tauna ini e torea toma. ⁶ Oi danu Betelehema e, Iuda tanona ai, Iuda lohiadia bogaragidiai oi na dia gabe tauna, badina be hahekau tauna na oiemu amo bainema Ia ese egu bese Isaraela baine regua. ⁷ Bena Heroda ese aonega taudia e boiridia hehuni hisiu ena hedinarai negana e nanadailaia goevagoeva. ⁸ Bena e siaidia lao Betelehema, eto, "Aola mero maragina ba hatahua goadagoada. Ba davaria negana ai, bame hadibagu, bena lau danu baina vasi toma diho." ⁹ Idia na hanua pavapavana erena e kamonaia, bena vada ela, hari hisiu mairiveina kahana ai e itaia gauna ese e gunalaidia ela bona mero maragina ena noho gabuna daenai e mia. ¹⁰ Idia na hisiu e itaiava negana ai, e moale hisi dae. ¹¹ Bena ruma ai e raka vareai bona mero maragina e itaia sinana Maria ida bena e goru-goru diho e toma diho henia. Bena edia kohu e hulala herahia e henia, golo bona muramura mai bonana bona dahu dahu muramurana. ¹² Bena Dirava ese nihi ai e hamaorodia, eto, Heroda dekena basio lou lao, una dainai idau dala amo edia hanua e lou henia. ¹³ A idia e lou murinai, Lohiabada ena aneru nihi ai Iosepa ma e hedinarai henia eto, "A toreisi, mero maragina sinana ida avabidia, bena ba heau Aikupito baola. Unuseni ai ba noho ela bona ma baina hereva henimu lou, badina be Heroda ese mero maragina e tahuamu baine alaia mase e tomu. ¹⁴ Bena Iosepa e noga mero maragina sinana ida eabidia hanuaboi ai Aikupito ela. ¹⁵ Unuseni ai e noho ela bona Heroda e mase. Lohiabada ese peroveta tauna uduna amo e gwauraia herevana ihamomokanina eto, Aikupito amo natugu na boiria. ¹⁶ Una negana ai Heroda na e diba aonega taudia ese vada e koia, bena e badu dikadika bena e hesiai laganidia rua bona gabeai e vara memerodia iboudiai na Betelehema ai bona badina tanodia ai e aladia mase, aonega taudia e nanadailaidia negana hegeregerena. ¹⁷ Una neganai Ieremia peroveta tauna ena hereva vada e momokani eto. ¹⁸ Gado ta Rama ai e kamonai. Tai lolololo bona tai gadegade bada. Rahela be natuna taidia e taimu, tauhalo e dadaraia badina be idia na lasihidia. ¹⁹ Heroda e mase murinai, Lohiabada ena aneru ese nihi ai Iosepa ma e hahedinarai henia lou, Aikupito ai, ²⁰ eto, A toreisi mero maragina sinana ida avabidia Isaraela tanona baola, badina be mero maragina iala-masena e tahuava taudia na vada e mase. ²¹ Bena e tore isi, mero maragina bona sinana e abidia, Isaraela tanona ela. ²² To sivarai e kamonai Akelao ese Iudea e lohiaia, tamana Heroda gabunai bena unu lao garina e gariva. A nihi amo Dirava ese e hadibaia dainai e raka hanai, Galileia kahana ela, ²³ hanua ta ai, ladana Nazareta, e hanoho. Una dainai peroveta taudia edia hereva vada e momokani, eto, Ia na Nazareta tauna bae gwauraia. Translation by RDKH. Ori. C. Kohu dated 02/01/23 entered into IPAD on the same date and ready for quality checking.