¹ Una dainai, Iesu na ruma amo e raka lasi bona kone ai e helai diho. ² Aru taudia hutuma danu ia ida e hebou, bena ia na vanagi ta ai e gui bona e helai, hari aru taudia hutuma be kone ai gigini. ³ Bena Iesu ese sivarai hegeregeredia momo eha moro-laidia. Ia e hereva, eto, "A hakala, uhe ihadona tauna na ena uhe ihadodia ela. ⁴ Uhe na e gigidiava bena uhe haida na dalai isenai e moru, bona manu roho na ema bena e anidia ore. ⁵ Uhe haida be nadi ai e moru. Tano na severa-severa dainai nega tamonai e tubu (vara) badina tano na dia uduna dainai. ⁶ Bena dina e dae neganai, vada e marai badina asi ranudia dainai e kakoro. ⁷ Uhe haida be au-ginigini latadiai e moru. Au-ginigini e vara neganai eha-oredia. ⁸ Uhe haida be tano namonai e moru, huahuadia e dobi, haida be nega sinahu-ta, haida be tauratoi-ahui ta, bona haida be toi-ahui." ⁹ "Mai taiana tauna na baine hakala." ¹⁰ Ena hahediba memero na ema bona Iesu e hereva henia, eto, "Dahaka dainai aru taudia na sivarai hegeregeredia amo o hereva henidiamu?" ¹¹ Iesu e haere eto, "Guba basileia herevadia hehunidia vada eme henimui bona do ba lalo parara, to idia ediai na asie henidia." ¹² Badina be daika mai ena tauna na momo ma baine henia, bona enai na baine momo herea. A daika asi ena tauna na enabe mai ena, to ena amo do bae abia oho. ¹³ Una dainai, sivarai hegeregeredia amo na hereva henidiamu. Enabe idia na e roharohamu to asie e itamu, bona enabe idia na eha-kalamu to asie kamonaimu, eiava asie lalo-pararamu. ¹⁴ Idia ediai, Isaia peroveta tauna ena peroveta herevana vada eme momokani, etomu, "Umui na momokani do ba-hakala, to basio lalo-parara, umui na momokani do ba itaia, to basio lalo parara." ¹⁵ Badina be idia lalodia na valahu-valahu bona ediai iha-kalana na auka, bona matadia amo asie itamu, eiava taiadia amo asie lalo-pararamu, unu amo idia ese ba lou henigu bena lau ese do baine hanamodia! ¹⁶ A umui matamui na nanamo, badina o itamu dainai, bona taiamu na nanamo, badina o kamonaimu dainai. ¹⁷ Momokani vaitani na hamaoromuimu unu peroveta taudia momo bona kara maoromaoro taudia na e urava ini o itamu gaudia bema ita, bona asie itadia. Idia na e urava ini o kamonaimu herevadia bema kamonai to asie kamonaidia. ¹⁸ A hakala ina uhe ihadona tauna ena uhe e gigi rohoroho sivaraina hegeregerena. ¹⁹ Ta ese basileia sivaraina e kamonaiamu to asine lalo-pararamu neganai, hari tau dikana e maimu bona lalonai e hadoa uhena e abia ohomu. Una na dala isenai e hadoa uhena. ²⁰ Nadi tanona (tano aukana) latanai e moru uhena be tauta hereva na e kamonaiamu bena e abiadae haragamu mai moalena ida. ²¹ To ia lalona na asi ramuna dainai bena asine mia daudaumu. Dagedage bona hisihisi e kaumu badina una hereva dainai, ia na nega tamona e morumu. ²² Una au-ginigini padadiai e morumu uhena be, tauta una hereva e kamonaiamu to ena mauri ai gau idau-idau e lalo-hagui laimu bona taga igahusina dainai hari hereva ia enai na eha-oremu, bona huahuana se varamu. ²³ Hari tano namona ai e morumu uhena be, tauta ese hereva na e kamonaiamu bena e lalo-parara-laiamu ia na momokani huahuana e varamu haida nega sinahu-ta, haida tauratoi-ahui, bona haida toia-hui. ²⁴ Iesu ese sivarai hegeregerena ta ma e henidia. Ia eto, "Guba basileia na tauta uhe namona e hadoa ena imea ai na heto. ²⁵ A taunimanima na e mahuta lalonai, ia e inai heniamu tauna ema bena ava dikadia uhedia na uit padadiai e hado bona e raka oho. ²⁶ Uhe matadia na e tubu-isi bona e vara lalonai hari ava dikadia danu padadiai vada e varava. ²⁷ Imea biaguna tauna ena hesiai memero na ela bona biagudia e hereva henia, eto, baigumai e, oi emu imea ai uhe namona ta asio hadoa, a? "Bena edena dala ai ava dikadia e varamu?" ²⁸ Ia ese ena hesiai memerodia eha-maorodia eto, "Inaigu tauna ese vada eme karaia." Ena hesiai memerodia ese e nanadaia, eto, "Oi o uramu ai ese baia veridia oho, a?" ²⁹ Imea biaguna eto, "lasi. Badina be ava dikadia iveri-ohodiai, uit danu ba verdia-oho na garina." ³⁰ Do aine mia, ruaosi a vara hebou, ela bona uit iutuna negana. Uit iutuna horanai, lau ese uit iutuna taudia baina hamaorodia, "Ava dikadia ba veridia-isi guna, ba guidia hebou lahi ese do bae aradia, a uit na ba haboudia egu roge ai bame atodia." ³¹ Badina Iesu ese sivarai egeregerena ta ma e henidia, eto, "Guba basileia na sinapi nadinadi ta na heto, tau ta ese eabia bena ena imea ai e hadoa. ³² Ina sinapi nadinadina sibona maragi herea au nadinadidia iboudiai padadiai. A ia na e varamu ela bona au bada hereana ta ai e laomu, bena atai manudia na ia rigina ai e helaimu bena laganidia e animu. ³³ Iesu ese sivarai hegeregerena ta ma e hamaorodia, "Guba basileia na e hatubuamu gauna na heto, hahine ta ese e abiamu bona flaoa nau toi ida e kuia heboumu ela bona ibounai e tubumu." ³⁴ Ini gau iboudiai na Iesu ese aru taudia na sivarai hegeregerena e hamaorolaidia, bona hereva ta se gwauraia kava, a sivarai hegeregerenai ma e hamaorodia. ³⁵ Una na e heato maoro dalanai bona peroveta tauna ena hereva iha-momokanina e hereva neganai, eto, "Udugu na baina kehoa sivarai hegeregerena dalanai. Lau na hehuni gaudia do baina gwauraidia tanobada e hadaia matama negana amo." ³⁶ Bena Iesu ese aru taudia e rakatanidia bona ruma ela. Ena hahediba memero na dekena ela e hereva eto, mani ava dikadia imea lalonai sivaraina hegeregerena anina boma hadibalaimai." ³⁷ Iese e haere eto, "Uhe namona e hadoa tauna be Taunimanima Natuna. ³⁸ Imea be ina tanobada, bona uhe namona be ena basileia memero. Ava dikadia be tau dikana natudia, ³⁹ bona ena inai ese e hadoa tauna be diabolo. Uit igogona dinana be nega dokona bona uit igogona taudia be aneru." ⁴⁰ Una dainai, ava dikadia na e haboua heboumu bona lahi ese e aradiamu, nega dokonai danu unu do baine vara toma. ⁴¹ Taunimanima Natuna ese ena aneru do baine siaidia bona idia ese kara dika e havaramu gaudia bona kara dika taudia do baine abidia oho ena basileia amo. ⁴² Idia na lahi siahuna lalonai do bae tahodia vareai, unuseni ai do bae tai ganagana bona isedia gadigadidia bae hedai. ⁴³ A kara maoromaoro taudia na do bae diari dina na heto Tamana ena basileia lalonai. Mai taiana tauna do baine hakala. ⁴⁴ Guba basileia na kohu davana gauna ta na heto, tano lalonai e hunia. Tau ta ese e davaria moalena dainai, ela ena kohu iboudiai eha-hoihoi laidia, bona una moni amo una tano e hoia. ⁴⁵ Unu hetomana danu, guba basileia na kohu e hoihoi-laimu tauna ta na heto, ageva mai davana bada e tahumu. ⁴⁶ Ia ese hari ageva mai davana bada e davaria, bena ela, ena kohu iboudiai na eha-hoihoilai, bena monina amo una ageva e hoia. ⁴⁷ Ma, guba basileia na reke ta na heto, davara ai e torea, bena gwarume idau idau e gogo. ⁴⁸ Reke na gwarume ese eha-honua neganai, haoda taudia ese e veria bona kone kahana. Idia na e helai diho bena gwarume namodia na e habou dakwai ai e udadia, a asi anidia gaudia na e negedia. ⁴⁹ Nega dokonai danu unu do baine heto. aneru na be maimu bona kara dika taudia na kara maoromaoro taudia padadiamo do baine hapararadia. ⁵⁰ Idia na lahi garagarana lalonai do bae tahodia vareai, bae tai ganagana bona isedia gadigadidia bae hedai. ⁵¹ "Ini gau iboudiai lalomui vada eme parara a? Ena hahediba memero iboudiai e haere, eto, "Oibe." ⁵² Bena Iesu eto, "una dainai itorena taudia iboudiai daika be hahediba tauna ai eha-laoa guba basileia lalonai, ia na ruma ta biaguna na heto, gau matamatadia bona gau gunadia na ena kohu namodia amo e abidia lasimu. ⁵³ Bena Iesu na ini sivarai hegeregeredia e gwaurai ore neganai, una gabu e rakatania. ⁵⁴ Bena Iesu na ena hanu kaorikori ai e raka vareai bona taunimanima eha dibadiava edia synagogue lalonai. Unu amo e hedinarai idia na e hoa, bona eto, "Ina tau ena aonega bona hoa karadia be ede amo eabi a? ⁵⁵ Ia na dia ruma e karamu tauna natuna, a? Ia sinana ladana dia Maria, a? Ia tadina dia Iakobo, Iosepa, Simona bona Iuda, a?" ⁵⁶ Ia taihuna iboudiai na dia ita ida, a? Ini gau iboudiai be ede amo eabi, a?" ⁵⁷ Idia iboudiai na ia ese eha hekwakwanaidia. A Iesu ese eha-maorodia eto, "Peroveta tauna na mai imatauraina, to dia ena hanua ai bona ena bese lalodiai. ⁵⁸ Ia ese hoa karadia momo na asine kara unuseni ai badina asi edia kamonai dainai. Translation done and completed by: Ret/Dk. Lohia Gari on Friday (12/05/23), time: 3 pm.