¹ Una neganai, Iesu na Dina Helagana ai uit umana lalona amo e raka hanaiva. Ena hahediba memero dia na e hitolodia bena uit huahuadia e kinidia bona anidiava. ² A hari Farasia taudia ese e itadia bena Iesu e hereva henia, eto, "Aitaia emu hahediba memero ese e karaiamu karana dia maoro dina helaga ai." ³ A Iesu ese e hamaorodia, eto, "Umui ese asio duahia Davida be dahaka e kara e hitoloa neganai, ena memero ida, a?" ⁴ Ia na Dirava ena ruma ai e raka vareai parao eabia bena e aniani ena memero ida, una na dia maoro ia bona ena memero ida bae ania, a helaga taudia sibodia mo adia. ⁵ Eiava, umui ese dina helaga taravatuna ai asio duahia, dubu lalonai dina helaga na helaga taudia ese e hahelagaiamu to idia asi edia kerere, a? ⁶ A na hamaoromuimu, dubu helaga e hereiamu tauna na hari iniseni. ⁷ Bema umui ese ina hereva anina boma dibaia, "Lau na hebogahisi na ura heniamu bona dia ihaboulaina karadia" neganai, umui ese asi edia kerere taudia dikadia basioma gwaurai. ⁸ Badina be Taunimanima Natuna na dina helaga Lohiabadana." ⁹ Bena Iesu na una gabu e rakatania bona ela edia dubu lalona. ¹⁰ Unuseni ai, ima heveri tauna ta e davaria. Farasia taudia ese Iesu e nanadaia, eto, "Ina maoro dina helaganai gorere tauna ta ba hanamoa, a?", bona unu amo idia ese ia ihabadelaina ta ba karaia. ¹¹ Iesu na e haere eto, "Umui padamui amo, daika na, bema ena mamoe tamotamona na dina helaganai bema moru guri lalonai, ia na basinema dau-henia bena basinema veria-isi diba, a?" ¹² Edena be hereadae, benaini, tau ese mamoe na e hereaimau! Una dainai, ina na maoro kara namona ikarana dina helagana ai." ¹³ Bena Iesu ese ima heveri tauna e hamaoroa eto, "Imamu na atoia roro." Ia imana e toia roro, bena imana vada e namo guguru, hari imana namona kahana hegeregerena. ¹⁴ A Farasia taudia na e raka oho bon e hebouva ia bae alaia mase dalana e tahuava. ¹⁵ A Iesu na mai dibana dainai, ia na una gabu amo e raka-oho. Hutuma bada na ia murina ai e raka, bena ia ese mai edia gorere taudia iboudiai e hanamodia guguru. ¹⁶ Ia ese e haganidia, ia na idia ese basie hahedinaraia, ¹⁷ bena ina na do baine momokani, Isaia peroveta tauna ena amo e hereva, etomu, ¹⁸ "A itaia, lau egu hesiai merona, lau ese vada na abiahidi, egu lalokau tauna, lau lalogu ese e lalonamo heniamu. Lau Laumagu na latanai baina atoakau, bona ena hahemauri na Idau Bese taudia ediai baine gwauraia hedinarai." ¹⁹ "Ia na basine gugu, eiava basine tai lolo; eiava danu, ta ese gadona basie hakalaia, ariara ai." ²⁰ Ia ese e haberoa avana ta basine hakwaidua, lahi mai kwalahuna basine habodoa, ela bona hahemauri ai baine kwalimu, ²¹ bona ia ladanai Idau Bese taudia helaro do bae abia." ²² Bena mata kepulu bona mu, lauma dika ese e rohea tauna ta na Iesu dekena e laohaia. Ia ese hari tau na e hanamoa guguru. bena e hahedinaraidia una tau na e hereva bona e roharoha. ²³ Taunimanima iboudiai na e hoa bona eto, "Ina tau na dia Davidia natuna, a?' ²⁴ A Farasia taudia ese ina hereva e kamonaia neganai, idia na e hereva eto, "Ina tau ese lauma dika na se luludia ohomu, to Bealzebul lauma dikadia lohiana sibona ese mo." ²⁵ A Iesu ese lalodia vada e dibaia, bena e hamaorodia eto, "Basileia iboudiai sibodia e haheparara neganai e makohi rohorohomu, bona hanua-ta eiava ruma ta sibodia bae haheparara neganai basine gini auk." ²⁶ Bema Satani ese Satani baine lulua-oho neganai, ia na sibona e hahepararamu. Bena edena dala ai ena basileia na do baine gini? ²⁷ Bona bema lau ese Beelzebul ena lauma dikadia na luludia-ohomu neganai, umui natumui ese be daika ladanai do bae luludia-oho a?" ²⁸ A bema launa Dirava Laumana ena amo lauma dikadia na luludia-ohomu neganai, Dirava ena basileia na umui lalomui ai vada eme kau. ²⁹ Eiava, edena dala ai tau-ta na una goada herea tauna ta ena ruma ai baine vareai bena ena kohu baine henao, to ia na una goada tauna do asine guia guna neganai, a?" Bena unu amo ruma kohudia baine henao una ruma amo. ³⁰ Tau-ta dia lau ida na lau e laogu ahumu, bona lau ida asia gogomu tauna ese e gigidia rohorohomu. ³¹ Una dainai na hamaoromuimu kara dika bona ere dika taunimanima ediai iboudiai na do bae hegwa-tao to Lauma e ere dika heniamu tauna ena dika na do basine hegwau-tao diba. ³² Daika ese Taunimanima Natuna baine hereva dika henia tauna ena dika na do baine hegwau-tao, to daika ese Lauma Helaga baine hereva dika henia tauna ena dika na basine hegwau-tao ina nega ai eiava do bainema negana ai. ³³ Au ta na ba hanamoa bona ia huahuana danu do bae hanamoa, eiava au ta na ba hadikaia, bona huahuana danu bae hadikaia, badina be au na huahuana ese do baine hahedinaraia. ³⁴ Umui na gaigai natudia, doini mai dikamui ida taumui, benaini, gau namodia be ede ba herevalai toma, a? Badina be lalo ena honuhonu-dae amo udu na e herevamu. ³⁵ Tau namona ese lalonai e haboumu gaudia namodia amo gau namodia e havaramu. Bona dika tauna ese lalonai e haboumu gaudia dikadia amo gau dikadia e havaramu. ³⁶ Lau ese na hamaoromuimu, hereva dikadia ba hereva-lai taudia na hahemaoro dinana ai do bae hahemaoro henidia. ³⁷ Badina be emu hereva ese do baine hanamomu, bona emu hereva ese do baine hadikamu. ³⁸ Bena Itorena taudia haida bona Farasia taudia ese Iesu e haere henia, eto, "Hahediba tauna e, ai na auramu toa ta baia itaia oi emi amo." ³⁹ A Iesu ese e haere henidia, eto, "Uru dikana ma heudahanai na ida, ese toa ta o tahuamu. A lau ese toa ta basina hedinaraia, to toa tamotamona na Iona peroveta ena toa mo." ⁴⁰ Badina be Iona na dina toi bona hanuaboi toi Lakara dono-dono bogana ai e noho, "Unu hetomana Taunimanima Natuna danu dina toi bona hanuaboi toi tano lalonai do baine noho." ⁴¹ Nineva taudia bona ina uru taudia ida hahemaoro vairanai do bae gini hebou bona bae dunia-dae. Badina Iona ena haroro amo idia na e helalo-kerehai, bona aitaia Iona e hereia tauna na umui ida iniseni ai." ⁴² Diho kahana amo pavapava hahinena na ina uru taudia ida bae gini tore hahemaoro dinanai bena bae dunia-dae. Ia na tanobada kahana amo ema Solomona ena aonega herevadia iha-kalana totona, bona aitaia Solomona e hereiamu tauna an umui idia iniseni." ⁴³ Lauma dikana ta na tau ta ena amo e raka oho neganai, ia na asi ranuna tanona amo e hanai lagana baine ani gabuna e tahuava, to gabu ta se davaria. ⁴⁴ Bena e hereva eto, "Na rakatania rumana baina lou henia." Bena ruma e lou henia bona e davaia una ruma na asi tauna, bona e itaia ruma lalona na e daroa goeva-goeva, bona lalona kohuna iboudiai na e atodia namonamo. ⁴⁵ Bena ela bona lauma dika hereadia hahitu e hakaudia bona una ruma lalonai e vareai, unuseni ai bae noho. Bena una tau ena noho maurina na e dika herea dia e noho matava na hegeregerena. Unu hetomana hegeregerena ina uru dikana enai danu baine heto. ⁴⁶ Iesu na dounu aru taudia e hereva henidava lalonai, ia sinana bona tadina memerodia na e ginidae, ia e tahuava bona baine hereva henia dainai. ⁴⁷ Tau ta ese Iesu e hereva henia, eto, "Aitaia, oi sinamu bona tadimu na gigini oi e tahumumu bona ba hereva henimu." ⁴⁸ A Iesu e haere bona eto, "Lau sinagu be daika, bona lau tadigu be daidia? ⁴⁹ Bena imana e toiaroro ena hahediba memerodia ediai bona eto, "Aitaia, lau sinagu bona tadigu be unu idia."! ⁵⁰ "Badina be lau Tamagu guba ai e nohomu ena ura e karamu taudia, idia na lau tadigu, lau taihugu bona lau sinagu." Translation done by: Ret/Dk. Lohia Gari, completed on Monday (11/04/23), time: 11.30 pm, ready for quality check.