¹ Iesu iaḡa inuhati hadiba ḡahige netuare auki au ḡamituhe kiro gevenu, ² “Iaka dibana vani abu uhura Edoredore rigi vara, mati Koita Ḡamika vara iauka mi mohi gevege iauka satauro ḡahiḡa vara.” ³ Gerege aena ḡaha iau bauge tuhea mati oḡo ata baugea iabaraki iau bouge aena ḡahe iau biage iagehe bouraḡohi. Au ihera Kaiafa, ⁴ mati iauna orenaki norena Iesu mare iauna ḡami ga vanu. ⁵ Eduge iauki roege, “Noka beta rigi uhura kiki vara, koitaia negu iau vaḡa ḡarahime.” ⁶ Iesu ra Betania oti, Simona lepera koita e iagehe gera, ⁷ au tamuta viege uhura maḡi be raki muraka ḡutika maḡete damuna ketakete, au ḡasina otime auki au omotehe bohuḡanu. ⁸ Eduge au Ḡamituhea iabaraki eraḡare iauki ho ḡahi roege, “Esemena au virena kima? ⁹ Dehoro damu ketake oramu haevi moniva mare mi koita goroa mohigeige vara.” ¹⁰ Eduge Iesu ra dibana iauna otavado ana iau roia, gerege auki kirogei, “Esemena ia gure maḡi oi uhu korahi raḡoha? Au dai kine oramu ḡuma maḡe vara auki kinu. ¹¹ Iaka vani inuhati goroa o iabara ia ruḡa, edube iaka beta vani iau bouge daḡore gera. ¹² Au onaki dehoro o mi di ahatane dahu ḡane oramu di hoḡe ḡumava auki kima. ¹³ Riaḡa vara daki ia boriti ḡahi geima, oreigena ia vata ada oi iau badi o ro ioa raḡare, otavado maḡi o au kine era beta vagua ḡahiḡa vara.” ¹⁴ Gerege au ḡamituhea utube abu iau vaḡa be ihiva Iuda Isakariota raki aena ḡaha iau ḡasina otinu ¹⁵ eige auki beragei, “Iana otavado da moimoanu da Iesu mi ia mohi gevege?” Iauki moni utu abigaḡa mi au damune kinu. ¹⁶ Nega ei Iuda raki orenaki auna Iesu mi mohigei gevanu. ¹⁷ Vani ḡaneḡane iau parao Rigi kisa rome Iesu Ḡamituhea iabaraki au ḡasina otime iauki beraḡanu, “Nona orei Edoredore demakava kiki vanu?” ¹⁸ auki kirogei, “Otiahe oḡo uhura gera ata be ḡasina iama kirosa, ‘Hadiba koita e raki roma, ‘Di negave raki kahika ḡoima; daka di ḡamituhea ruḡa Edoredore me vara ai iagehe nona misa’ ” ¹⁹ Au ḡamituhea iabaraki au kiro gevene e kiare, gerege iauki edoredore demakava reḡui maemanu ²⁰ Vahiḡeta mane negahe, auki au ḡamituhea ruḡa gurahi; ²¹ gerege iau tamuta raḡege uhura, Iesu raki ronu, “Riaḡa vara daki roma, ia be ramu negu di taove toretoara.” ²² Au ḡamituhea iabaraki uhuhu raḡime iauki gure koba koba beraḡime iauki roege, “Rohi bauge, ona beta dakenu?” ²³ Iesu raki ronu, “Unuhuna daḡore naḡu kobabe au ade taḡoima eraki di taove torevisa. ²⁴ Koita Ḡamika vara hoḡe raḡira vara buka aena rone naḡate, eduge unuhuna ḡuma daure o kinu Koita Ḡamika taove torevanu! Au maḡevera auna so beta guruare.” ²⁵ Iuda taotore vane koitava raki beraḡi ronu, “Di Biage, ona beta dakenu?” Iesu raki ronu, “Auka amu e roma.” ²⁶ Iau tamuta raḡegare uhura, Iesu raki parao tinabe mi, maḡe ḡahare auki barai au ḡamituhe mohi gevare, mati ronu, “Mare mi iahe; ora di ahata makera.” ²⁷ Auki mati kebe be mi iagemi, maḡe ḡahare auki mohigei roma, “Iai bouge iahe; ²⁸ ora di taokera, Dirava ominue kine, koita dadaḡa iau dainehe auki bohu raḡanu iau daureve inuhati ketogeige vara. ²⁹ Iakera daki ia boriti ḡahi geima, daka beta ḡaitana vine eia o ivara atete da di Mame basileia isaḡeve uhura dana ia ruta isa.” ³⁰ Gerege iauki noḡo be rorota haki raḡohi otege Oliva nimu, ³¹ Gerege Iesu raki boriti ḡahigei roma, “Negu vahi oi iaka urihi dai ḡahe otitoara; Buka aena rone naḡate, ‘Dirava ra mamoe nitabata koitava ḡahi geige vara, gerege mamoe iabara siviḡoro raḡohi ḡeahu oti geige vara. ³² Eduge da urimi ḡoiraḡare itahare, daka uriḡoi Galileia otitoara.” ³³ Petero raki kironu, “Orenaki gena iau bouge ai ḡeahu ota, daka beta a ḡareḡa vara.” ³⁴ Iesu raki boriti ḡahanu, “Riaḡa vara daki aki roma, negu vahi oi, kokorogu vara so nina veite, aka nega abigaḡa da ḡore ḡore ḡahiḡa vara.” ³⁵ Petero raki kironu, “Daka beta enaki roroara, edume dana ma aḡore hoḡe raḡare tage, daka beta a ḡore ḡore ḡahiḡa vara.” Gerege au sokuhea ḡaitage eno kobuḡa e ronu. ³⁶ Gerege Iesu raki iau ruḡa gabube ihiva Getesemane otinu; mati auki au ḡamituhea boriti ḡahigei, “Oi gurahiahe dakamu hoivirei oti imimi vima.” ³⁷ Auki Petero mati Sebedio ḡamuhe aburuḡa nisigei, au uhure raki isuhanu mati au soruke taḡe huhu naḡanu. ³⁸ Gerege auki kiro gevenu, “Di soruke huhuara raho ketakera, tutube vanebe daka hoḡe raḡanu; oi gurahiahe daḡore no niḡa niḡa raḡoha.” ³⁹ Auki tinabe ḡaregei otare, aumi vata au kiravi ḡorumare imimivi roege, “Di Mame, au ḡumate ḡoinu, huhu o dai kokiva; beta di uravera edube ai uravera.” ⁴⁰ Gerege auki ḡoiraḡi au ḡamituhe abigaḡa iau ḡasina otege iauki iaḡiaḡea, gerege auki Petero kironu, “Orenaki gena ia daḡore guragu ḡamana veite? ⁴¹ Ena gure niḡa niḡaḡu raḡisa mati Dirava ai imimi raḡisa ia negu daure uhura siri raḡime; ai horu vera uraima, eduge ahata makava ra hero veitera.” ⁴² Auki ḡaitana nega abu ḡahiḡava ḡeahu oti imimi viege, “Di Mame, ḡuma bera mati veitera, eduge da iege, ai uravemu riaḡa ḡoisa.” ⁴³ Auki ḡaitana ḡoiraḡi tiege iauki iaḡohiave, iau nie baogeige veite. ⁴⁴ Auki ḡaitana ḡaregei oti imimi viege nega abigaḡa ḡahi gava, ga kobuḡa e ro gevege. ⁴⁵ Gerege auki ḡoiraḡi au ḡamituhe iau ḡasina oroḡi renu kiro gevege, “Iana so gure ona iaḡoha? Ni ḡahiahe, nega ramu tuakera, renu Koita Ḡamika au bive kine ḡahava iabara e mi koita daure mohigeisa. ⁴⁶ Urihiahe, nota. Iana eraḡa, di bive kine atava ramu oroḡanu.” ⁴⁷ Iesu gure gavege uhura, Iuda, au ḡamite utu abu uhura eraki roḡonu, koita dadaḡava raki au ruta oroḡi iau vaigadea mati iau garevea ruḡa, renu aena biavaia mati oḡo ata baugevaia. ⁴⁸ Au bive kine atava raki kiro gevenu, “Da ata be anoḡare era; iama misa.” ⁴⁹ Iuda raki Iesu ḡasina time auki ronu, “Au maive ma, di Biage!” roare auki anoḡanu. ⁵⁰ Iesu raki boriti ḡahi ronu, “Vasi, rogi a kisa roare iaḡaniva kisa.” Gerege iauki roḡahi Iesu adahe kamui berebe ḡahanu. ⁵¹ Tutube viege, iau be Iesu ruta geraki au kaiade mi iau haroro koitave besubesu ḡamive ihikokova dodoi turuhanu. ⁵² Iesu raki boriti ḡahi roma, “Ai kaiave mi ḡeahu maema; oḡore iana kaia idigevenu iauka kaia eige iauna hoḡe raḡohisa. ⁵³ Iana dibana veite ianu da negu di Mame ḡasina iahe iahe imimi vare, auka negu ḡarara aneru utube abu besugeige vara dani? ⁵⁴ Eduge au ena ḡoiare buka aena vana orenaki riaḡa ḡoigoanu, badivara ḡuma ora iaumu ronu auka varavisa?” ⁵⁵ Gerege Iesu raki koita dadaḡa e gaḡa gevenu, “Koko ia oroḡi kaia mati vaiga ruga da misa roia erehuta daka vaho koita be naḡate. Daka vani inuhati dubu uhura gurami hadiba vima eduge ia beta da manu. ⁵⁶ Eduge iaḡa inuhati geramu vara raḡanu, gerege peroveta ḡahaia buka aena roege eramu riaḡa ḡoisa.” Eige au ḡamituhe iabaraki ḡarehi siviḡoro raḡanu. ⁵⁷ Oḡoreana Iesu mane e iabaraki nisiḡami haroro bauge Kaiafas iagehe otinu, eigera aena kiare ḡahaia mati oḡo ata baugea iabaraki bou raḡohanu. ⁵⁸ Eduge Petero raki au itahe tabe tabeki oḡi otege, haroro bauge e iaga ḡaika time auki maḡu uhura sirivi; gabu ni tabata gahava ruḡa ḡurami auna otavado ihihi vanu. ⁵⁹ Haroro baugea mati kansolo inuhati geraki orenaki iauna ga tarata bei Iesu ada roege iauna au hoḡe ḡumaḡe kisa, ⁶⁰ eduge iauka iaḡa be erara veitera, be ḡaitage raki roḡahi tarata ga be au ada raḡohege. Ata abu geraki netu netua roḡahi ⁶¹ mati roege, “Ata oraki ronu, ‘Daka riaḡahe Dirava dubue seboḡare renu vani abigaḡa uhura dana ḡo ḡoiraḡisa.’ ” ⁶² Haroro bauge eraki urimi rami mati roege, “Ana ga veitenu? Oiau ai gare raḡohane?” ⁶³ Eduge Iesu raki keriḡoi. Gerege haroro bauge eraki kironu, “Maḡuri Dirava ihehe daki a ga ḡahima, no boriti ḡahigeve ana ni Maḡuri ḡahiḡave nu, Dirava Moe nu?” ⁶⁴ Iesu raki boriti ḡahi roma, “Auka amu e roma. Eduge iakera daki ia boriti ḡahigeima, Negu oi oti iaka Koita Ḡamika eraḡege auka hedo Dirava vamaḡa kasihege auna ḡuramisa mati vava seni auna oroḡisa.” ⁶⁵ Gerege haroro bauge eraki au oḡonave darivare auki ronu, “Auka Dirava daure ḡahiḡa ga vara auki rogevenu! Nona otavado ga be auseni ihisa? Iakamu au ga daure rone ihi gevenu. ⁶⁶ Iana otavadoana ia anava?” Iauki ronu, “Auka hoḡe raḡira vara.” ⁶⁷ Gerege iauki au nie sabaki ḡahi mati hodivege; mati be iabara au tihie madavege, ⁶⁸ roege, “Ana Keriso nu, no peroveta ḡahigeve, unuhuna a hodivanu?” ⁶⁹ Petero ra maḡu itahe auki guramanu. Besu besu maḡive be raki au ḡasina time auki ronu, “Ataḡe Iesu Galileia koita e ḡore gera.” ⁷⁰ Eduge auki iau bouge iau vaḡotoni ḡoreḡore vanu, roege, “Daka dibana veite otavado ana ia roia.” ⁷¹ Auki urimi itahe otege, besu besu maḡi be raki eraḡare, mati koita rahi gevene boriti ḡahi gevege, “Ata oramu Iesu Nasareta koita e gore hegera.” ⁷² Auki ḡaitana gore gore vi roege, “Daka ata vire dibane veitera.” ⁷³ Nega tinakibe uhura koita rahi gevene iabaraki Petero ḡasina oti ronu, “Era riaḡa vara aka iau bera, badivara ai ḡare raki a ḡaḡae kima.” ⁷⁴ Gerege Petero raki ḡavi roege, mati ominue vi roege, “Daka ata vire dibane veitera!” Ḡamana veite kokorogu vara nivinu. ⁷⁵ Gerege Petero raki anavanu otavado vanu Iesu boriti ḡahi ronu: “Kokorogu so nina veite aka nega abigaḡa da ḡore ḡore ḡahisa.” Auki itahe time auki nina raho viege.