¹ “Nega ei va basileia varamu onaki ḡoiḡoara. Mabi utube iana iau lamepave idigei geta maḡi mare atava ruta ada mimi otinu. ² Adakasiva gera uhu vaka veitea, mati adakasiva gera uhu vakatea. ³ Negu uhu vaka veite e iabaraki iau lamepave idigevenu, eduge iauka oela tina beta mimi veitera; ⁴ edube uhu vakate e iabara oela tinabe tage iauki idigei geta otinu. ⁵ Maḡi mimi atava tage au ororove raki isuhanu, eige iau nie raki iaḡohi iauki iaḡohanu. ⁶ Eduge vahi nemhege be raki bara ronu, ‘Maḡi mimi koitava ramu oroḡima! Oroḡi auruta ada miahe.’ ⁷ Gerege negu maeaḡo iabaraki urihi iau lamepave reḡu gevege. ⁸ Gerege uhu vaka veite e iabaraki uhu vakate e kirogevenu, ‘So noni oela tinabe kiahe, ni lamepave iabaramu ḡodo raḡoha.’ ⁹ Eduge uhu vakate e iabaraki boriti ḡahigei, ‘Veite riaḡa vara! noka beta ni bouge riaḡahe geregere raḡira vara; maḡe vanu oti oela haevare ḡahava iau haegeiahe.’ ¹⁰ Gerege uhuvaka veite mabiva iabaraki oela haeha otinu, iau itahege maḡi mimi atava raki roḡonu, negu mabi uhurate adakasiva ruḡa iabaraki auruta au rigi iaḡahe siri raḡanu; renu iauki udua kouanu. ¹¹ Sokova iabaraki ihie roḡahime, iauki ninatata roege, ‘Ata bauge, ata bauge, udua baoviahe no siri raḡoha.’ ¹² Eduge auki boriti ḡahigei roma, ‘Riaḡa vara daki iaki roma, daka iai dibane veitera.’ ¹³ Gerege Iesu raki netunetua roma, iama uhuiahuia raḡisa, badivara iaka vaniva mati negava dibana veite au Moe ororove. ¹⁴ Va Basileia varamu onaki kivera, “Erehuta atabe au ioave otisa roma, auki au besubesu ḡahatuhe ihirogeime auki kirogei iauka au kohue nitabata ḡahi geisa; ¹⁵ auki moni daha adakasiva be moimanu, mati tau utube akira adakasiva damua naḡate auki mi abu mohigevenu, be ni abu, be ni kobabe, iau herove ḡere ḡereve. Gerege auki bina au ioave otinu. ¹⁶ Be moni daha adakasiva moimane eraki au monive mime auki be iau me ḡahi, gerege auki mati daha adakasiva adahe manu. ¹⁷ Ḡuma kobuḡa eige, besubesu ata daha abu mane auie tage daha abu adahe manu. ¹⁸ Eduge besubesu ata daha kobabe mane eramu oti vata rohare auki au biage monive huni vanu. ¹⁹ Nega tinabe ḡamana ḡoine itaharahe iau biage raki ḡoiraḡi auki au besu besu ḡahtue au kohue nitabata ḡahi gevene berabeva vanu. ²⁰ Negu besubesu koita daha adakasiva mane eraki oroḡi, daha adakasiva adahe tage moroḡi, roege, ‘Ata Bauge, aka daha adakasiva aki da moimanu; eraḡa, daka daha adakasiva tage daki adahe kinu.’ ²¹ Au Biage raki kironu, ‘Aka me maḡe vara aki kinu, mati besubesu koita maḡe vara; amu ḡuma ieririvage aki iaḡa avie nitabata maḡe ḡahima, eige daka negu ami iaḡa bauge nitabata ḡahigeige biava a maema vara; oroḡo daḡore no heḡiri raḡoha.’ ²² Gerege besubesu koita moni daha abu moimane eraki oroḡi, roege, ‘Ata Bauge, aka moni daha abu ge aki da moimanu; eraḡa, daka daha abu tage daki adahe kinu.’ ²³ Au Biage raki kironu, Aka me maḡe vara aki kinu, mati besubesu koita maḡe vara; amu ḡuma eiririvage aki iaḡa avie nitabata maḡe ḡahima, eige daka negu ami iaḡa bauge nitabata ḡahigeige biava a maema vara, oroḡo daḡore no heḡiri raḡoha.’ ²⁴ Gerege besubesu koita moni daha kobabe mane tage raki oroḡi, roege, ‘Ata Bauge, daka dibana aka koita bere berera, a beḡi geige veite iaḡanivaia amu dodo geima, mati a iaḡa iaka be ieie veite e iabara amu bougeima; ²⁵ eige daki siḡoime daki ai monive mi vata uhura hunivanu. Eraḡa iaḡaniva one, ma ora aiera.’ ²⁶ Au biage raki boriti ḡahi ronu, ‘Aka besubesu koita daure mati hero veite! Aka dibana ani, da beḡibe veite iaḡanivaia amu dodo geima, mati amu da ieigege veite iaḡaniva amu bougeima? ²⁷ Menugena akamu di monive mi be iau me ḡahi, gerege da ḡoiraḡege iauka daie ada tinabe maemare mi da moimisa. ²⁸ Negubutu moni e au mare, mi oti unuhuna daha utube koitava moimiahe. ²⁹ Badivara iana unuhuna ia aute, iauka dadaḡa mohigei gevara, renu iauka vani inuhati dadaḡa mimi vara; eduge iana unuhuna iau ḡasina iaḡa veite, iau ḡasina uiare iauka kokikoara. ³⁰ A besubesu koita daure vara, iama mi itahe vadibua kiravisa, ei auma nivi au eḡie ramu gi raḡohisa.’ ³¹ “Eige Koita Ḡamika oroḡare ra hedo mati maḡe ruta auna au aneruve inuhati ruga, gerege auna au guragu gabu aenave guramisa. ³² Koita inuhati vata ada oi gera iau bouge oroḡi au ḡasina bouraḡira vara, gerege auna koita kasagei erehuta mamoe ni tabata ḡahare kiare naḡate, ³³ gerege auna koita ieririve idigei au vamaḡahe gosigeisa. ³⁴ Gerege negu rohi ena au vamaḡahe e boriti ḡahi geisa, ‘Oroḡiahe, di Mame ramu ia maḡe ḡahi gevenu, auki uriḡoi au vata ketake o kinei iani ro maemanu; ³⁵ badivara da ḡubu raḡanei amu daie kinu, da eia hoḡeviege amu eia da moimanu, daka koita ḡaita eduge amu ai iagehe dami otinu, ³⁶ daka bututabue amu oḡonava da ḡodomanu, da komata viege amu da reḡuanu, da vadibu iagava amu da deiva ḡahanu.’ ³⁷ Gerege ḡuma ieririve ḡahava iana rosa, ‘Rohi bauge, vaisu gena no a eraḡege na ḡubu raḡage no a vasiḡanu, se a eia hoḡe viegena no eia a moimanu? ³⁸ Se vaisu gena no a eraḡege koita ḡaita gena no ami iaga otinu, se bututabue gena no ogona ai kinu? ³⁹ Renu vaisu gena no a eragene a komata vanu se vadibu iagava uiege no a deiva ḡahanu?’ ⁴⁰ Gerege negu rohi eraki boriti ḡahigei roma, “Riaḡa vara daki roma, ia be iau naḡate ia di oḡo nane bei kiare, eramu daigera iaki kia.’ ⁴¹ Gerege auna au vagadehe e boriti ḡahi geisa, ‘Dai ḡahe otiahe, iai ḡahune rone iauka vene raḡira uhura ge auki ro maemanu diabolo mati au anerue ruḡa iauni; ⁴² da ḡubu raḡege iaka da vasiva veitera, da eia hoḡe viege iaka eia da moimo veitera, ⁴³ daka koita ḡaita eduge aka da mi ai iagehe otito veitera, daka bututabue iaka dani ogona kiki veitera, daka komata vi renu vadibu iagava uiege iaka da deiva ḡahiva veitera.” ⁴⁴ Gerege iauna boriti ḡahi rosa, ‘Rohi bauge, vaisu gena no a eraḡege aka ḡubu raḡanu se eia hoḡevanu se koita ḡaita se bututabue se komata se vadibu iagava, gerege no a iahea veite?’ ⁴⁵ Gerege auna kirogeisa, ‘Riaḡa vara daki roma, ia be iau naḡate da besibe ḡahi dami ia oḡo nane kiki veite, eramu beta daigera iaki kia.’ ⁴⁶ Gerege Dirava ramu besugei otitoara huhu behi behive gabuhe, eduge ḡuma ieriri ḡahava iabara maḡuri behi behive oḡohe otitoara.”