¹  Iesu raki iaḡa inuhati rogei kosavare auki Galileia ḡaremi Iudea oḡo kasihe otinuu Ioridana iaro hakirahe. ²  Koita mudaḡo iabaraki au itahe otege auki gure iau dikave maḡe ḡahi gevege. ³  Faresia ḡahava bea iabaraki au ḡasina oroḡime iauki tarata ḡumava berabe raḡanu, “Ona ni aenave na ata be ieriri moimege auna ḡuma be iau dainehe au mabare besibe ḡahiḡa vanu au itoege?” ⁴  Iesu raki ronu, “Iana dahida veitenu ḡanai ḡanai Dirava kiogevene eramu ata be mati maḡi be, ⁵  mati roma, Eigera ata ra au Mame mati au neine ḡare gevare au mabare ḡore bouraḡare, renu iauka iau abu ahata maka kobabe ḡahiḡa vara? ⁶  Eige iauka beta abu gera, eduge ahata maka kobabera. Eigera Dirava bouḡahi gevene, koita bera beta kasagei gevara.” ⁷  Faresia ḡaha iabaraki kironu, “Otavado beigena Mose ronu aenava ata be au mabare ḡaremisa roare auka au betia ḡahare pepava kiare moimare auna ḡaremisa?” ⁸  Iesu raki boriti ḡahigei roma, “Iaka soru berebeta iabara eige Mose raki enaki ronu, eduge sina sinava gera beta enaki ḡoiḡovera. ⁹  Iakera daki ia kirogeima, ata be au mabare ḡaremare, eduge auka ni muduka veite, eduge auka betia ḡahare mati maḡi be mare auka ni muduka ata vara.” ¹⁰  Au Gamituhea iaba raki kironu, “Enaki atabe au mabare ḡore kiare au maḡeve ra iauka beta bebe idigei gevara.” ¹¹  Eduge auki kiro gevenu, “Koita inuhati gera aena o beta riaḡa ḡahi vara, eduge Dirava mohi gevene ḡahavaḡu gera. ¹²  Badivara be iabara onakime iauki ḡuru raḡanu, mati be iabara koita iabaraki aena ḡahi gevenu, be iabara beta maḡi idigei gevara badivara iaukera iauki aena ḡahi gevenu va basileia dainehe. Unuhuna a riaḡa ḡahima koitava aukena riaḡa ḡahisa.” ¹³  Koita be iabaraki iau ḡamuhe idigei Iesu ḡasina otinu iau urave aukai au ade iau ada maemare iauni imimi visa. Eduge au ḡamituhea iabaraki iau ḡamuhe idigei oroḡane e nami gevenu; ¹⁴  eduga Iesu raki roma, “Momono ḡarire geiahe iau di ḡasina oroḡe, ia negu oia geima; onaki o iabara va basileia vara iauera.” ¹⁵  Auki au ade mi iau ada maemare maḡe ḡahigei itaharahe auka ḡaregei otinu. ¹⁶  Nega beige ata be raki Iesu ḡasina roḡime auki beraḡanu, “Hadiba koita, dana otavado iaḡa be kiare guragu behi behive mimi vanu?” ¹⁷  Gerege auki kironu, “Esemena a gure da beraḡima otavado vana maḡe? Koita Kobuḡa beḡu geraki maḡe. A guragu behi behive ḡahara viege, ama aenave badina ḡahisa.” ¹⁸  Ata eraki Iesu beraḡi roma, “Otavado aena vanu?” Iesu raki roma, “A negu ḡa kime; A negu ni muduka vime; A negu vahoime; A negu be iau ḡasina tarata ga rogeime; ¹⁹  Ama ai Mame mati ai neine matau ḡahigeisa; renu, Ama ai ḡaika ḡahatuhe iau ḡahara visa a avahu ai ḡahara vare naḡate.” ²⁰  Ḡami eraki kironu, “Dakamu e inuhati kiogevenu; mati otavado da so kiki veite?” ²¹  Iesu raki boriti ḡahi roma, “Ana urai akai maḡe riaḡa ḡoiege, ote, oti ai iaḡane inuhati haegei kosai, moni va idigei iaḡa veite ḡahava mohigeisa, eige ana vava ai damune misa; ame ḡoiraḡi di itahe oḡisa.” ²²  Ḡami isaḡe eraki au ḡare ihare, uhu huhuta ḡahe otinu, badivara auka ada bubu koitavara. ²³  Iesu raki au gamutuhea boriti ḡahigei roma, “Riaḡa vara daki iaki rogeima, ada bubu ḡahava iabara vava otitoara iau gera bere berera. ²⁴  Ḡaitana daki roma, kamela vara nila vakava riaḡahe siri sirivara eduge ada bubu atavara Dirava basileia ve uhura otitoara bere berera.” ²⁵ Au ḡamituhea au gare ihine negahe, iauki ḡaḡu raḡohime iauki berabe raḡohi onaki ronu, “Gerege unuhuna bina maḡuri vivi vanu?” ²⁶ Iesu raki niḡahi era gevare auki ronu, “Koita iabara beta riaḡahe kiogeige vara, eduge Dirava aige iaḡa inuhatige auka kiogeige vara.” ²⁷  Gerege Petero raki boriti ḡahi roma, “Eraḡa, nokamu iaḡa inuhati ḡare gevare noki ai itahe oḡia. Nona mati otavado be mimivanu?” ²⁸  Iesu raki boriti ḡahigei ronu, “Riaḡa vara daki ia boriti ḡahigeima, iaḡa inuhati isaḡe ḡahi gevare negahe, Koita Ḡamika au teronave adahe guramare, ia di itahe oḡiare ḡahavaia ḡainage terona utube abu iau ada gurahare, iana Isaraela iau tene utube abu e iana nitabata ḡahigeisa. ²⁹  Mati iana oḡoreana ia di dainehe iai matame se iai oḡo nanuhe se ai amakine se Mame se neine se iai ḡamuhea, ia ḡare gevenu , iaka nega tinahu be se maḡuri behi behive mimivara. ³⁰  Eduge oḡoreana uriḡaha iauka ihie ḡahiḡa vara, renu ihie ḡahava iabara uriḡahiḡa vara.”