¹  Iesu ḡamituhea iabaraki oroḡi beraḡanu, “Unuhuna bauge va basileia uhura?” ²  Gerege Iesu raki ḡami ḡamika be ihiromi auki orogi iau vaḡotoni ramanu, ³  auki boriti ḡahigei ronu, “Riaḡa iakera daki ia kirogeima, ia iai ḡumaḡe nune ḡahigei ḡami ḡamika o naḡate ḡahege, veite ḡahare iaka beta va basileia uhura otito vara. ⁴  Eige ana unuhuna avaḡu au mi ḡami ḡamika o naḡatenu aukamu va basileia uhura baugera. ⁵  Unuhuna ḡami ḡamika o maḡe ḡahima di ihehe auka da tagera auki da made gahima. ⁶  “Koita be momona onaki da riaḡa ḡahare iau ada daure ḡuma kiare, au maḡeve ramu muni ketake be mi au enokehe raro vare mi eve dobukehe kira visa. ⁷  Uhudau vana vata ketake ona otavado ana daure ḡahima! Ḡuma daure o iabara onaki ḡaḡae ḡahiḡa vara, eduge daure kiare koitava bu uhudau bena anu! ⁸  Ana ai ade be se ai vase be ai ihihive avie ḡahima, ama dodo vare mi ḡeahu kira visa; au maḡeve ramu ama maḡuri maḡe uhura guramisa daure ai ada abu se ai vase abu iau dainehe ami vene uhura a kiravime. ⁹  Mati ai nie ai ihihive daure ḡahege ama ḡiroi raka vare mi negevisa; au maḡevera ama ni kobabei maḡuri uhura sirivisa beta maḡe iau ai nie abu dainehe ami vene uhura a kiravime. ¹⁰  “Ia negu momonaike o betia ḡahi geima; iakera daki ia rogeima, iau aneruve ra nega inuhati ge auki di Mame vava uiare ḡasina ḡaḡae ḡaha. ¹¹  Badivara Koita Ḡamika oroganera koita dauraḡohane ḡahavaia maḡuri ḡahigeisa. ¹²  Orena kimena ia anava? Ata be au mamoe ve tinahu be, gerege be dauraḡare, auka sokovaia utu igaḡu veite hakira igaḡu veite nimu ḡaregei oti mamoe dauraḡane e iaḡoisa? ¹³  Au behuḡare negahe, iakera daki iaki rogeima, au heḡirive ramu negu mamoe kobuḡa ei raho ketake ḡoiḡoara a utu igaḡuveite hakira igaḡu veite e iau gera au heḡirive ra aviera. ¹⁴  Ḡuma kobuḡa eige di Mame vava uiare eraki gahara veite mamoe bera dauraḡisa. ¹⁵  Eduge ai oḡo nane be a daure ḡahege, ama oti ia abu gurahege ama au daure kine kirosa. Eige au ai gare ihege, iamu iai abu oḡo nana maḡe raḡi ḡoiraḡoha. ¹⁶  Eduge au ai gare ihihi veite ḡoiege, ama koita abu ḡaitage idigei aruta otisa, au gare rogevene iauma riaḡa ḡahi geisa. ¹⁷  Ai oḡo nane gahara veite iau gare ihisa, ama dubu biava kirogeisa; edube au dubu ḡaheva ḡaitage iau gare ihihi veite ḡoiege, iauka itahe ḡaheva iabaki. ¹⁸  Riaḡa vara daki aki roma, otavado ia vata ada oi kiege bodivanu vava tage auka bodibo vara, renu otavado a vahe ḡima oi vata ada vava tage auka vahe vahe vara. ¹⁹  Mati, riaḡa vara daki ia boriti ḡahi geima, iana oḡoreana iai vata ada oi iai abu ia imimi raḡoha, di Mame vava gera iani kiki vara. ²⁰  Eigera oreigena abu se abigaḡa ia di ihehe bouraḡoha, dakamu iai vaḡotoni. ²¹  Gerege Petero raki au ḡasina oroḡare ronu, “Rohi Bauge, erege ekalesia be se di oḡonane be dai daure ḡuma kiarena, dana nega esebu au daurehe uhudau ḡahisa? Nega iatiriḡava se?” ²²  Iesu raki kironu, “Daka beta onakime daki roma nega iatiriḡavaḡu, eduge, ama uhudau ḡahisa nega utu iatiriḡa hakira iatiriḡa vaḡu.” ²³  “Eigera Dirava au Basileiave kinera erehuta rohi be raki oroḡi au me ḡahatuhea au kohuve ni tabata ḡahi gevege ḡahave erageisa. ²⁴  Au gure berabe viege uhura iauki ata be mi roḡahanu auka moni domaga bera auki au manu; ²⁵  mati, auka beta riaḡahe ibinava kiki vara, gerege auki boriti ḡahi roma au, au mabare mati iau ḡamuhea mati iau kohuvea inuhati ḡaitage haegeisa. ²⁶  Gerege negu besubesu koita eraki au vaḡotoni komuko daivi guramare auki imiḡanu, Nega tinabe da moima, gerege dana iaḡa inuhati ibinava kisa. ²⁷  Rohi eraki uhudau ḡahare, renu besuḡi roma aukamu iaḡa inuhati vagua ḡahi gevenu. ²⁸  Gerege ata eraki itahe hakivi au besubesu bamode be behuḡanu subuta au moni tinahu be mane era auki enokahe gigivare, kiroma, A dai moni mane ibinava ama kisa. ²⁹  Au bamode raki komuko daivi guramare auki imiḡanu, So nega tinabe da moimege, gerege dana ai moni ibinava kiege ḡoiraḡisa. ³⁰  Eduge auki besibe vare auki mi vadibu iagava maiami atete au moni mane ibinava kisa. ³¹  Au sokuhea iabaraki otavado iau eraḡanu e uhu huhuava raḡare iauki oti badiva iau Rohive boriti ḡahanu. ³²  Gerege auki besubesu koita e ihiromi kironu, Aka besubesu koita daure vara! Daka a imimi viege daki a uhudau ḡahi akai beta a moni mane ibinava kiki ronu. ³³  Ana so ai bamode uhudau ḡahare da a uhudau ḡahane naḡate? ³⁴  Eduge auki hoḡoime auki negu besubesu koita emi iauka ḡamisa ate auka moni mane ibinava kiki kosaisa. ³⁵  Gerege di Mame vava tage koba koba onaki iai kisa, eduge iama iai soruke inuhati be iau daureve ḡaitage vagua ḡahi geisa.”