¹ Pura isaḡe vani ḡanai va tahi oroḡoge uhura, Maria Magedala raki midava otime auki niḡahege muni abata ketake mi midava aba bakuane era veitera. ² Gerege auki rurui ḡoiraḡi Simona Petero mati Iesu ḡahara viege ḡamiva iau ḡasina oti kiro gevenu, “Koita be iaberamu ni Rohite ahata make midavahu manu, noka dibana veite oreigena iau oti maemanu. ³ Gerege Petero mati au ḡamite be ruta iau abu midava erara otinu. ⁴ Iauki iau abu ruru raḡohi otege; eduge negu au ḡamite raki Petero soiḡi urugoi midava tinu. ⁵ Auki edemi niḡahege iau ḡodomane ogona eḡu eraḡanu, eduge auka sirisi veite. ⁶ Gerege Simona Petero au itahe oroḡege auki oti midava sirivanu. Auki iau ḡodomane ogonava eḡu eragevenu , ⁷ renu iau Iesu omote raro vane ogonava eraḡi, beta ḡodomane ogonava ruḡa eduge avaḡu ḡeahu ge iauki kobua ḡahi ḡosiḡanu. ⁸ Gerege negu au gamite urugoi otine raki au itahe sirivanu, auki eraḡare renu riaḡa ḡahanu; ⁹ eduge iauka buka aena gava riaḡa ḡahiḡa veitera, auka hoḡe uhura maḡurivi ḡoiraḡira vara. ¹⁰ Gerege ḡami iaberaki ḡoiraḡohi iau ḡuragu taruhe otinu. ¹¹ Eduge Maria raki midava itahe rami nivege. Auka nivare uhura ge auki edemi niḡahi midava uhura eraḡege; ¹² auki aneru abu era gevenu iauka ogona kae kiogei gura gurave Iesu ahata make maemane ei, bera au omote kasihe renu bera au vase kasihe. ¹³ Iauki maḡi e beraḡanu, “Esemena a nivima?” Auki kiro gevenu, “Iaukamu di Rohite mi ḡeahu otinu, mati daka dibana veite oreigena iau oti maemanu.” ¹⁴ Auka enaki ronu, auki aniḡoi niḡahi Iesu ramirame eraḡanu, eduge auka toaḡa kiki veite eramu Iesu. ¹⁵ Iesu raki kironu, “Esemena a nivima? Ana unuhuna a iaḡoima?” Maria ananave auka ḡeḡe me miare koitava ronu, “Di Biage, oreigena a au ahata make mi otinu, da boriti ḡaha oreigena a maemanu, gerege dama oti misa.” ¹⁶ Iesu raki au ihe ronu, “Maria!” Auki aniḡoiare renu Heberu gava kironu, “Raboni!” (makava ramu Uguro koita). ¹⁷ Iesu raki kironu, “A negu da kamuime, badiva daka so di Mame ḡasina ḡadiḡa veitera. Eduge di oḡo nanuhe iau gasina otare kirogeve, Daka so ḡadiḡa veitera di Mame renu iai Mame, di Diravate renu iai Diravate. ” ¹⁸ Maria Magedala raki oti Iesu ḡamituhe iau ḡasina otare renu kiro gevenu, “Dakamu ni Rohite eraganu”; gerege auki au gare rone au ḡamituhe kiro gevenu. ¹⁹ Pura isage vahi ei, vani ḡanaiva, ḡami iau bouge gurahane iau iaga uduane kougei, badiva Iudea aena ḡaha iau siḡore raḡohi. Iesu raki iau vaḡotoni horivare auki ronu, “Mai iai bouge misa.” ²⁰ Auka enaki rone itaharahe, auki au ade mati au bodi hakire au beroḡe ḡaḡirogei. Iauki heḡiri raḡohi badiva iauka Rohi Bauge iauki eraḡanu. ²¹ Iesu raki gaitana kiro gevenu, “Mai iai bouge misa. Di Mame raki da besuḡanu, eige daki mati ia besugeima.” ²² Auka enaki rone itaharahe, auki au ava nonomuve iau ada renu kiro gevenu, “Horu Aena misa. ²³ Ana be iau daureve vagua ḡaha, iau daureve ramu veite ḡoinu; ana be iau daureve vagua ḡahiga veitenu, iau daureve ramu daḡe daḡe iau ada. ²⁴ Eduge Toma (auka hekapa bera), auka iau ate utube hakira abu bera, auka Iesu oroḡane auka ei veitera. ²⁵ Gerege gami iaberaki kironu, “Nokamu Rohi Bauge eraganu.” Eduge auki kiro gevenu, “Dana au ada beroḡe eraḡanu, mati di ada kakune mi au bodi beroḡe kamui, daka beta riaḡa ḡahiḡa vara.” ²⁶ Pura bera kosavanu au ḡamituhe iaberaki ḡaitana bouraḡohi, renu Toma tage iau ruta. Iaga uduani iabara koukouve, edube Iesu raki oroḡi iau vaḡotoni ramare ronu, “Mai iai bouge misa.” ²⁷ Gerege auki Toma kironu, “Ai ada kakune mi oi maema renu di ade erageve. Ai ade mi bodinehe maema. A negu anana nune vime eduge riaḡa ḡaha.” ²⁸ Toma raki kironu, “Di Rohite mati di Diravate!” ²⁹ Iesu raki kironu, “Ana da riaḡa ḡahima badiva akamu da eraḡane dainehe? Maḡe ḡaha iabera oḡoreana erara veite eduge iaukamu riaḡa ḡahanu.” ³⁰ Iesu ramu iaḡa dadaḡava auki au gamituhe iau vaḡotoni kiogevenu, eduge iauka buka uhura oi maema veitera. ³¹ Eduge iau ga o maemane iabara iama riaḡa ḡahigeisa, Iesu ramu Keriso, Dirava Moe, renu ana riaḡa ḡahima akamu au ihehe maguri vara.