¹ Gerege Pilato raki Iesu mi au ḡamituhe mohi gevege iauki ḡamisa. ² Renu Pilato ḡarara gamituhe iaberaki idi hanaka garanate be kima iauki mi au omotehe maemi, mati ogona dubu kereka be mi au kinu. ³ Iauki daḡe daḡe au ḡasina otare, roege, “Iudea iau Rohite oti behi behive!” renu au nie madavege. ⁴ Pilato raki ḡaitana hakivi koita iau ḡasina otare auki beragei ronu, “Ihiahe, dakamu iai besuḡi hakivima renu iama dibana ḡahisa daka au daure be au erara veitera.” ⁵ Gerege Iesu raki hakivi itahe oroḡi, au omotehe gera idi hanaka garanate renu ogona dubu kerekare iauki mi au kinu. Pilato raki kiro gevenu, Koitava onu!” ⁶ Iauki negu dubu biavaia renu besu besu ḡahavaia eragei, iauki bara raḡi, roege, “Ḡamiahe! Ḡamiahe!” Pilato raki kiro gevenu, “Iavaḡu oroḡi miare iana ḡamisa; daka daure be au erara veitera.” ⁷ Iuda ḡaha iaberaki kironu, “Noka aena tera, renu aena era roma auka hoḡe raḡisa badiva auka roma auka Dirava Moe.” ⁸ Pilato raki iau gare ihine, auki siḡo riaḡa vanu iau enaki Iesu gare raḡohege. ⁹ Auki ḡaitana iaga uhura sirivare auki Iesu beraḡanu, “Ana oḡo ore koita vanu?” Eduge Iesu ra ga be roro veitera. ¹⁰ Eige Pilato raki kironu, “Ana da ga gahiga besibe vanu a vima? Ana dibana veitenu daka hedokate a besuḡi hakivisa, renu daka hedokate ai hoḡeve rosa?” ¹¹ Iesu raki kironu, “Aka di ada hedoka veitera eduge au vava seni hedo a moimege; eige unuhuna da mi a moimane koitava daureve ramu raho ketake.” ¹² Eige Pilato raki besuḡi hakivisa ronu, eduge Iudea ḡahava iabaraki bara ragohi ronu, “Ia negu ata o mi haki raḡohare, iaka beta Kaisara vasire ḡahiḡa vara. Koita be roiare auka rohi auka Kaisara auki besibe gahima. ¹³ Pilato ga o ihi gevene, auki Iesu mi itahe hakivare mi oti aena ḡahaia iau guragu patahe auki guramanu, iauki ihiva Heberu gava roia Gabata. ¹⁴ Iauka Rigi kiki vani ananava raḡohege; eramu erehuta vani iahu vara. Pilato raki Iudea ḡaha kiro gevenu, “Eraḡiahe, iai Rohite one!” ¹⁵ Iauki bara ragohi roege, “Mi ḡeahu otiahe! Mi oti hoekiahe!” Pilato raki bera gevenu, “Dana iai Rohite ḡami hoekisa?” Dubu aena biava iabaraki ronu, “Noka rohi veitera eduge Kaisara avaḡu gera.” ¹⁶ Gerege auki mi mohi gevenu iauka mi oti ḡami hoekisa. ¹⁷ renu avaḡu au sataurove agohare auki otinu nimu be ihiva roia Omo kouka, Heberu gava makava ra Golgota. ¹⁸ Eige iauki gami hoeki, renu ata abu ḡaitage au ruta bera hakirahe bera hakira Iesu ra iau nomuakahe. ¹⁹ Pilato raki ga be au variada maemi onaki ronu, “Iesu Nasareta Koitava, Iudea ḡaha iau Rohive.” ²⁰ Iudea ḡaha dadaḡa iaberaki gava dahare, badiva iau Iesu ḡamane era oḡo bauge ḡaika gera; renu ga abigaḡa iauge iauki maemanu Heberu gava, Roma gava renu Helene gava. ²¹ Gerege Iudea iau dubu biage iabaraki Pilato kironu, “Ia negu onaki rome, Iudea iau Rohive, eduge, Ata o raki ronu, Daka Iudea ḡahava iau Rohivera. ” ²² Pilato raki ronu, “Dana otavadoana da maemanu auma enaki ḡoisa.” ²³ i Roma iau ḡarara ḡamituhe Iesu ḡamane itaharahe, iauki au ogonave idi gevare iauki kasai ababu kinu iau tanahe kobakoba iauni. Renu iauki au ogonave tiguti veite, edube uhubaḡe kobabe tage manu. ²⁴ Gerege iauki bebe beragei roege, “No negu dodovime, eduge noma moni dadaḡa au ada maemi unuhuna negu mimi vanu.” Oramu buka aena rone gava riaḡa ḡahiḡa vara, ²⁵ Eramu iau ḡarara ḡamituhe kine ḡumava aukamu enu. E uhura geramu, Iesu sataurove ḡaika rahirahe ramu Maria au neine, au neine tate, Maria Klopas mabare, renu Maria Magedala. ²⁶ Iesu raki niḡahi au neine mati au ḡamituhe maḡeva era gevene au neine ḡaika rahirahe, auki au neine kironu, “Maḡi, ora ai moera.” ²⁷ Gerege auki au ḡamite kironu, “Ora ai neinera.” Gerege au ḡamite raki maḡi e mi au iage koitave kinu. ²⁸ Itaharahe, Iesu raki eraḡege au meve inuhati geramu kosavanu, auki ronu (ora au meve rone buka aenava riaḡa ḡahiga), “Dakamu eia hoḡe vima.” ²⁹ Eigera ḡadiki ḡanite hodu bera. Iauki ogona raburabe be mi idi raro vare mi gadiki hodu uhura degide ḡahare iauki mi au avaḡehe maemanu. ³⁰ Iesu raki gadiki e musuare, auki ronu, “Aukamu netuanu.” Gerege auki au omote mi uguhare renu au horuve raki ḡaremanu. ³¹ Iauka sabadi vani uhuiamare, eige Iudea ḡaha iabera vani aenava beta hoḡe satauro ada ḡaregei gevara, badiva Sabadi vara vani aena vara. Eige iauki Pilato imiḡanu iauka koita hoḡe raḡohane iau vase ḡahigei boko geisa renu iau ahata make koki geisa. ³² Gerege ḡarara ḡami iaberaki orogi ata abu Iesu ruta satauro ḡahi gevene iau vase ḡahigei boko gevenu. ³³ Eduge iau Iesu ḡasina otine iauki eraḡege auka subuta ge auki hoḡe raḡanu, eige iauka au vase boko geige veite. ³⁴ Eduge, ḡarara ḡami be raki Iesu nomuake vaigava dogavanu, gerege taḡo mati eia raki hakivege. ³⁵ (Iana unuhuna ia ga o ihinu ḡahava ḡaitage iama riaḡa ḡahisa. Auka dibana au ga rone era riaḡa vara.) ³⁶ Iaḡa onaki hori raḡare era buka aena gava riaḡa ḡahisa, “Au ite bera beta boko raḡira vara.” ³⁷ Mati ḡaitana buka aena gava bera onakime auki ronu, “Iauka iau vaiga bine era iauna eraḡisa.” ³⁸ Iaḡa o iau itaharahe, Iosefa auka Arimatea oḡo seni auki oroḡonu, au tage Iesu gamite bera, auki iorena ge auki me miege badiva Iudea ḡaha iabera auki siḡa gevege. Auki Pilato imiḡanu auka Iesu ahata make mi otisa. Pilato raki hedo moimege; auki orogi Iesu ahata make miare otinu. ³⁹ Nikodemo tage va hiriḡomege auki uriḡoi Iesu erarava otinu, auki ḡadiki ḡutika maḡete au isuke erehuta tinahu be naḡate ididita otinu. ⁴⁰ Iauki Iesu ahata make miare mi ḡadiki ḡuti maḡete ogonava ḡodomanu, ora Iudea ḡaha iau hoḡe abatemare ḡumava. ⁴¹ Iauki ḡeḡe bera iau satauro ḡahane au kahikahe, renu ḡeḡe uhura eigera aba vaka isaḡe bera iauka so hoḡe be maema veitera. ⁴² Mati eramu, Iudea ḡahava iau sjabadi vani iauki uhuiama, renu aba vaka isaḡe kahikahe eige iauki Iesu maemanu.