¹ Ata be ihivara Lasaro, auka Betani ge auki uiage eraki dika vanu. Betani gera Maria mati au tate Mareta uiare oḡo vara. ² Maria raki Rohi Bauge maḡe ḡahime auki dehoro ḡutika maḡe be mi au vase ada bohuḡanu mati au omo hanakehe dahuḡanu; auka Lasaro dika ata au amakine ra. ³ Eige au amakinuhe iabaraki iau gare besuḡanu Iesu ḡasina, “Rohi Bauge, ai vasire maḡeva ramu komata vanu.” ⁴ Eduge Iesu badi ihinei, auki ronu, “Komata ora beta hoḡe mi ororo vara; edube noma Dirava motea ḡahisa, renu Dirava Moe ramu au maḡeve ḡaḡae ḡahisa.” ⁵ Edube, Iesu matauve Mareta au ḡoḡe renu Lasaro iau ada, ⁶ au Lasaro komata vane ihinei, auki vani abu naḡate oḡo ei guramanu. ⁷ Gerege itaharahe auki au ḡamituhe kiro gevenu, “Noma ḡaitana Iudea ḡoiraḡohisa.” ⁸ Au ḡamituhea iabaraki kironu, “Ni Biage, Iudea ḡahava iabara vani rorebe muni tahu a ḡamisa roege, aka roma noka ei ḡoiraḡohi otisa?” ⁹ Iesu raki ronu, “Ana dibana veitenu vani be abagava ramu utube hakira abu gera? Oḡoreana vani oḡiare ḡahava iabara beta desuraḡi raḡira vara, badivara iauka vata ada o abagava eraḡa. ¹⁰ Eduge oḡoreana vahi ioa raḡoha ḡahavaia iabara desuraḡi raḡira vara, badivara abaga vara iau uhurehe ge veitera.” ¹¹ Enaki rone itaharahe, auki kirogevenu, “Ni vasire Lasaro ra iaḡime auki, eige daka ei oti ḡutiḡu vara.” ¹² Au Ḡamituhea iabaraki kironu, “Rohi Bauge, au iaḡiaḡe ḡoioge, auka maḡera.” ¹³ Iesu enaki roege eramu Lasaro hoḡeve auki gava viege, eduge iau uhu ananave auka iaḡiaḡe gava auka vima. ¹⁴ Gerege Iesu raki ni taḡotaḡo boriti ḡahi gevenu, “Lasaro ramu hoḡe raḡanu. ¹⁵ Dakamu heḡiri vima iai dainehe daka eigera veite, eige iama da riaḡa ḡahisa. Eige noka au ḡasina otito vara.” ¹⁶ Toma, iau ihiva Hekapa roege, auki au soukuhe kirogei, “No ḡaitage no au ruta ota, noma au ruta hoḡe kobuḡe raḡohisa.” ¹⁷ Iesu raki oḡo ei hakivi, auki ihinu Lasaro ramu vani ababu otinu iauki abatenu. ¹⁸ Betani ra Ierusalema ḡaika gera, ḡamana veitera, ¹⁹ renu Iudea koita dadaḡava iabara Mareta mati Maria iau ḡasina oti vaḡahu ḡahi gevege iau amakine dainehe. ²⁰ Mareta raki ihine Iesu ororove, auki hakivi oti eraḡi, au ḡoḡe Maria ra iagahu auki guramege. ²¹ Mareta raki Iesu kironu, “Rohi Bauge, a mena oi ḡoinu, di amakine ra beta hoḡe raḡanu. ²² Eduge dakamu dibana ḡoinu, ana otavado a Dirava au imiḡima, Dirava vara riaḡa ḡahe a moimo vara.” ²³ Iesu raki ronu, “Ai amakine ra ḡaitana maḡurivi ḡoiraḡira vara.” ²⁴ Mareta raki kironu, “Daka dibana auka ḡaitana urimi ḡoiraḡira vara vani netu netua.” ²⁵ Iesu raki kironu, “Dakamu hoḡe mati maḡuri. Oḡoreana da riaḡa ḡaha, iauna hoḡe raḡanu, iauka maḡuri raḡira vara, ²⁶ mati ana unuhuna maḡuri vima mati da riaḡa ḡahima auka beta hoḡe raḡira vara. Ana da riaḡa ḡahima?” ²⁷ Maḡi eraki ronu, “Erege, di Rohite, aka riaḡa Keriso, Dirava Moe, mati au rone auka vata ada oi besuḡi oroḡisa.”Iesu raki nivinu ²⁸ Au gavana itaharahe, auki ḡoiraḡi au ḡoḡe Maria ihiromi iorena kironu, “Ni Biage ramu ai totove vima.” ²⁹ Auki ihare, auki vaina urimare au ḡasina otinu. ³⁰ Iesu so oḡo kauka veite, eduge auka so Mareta behuḡi ga ḡahane gabuhe gera. ³¹ Negu Iudea ḡaha ahata moimi au ruta iagahu, iabeki eraḡege auki vaina urimi hakivanu. Iauki au itahe oti iau ananave auka midava oti ei nivisa. ³² Maria raki oroḡi au Iesu eraḡane, auki au vasi ḡaika komuko daivi kironu, “Rohi Bauge, a mena oi ḡoinu, di amakine ra beta hoḡe raḡanu.” ³³ Iesu raki au nivige eraḡege, mati Iudea ḡaha au ruta otine ḡaitage gure niḡo raḡege, auki eragei uhudau ḡahigei renu au soruke tage hosa raḡanu. ³⁴ Auki bera gevenu, “Oreigena ia maemanu?” Iauki kironu, “Rohi Bauge, oroḡi eraḡa.” ³⁵ Iesu raki gure nivige. ³⁶ Gerege Iudea ḡaha iaberaki roege, “Iana au nivare eraḡa!” ³⁷ Eduge be iaberaki roege, “Auna beta ata ni veite kiege au niḡa niḡa vima eige auna mati beta ata o maḡuri ḡahiḡa vanu.?” ³⁸ Gerege Iesu raki ḡaitana midava oroḡi uhu huhu ruta. Iau maemane ramu muni vaka beigera, renu muni abata be mi vaka bao vane koukouva kinu. ³⁹ Iesu raki ronu, “Muni o mi ḡeahu maemiahe.” Negu ata hoḡe raḡane amakine raki kironu, “Di Rohite, aukamu vani ababu ge noki abatemenu, ora aukamu seisete ḡoinu.” ⁴⁰ Iesu raki kironu, "Dana aki roro veitenu, a riaga gahege, aka Dirava haire erara vara?" ⁴¹ Gerege koita iaberaki muni mi ḡeahu maemanu. Iesu raki vava niḡahare ronu, “Mama, akera daki a maḡe ḡahima a di imimive ihine. ⁴² Daka dibanara aka vani inuhati ge aki di gare ihima, eduge da gavare ora koitaia rahane iau dainehe gera, eige iauma da riaḡa ḡahisa aki da besuḡanu.” ⁴³ Au enaki imimivi rone itaharahe, auki nivi barai ronu, “Lasaro, hakivi oroḡo!” ⁴⁴ Negu hoḡe koita e raki hakivi oroḡi, au ade renu au ada iabara ogona ḡasikava ge iauki raro gevenu, renu au nie ramu ogonava ge iauki ḡodomanu. Iesu raki kiro gevenu, “Ogona e vaheḡare, renu ḡarehiahe au ote.” ⁴⁵ Eige Iudea ḡaha dadaḡa, Maria ruta oroḡane ḡahava iaberaki Iesu kine meva eraganu, iauki riaḡa ḡahanu. ⁴⁶ Eduge be iabera Farisea ḡaha iau ḡasina otime iauki Iesu kine iau eraḡane iauki boriti ḡahi gevege. ⁴⁷ Eige dubu biavaia renu Farisea ḡahava iaberaki bouraḡohi ga raḡi, ronu, “Nona otavado kiki vanu? Ata ora iaḡa nune nune dadaḡa vara auki o kima. ⁴⁸ No negu ḡarehi au ḡuma o kiare, koita iabera au riaḡa ḡahiḡa vara, eige Roma ḡahava iabera oroḡi ni aena taruha renu ni oḡe renu ni koitatuhe daure ḡahigeige vara.” ⁴⁹ Eduge iau bera, Kaiafas, auka nega eige dubu bauge bera, auki kiro gevenu, “Iaka iaḡa be dibana veitera! ⁵⁰ Iaka anana veite koita kobabe ni dainehe hoḡe raḡare ena maḡenu se iauna roḡi mata ketake o daure ḡahisa.” ⁵¹ Auka avahu au uhu ananave roro veitera, eduge au dubu me kiege eige auki peroveta ḡahi roege Iesu ra hoḡe ragira vara mata koitava iau dainehe, ⁵² renu beta mata oḡu dainehe, eduge Dirava koitatuhe koba koba ḡahane bougeige vara. ⁵³ Vani eige iauki au ḡamiḡa ḡumava iaḡovege. ⁵⁴ Eige Iesu raki Iudea ḡaha iau uhura oḡi ioa veite, eduge auki ei urimi oti ogo be ihiva Efraim mata ḡaḡaeva; eige auki unu au Ḡamituhe ruta. ⁵⁵ Iudea ḡahe iau tene heḡiriva be kahika ḡahege, koita dadaḡa iabaraki oḡi Ierusalema otege, hegiri ei iau maḡurive maḡe ḡahigeisa. ⁵⁶ Iauki dubu uhura Iesu iaḡoi bebe bera gevege, “Iai ananave na otavado vanu? Auna hegiri oi ororo vanu, se veitenu?” ⁵⁷ Iudea iau dubu biavaia renu Farisea ḡahavaia raki ga besuḡi hakiraḡi ronu, unuhuna Iesu eraḡima iauma vasiba ḡahigeisa, eige iauna oti mi misa.