¹ Riaḡa riaḡa, daki roma, ana unuhuna a mamoe iaga uduani sirisi veite eduge haba hosaḡi ḡadimare era vaho koita vara. ² Koita uduani seni sirivare koitava ramu mamoe iau biagera. ³ Negu udua nitabata ḡahare koitava ramu au uduane baovi, renu mamoe ramu au enoḡe ihihi vara. Auna au mamoeve iau ihe rogei ihirogei auna nisigei hakivisa. ⁴ Au avaḡu au mamoeve inuhati nisigei haki vare, aumu urigoi oḡi, renu au mamoeve iabara au itahe oḡi ota badivara iauka au enoḡe dibanara. ⁵ Iauka beta koita nune be itahe otito vara, eduge iauka siviḡoro raḡira vara badivara iauka au enoḡe dibana veitera. ⁶ Iesu raki badigomu o gava viege iau ruḡa, eduge iau uhure ra bao raḡira veitera auna otavado au iau ḡasina roege. ⁷ Gerege Iesu raki ḡaitana kirogei, “Riaḡa vara, daki roma, daka mamoe iau uduanera. ⁸ Oḡoreana uriḡahi oroḡane iabara vaho ḡaheva iabara; eige mamoe iabara iau ḡare ihihi veitera. ⁹ Daka iai uduanera. Ana unuhuna dai oroḡima auka maḡuri vara, renu auka dai oroḡi mati hakivima auka maḡe mimi vara. ¹⁰ Vaho koita oroḡare ra daure mati hoḡe auki mi oroḡima. Da oroḡane ra iaka iai bouge maḡuri maḡe misa, negu oti behi behive. ¹¹ “Daka mamoe nitabata ḡahiḡa koita maḡe vara. Mamoe nitabata koita vara au maḡurive mi vata maemi au mamoe tuhe iau dainehe. ¹² A negu ata be damune kiare, eduge auka beta mamoe nitabata koita mati beta aue iabara, eige aumu ura totoka oroḡare eraḡare renu mamoe ḡaregei aumu siviḡoromi, renu ura totoka eramu oiagei iauna koba koba ḡahisa. ¹³ Negu ata haevane eramu siviḡoromi badiva auka mamoe nitabata meva dibana veitera. ¹⁴ Daka mamoe nitabata koita maḡe vara. Daka daie iau dibane mati iauka di dibane, ¹⁵ ḡuma kobuḡa ei di Mame ra di dibane da tage ni Mame dibane. Eige daki di maḡurive mi vata maemima iau dainehe. ¹⁶ Daka mamoe nune be ḡaitage di ḡasina gera. Dama iau ḡaitage idigei oroḡisa, mati iau ḡaitage di enoḡe ihisa. Eige iauma kobabe ḡahisa, iau nitabata koitava tage kobabe. ¹⁷ Badiva ḡuma o dainehe ni Mame raki di ḡahara vima, eige daki di maḡurive mi vata maemi gerege dama maḡurivi ḡoiraḡisa. ¹⁸ Bera beta di maḡurive mimi vara, eduge davaḡu ge daki maemanu. Daka hedokate mi maemisa, mati daka hedokate mi ḡoiraḡisa. Ora di Mame daki rone ga vara. ¹⁹ Ga o iau dainehe Iudea ḡahava iaberaki ḡaitana iau kasa gevenu. ²⁰ Koita dadaḡava raki onaki roege, “Auka sua daure iabaraki au uhura eige auki ga kava vima. Ia gure au gare iha?” ²¹ Be iabera roege, “Ga o iabara beta koita be sua daure au uhura gava iabaki. A sua daure bena riaḡahe ata be niḡa niḡa veite au nie baoba vanu?” ²² Nega ei Ierusalema geramu iau Dubu hedoka ḡahane vaniva iauki anai. Ei tagera ribiri nega vara, ²³ renu Iesu tage dubu ḡaika oḡi ioavege, iau Solomona ihe kine kasihe. ²⁴ Gerege Iudea ḡaha be iaberaki au ḡasina rahi oriḡime iauki beraḡege, “Ana onaki no ḡaregei vaisu ga riaḡa no kiro geige vanu? Ana ni Maḡuri ḡahiḡa koita vanu, no boriti ḡahigeve.” ²⁵ Iesu raki kirogevenu, “Dakamu subuta ia boriti ḡahi gevenu, eduge iaka da riaḡa ḡahiḡa veitera. Oramu di Mame da kirone meva iabara daki au ihege kiogevege; ²⁶ eduge iaka riaḡa ḡahiḡa veitera, badivara iaka beta di mamoe tuhea iabara. ²⁷ Di mamoe tuhea iabara di enoḡe iha. Daka iau dibane, renu iauka di itahe ororo vara. ²⁸ Daka maḡuri behi behive mohigeige vara, mati iauka beta dau raḡohira vara. Bera beta di adehe idigei gevara. ²⁹ Otavado di Mame da moimane iaḡani vara beta iaie ḡore ḡereḡere vera, mati koita bera beta di Mame adehe idigei gevara. ³⁰ Da mati di Mame ruta noka kobabera.” ³¹ Iudea ḡahava iaberaki ḡaitana muni idigei ḡamisa roege. ³² Iesu raki gavi ronu, “Dakamu di Mame hedokehe daki me maḡe dadaḡa ia ḡaḡiro gevenu. Erege e au dainehe ia muniva da ḡamisa roia? ³³ Iudea ḡahava iaberaki roege, “Noka beta me maḡe e iau gera noki muni tahu a ḡamisa roia, eduge aki Dirava gare gure onaki roiare, badiva aka koita nubaḡa vara, aka avaḡu ami Dirava roma.” ³⁴ Iesu raki ronu, “Iana ia aenave uhura maema veitenu, Da rone, iakamu vata dirava iabara? ³⁵ Mati ia negu roiare Dirava gare oroḡane iauge iauki roia diravaia, eige au garera beta hosa raḡira vara, ³⁶ se iana rosa di Mame da hedoka ḡahane mati vata ada oi da besuḡane iaka roia daka davaḡu da mi roma, Daka Dirava Moera? ³⁷ Dana di Mame meve rone da kiogeige veite, gerege a negu da riaḡa ḡahime. ³⁸ Edube dana kiogevege, ana daḡe daḡe da riaḡa ḡahiḡa veitenu, ama au meve riaḡa ḡahisa, mati iama anavare renu riaḡa ḡahisa, di Mame di uhura mati daka di Mame uhura gera.” ³⁹ Gerege iauki ḡaitana kamuisa, eduge auki iau adavaḡa hakivanu. ⁴⁰ Auki ḡaitana Ioridana kasihe otinu Ioane ḡanai babatiso viege gabuhe, auki vani rore be ei gurami vaḡa roege. ⁴¹ Koita dadaḡava raki au ḡasina oroḡime, iauki kiroege, “Ioane ramu hedo meva be kiki veitera, eduge Ioane ata o gare ro gevege iabara riaḡa vara.” ⁴² Eige koita dadaḡava raki ei riaḡa.