¹ Nameni, ningo avo ari samuna amore ningo eni ufo Ahihi ai mehea ami ejo overeketo akari ai. Nimo barako eto koko eto koue ejo, engekari ai vati oe. ² Bovu amo eto hande eto humbuvo, angato ue avo meni Otofu ta pekari avo ke be uja. ³ Nimo oremboroa namo ivo te ea, rate nimo be ambu, eto sokova oa. ⁴ Nimo tapa tapa pure no avo kijo, eto mine do ai hanana uja amo amita tofo, embo eni ta mane. ⁵ Amita be re nimo tapa tapa bovu enga umbati oa. ⁶ Embo nimo avo arepoe kuruja amika dondea akakari hande ejo, ami nimo re arepoekaraja. ⁷ Engekari ai mane vati oa. Maha Otofu unumba ae ra, rate embo ami donda avunu avo urihuja, avo parati uja. ⁸ Emo avo donda ve tofota ari samuna vasiri urihuja kito, ama vasiri samuna avo parati uja, eto teto hiaja ati uja. Nimo avo Ahihi ta urihoa amo Ahihi ta angafo parati oa. ⁹ Vasiri akari ue mane jumuna ati oa, mine iji inono urou re amita donda avo parati oa, avo eto jumuna mane ati oa. ¹⁰ Avo eto nimo iji ami ari akari pere ejo, enana humora be ora amita. ¹¹ Kikiva pepemi avo ingere nau ami kakajorona avo kijo. ¹² Enana pure aro betapata orembati ora amo hamo visi ai mehera ami enegekaro ando kafukara ue. Ningo evi ove amo re, meni Otofu ta cross ai engekari ati ova. ¹³ Enana ando kafukara engekorora amo ahepoekari mane kiora, rate angato ao javo pemi humbati ore no ando visi ai. ¹⁴ Eto namo sarika mane ati ore te, prereto meni Otofu ta ie faire amita ati ona, ami ija amo enda betapata avo meni Otofu avo te faire ai tea. ¹⁵ Eto ando kafukari re kafukae ra, amo be mihae ra rate amita meni be re pure eto vasiri eha avo ena. ¹⁶ Eto nango betapata ke eto vasiri ei meheva, peka eto jo ari ningo ka ra, angato Maha Otofu ta Israel. ¹⁷ Eha embo avo namo mane engato ejo, ongato ejo ati uja, namo meni Otofu ta pupuha hamo nau ai mihija avo eto. ¹⁸ Meni Otofu ta jo ari eto jam jamo ningo ta Ahihi ka ra, nau enjo hoi, Avora!