Մոգերուն Այցելութիւնը ¹ Հերովդէս թագաւորի օրերուն էր, որ Յիսուս ծնաւ Յուդայի Բեթլեհէմ քաղաքին մէջ: Այդ օրերուն մոգեր եկան արեւելքէն դէպի Երուսաղէմ եւ հարցուցին. ² «Ո՞ւր է Յուդայի նորածին թագաւորը. մենք տեսանք անոր աստղը արեւելքի մէջ եւ եկանք զինք պաշտելու»: ³ Այս բանը լսելով, Հերովդէս թագաւոր եւ Երուսաղէմի բոլոր բնակիչները վրդովեցան: ⁴ Հերովդէս ժողով մը ըրաւ աւագ քահանաներուն եւ Օրէնքի ուսուցիչներուն հետ ու հարցուց. «Ո՞ւր պէտք է ծնէր Քրիստոսը»: ⁵ Անոնք պատասխանեցին. «Յուդայի Բեթլեհէմ քաղաքին մէջ. որովհետեւ Միքիա մարգարէն ըսած է. ⁶ «“Բայց դո՛ւն ո՜վ Բեթլեհէ՛մ, Յուդայի քաղաք, հռչակով նուազ չես Յուդայի միւս քաղաքներէն, որովհետեւ քեզմէ պիտի ելլէ այն անձը որ պիտի հովուէ իմ ժողովուրդս”» [Մք 5.2]: ⁷ Ապա Հերովդէս գաղտնաբար կանչեց մոգերը՝ հարցնելու համար անոնց, թէ ճիշդ ե՛րբ երեւցած էր աստղը: ⁸ Ան անոնց Բեթլեհէմ ղրկեց, ըսելով. «Գացէ՛ք եւ զգուշութեամբ փնտռեցէք մանուկը: Երբ գտնէք զայն, լուր բերէք ինծի, որպէսզի ե՛ս ալ երթամ եւ երկրպագեմ անոր»: ⁹ Թագաւորին քովէն ելլելով, անոնք շարունակեցին իրենց ճամբան, եւ այն աստղը՝ որ տեսած էին արեւելքի մէջ, իրենց առջեւէն կ'երթար մինչեւ որ եկաւ եւ կանգ առաւ հոն, ուր մանուկը կը գտնուէր: ¹⁰ Երբ տեսան աստղը, մեծ ուրախութեամբ ցնծացին: Անոնք այդ տունը մտան եւ տեսան մանուկը իր մօրը՝ Մարիամի հետ: ¹¹ Անոնք ծունկի գալով երկրպագեցին մանուկին: Ապա բացին իրենց արկղները եւ Յիսուսի ընծայեցին իրենց բերած նուէրները՝ ոսկին, կնդրուկը եւ զմուռսը: ¹² Յետոյ երազի մը մէջ Աստուած զիրենք զգուշացուց, որ չվերադառնան Հերովդէսին, ուստի ուրիշ ճամբայ մը բռնելով գացին իրենց երկիրը: ¹³ Մոգերուն մեկնելէն ետք, Տիրոջ հրեշտակը երազի մը մէջ երեւցաւ Յովսէփին եւ ըսաւ. «Արթնցի՛ր, առ մանուկն ու անոր մայրը, եւ փախչէ՛ Եգիպտոս: Հոն մնա՛ մինչեւ որ ըսեմ, որովհետեւ Հերովդէս մանուկը կը փնտռէ՝ զայն սպաննելու համար»: ¹⁴ Այդ գիշեր Յովսէփ ելաւ, առաւ մանուկն ու անոր մայրը եւ գնաց Եգիպտոս, ¹⁵ ուր մնաց մինչեւ Հերովդէսի մահը: Այդպիսով իրականացաւ Տիրոջ խօսքը Ովսիա մարգարէին միջոցաւ, թէ՝ «Եգիպտոսէն կանչեցի Որդիս» [Ովս 11.1]: ¹⁶ Երբ Հերովդէս անդրադարձաւ, որ մոգերը խաբեցին զինք, շատ զայրացաւ: Ան մարդիկ ղրկեց, որ սպաննեն Բեթլեհէմ եւ անոր շրջակայքը գտնուող երկու տարեկան եւ վար եղող բոլոր մանուկները, նկատի ունենալով մանուկին ծնելուն ժամանակը, որուն մասին տեղեկացած էր մոգերէն: ¹⁷ Այդպիսով կատարուեցաւ այն ինչ որ Երեմիա մարգարէին միջոցաւ խօսուած էր. ¹⁸ «Ռամայի մէջ ձայն մը լսուեցաւ, լացի ու մեծ սուգի ձայն, Ռաքէլ կու լար իր զաւակներուն համար, կը մերժէր մխիթարուիլ, որովհետեւ անոնք այլեւս չկային» [Եր 31.15]: ¹⁹ Հերովդէսի մահէն ետք, Տիրոջ հրեշտակը Եգիպտոսի մէջ երեւցաւ Յովսէփին երազի մը մէջ եւ ըսաւ. ²⁰ «Ե՛լ, ա՛ռ մանուկն ու անոր մայրը եւ գնա՛ Իսրայէլի երկիրը, որովհետեւ մանուկը սպաննել ուզողները մեռան»: ²¹ Յովսէփ ելաւ, առաւ մանուկն ու անոր մայրը եւ վերադարձաւ Իսրայէլի երկիրը: ²² Բայց երբ գիտցաւ, որ Արքեղայոս կը թագաւորէր Յուդայի վրայ իր հօրը՝ Հերովդէսի տեղ, վախցաւ հոն երթալու, եւ երբ Աստուած երազի մը մէջ զգուշացուց զինք, ան ճամբայ ելաւ դէպի Գալիլիա, ²³ եւ գնաց ապրելու Նազարէթ կոչուած քաղաքը: Այդպիսով կատարուեցաւ այն ինչ որ մարգարէներուն միջոցաւ խօսուած էր, թէ՝ ան Նազովրեցի [սրբագործուած (Թւ 6-1-21)] պիտի կոչուի [Ես 11.1]: