¹ Ha Jheso a jwa mo tempeleng, nngwe wa barutjwa a mo raya a re, "Morutyi, bona majwe uwa mante le rikago." ² Jheso a mo raya are, "O bona rikago je rityona je? Ha gona lijwe le le dho go siiwa go lengwe le sha thyungwe." ³ Ha e nje mo thabeng ya Lethware ye ha pele ga tempele, Petere, Jhakobe, Jhohane le Entereya ba mboja gka shephiring, ⁴ "He gkele, bilo ze bi dho go rihega leng? She supo e dha go rula shing ha bilo ze zothe bi dhoga bi rihega?" ⁵ Jheso a simolola go ba raya a re ," Le ikele thogko gore go shegka ga rula le yo o le rimejayo. ⁶ Mba bantsi ba dho go dha gka lebijo lame a be bere, 'To nna keresete,' mme ba dho go rimeja ba le bantsi. ⁷ Ha le uzweleja ritjwa le merumo yajo, le shegka la choga; bilo ze bi chwaneye za rihega, mme bokhutho hase bu dhe. ⁸ Gka gore chaba e dha go zosholoshela chaba, bogoshi le jona bo dha go zosholoshela bogoshi. Go dha go rula le rityhoromo ja lehatshe mahelong gka bontsi le mauba. Ze ke tshimologo ya birabi ja pelegi. ⁹ " Mme lena le ityise. Ba dha go le neela makgoteng gatshi le dha go betswa mo ri Sinagogeng. Le dha go ema ha pele ga balauri le rikgoshi gka lebagka la lebijo lame, she e le bopaki mogobo. ¹⁰ Richaba jothe ri chwaneye jha rerelwa mahogko a molemo pele. ¹¹ Ha be le chwara a be be le isa makgoteng ,le shegka la chwengwa ke gore le dha go logka le reng. Gka gore mo oureng yeyong ,she le chwaneye la she logka le dha go she newa; e dha go be ese lena mba le logkago, e dha go be e le moya o boitshepo. ¹² Motyho o dha go neela mozalwane gore a bolewe ,le ise wa motyhwana heri jwalong. Batyhwana ba dha go zosholoshela bazari babo a be ba riha gore ba bolewe. ¹³ Le dha go thoiwa ke ngwe le ngwe gka lebagka la lebijo lame. Mme yo o itshogka go ya phelelong motyho yo wong o dha go bologkwa. ¹⁴ "Ha le bona makgapha a cheno a ema ho a sha chwaneye go ema hoho," (A yo o logkisa tyemana e a thaloganye) " a mba ba mo Jutia ba chabele rithabeng, ¹⁵ a yo o ishethoweng sha itu a she holoshele dhatshe kana go tshola shengwe motyeng, ¹⁶ le yo o mo tshimong a she boyele gkobo yagwe. ¹⁷ A thathego wee go mba ba imilego le mba ba angwisa masheya malatsjing uwong! ¹⁸ Mme le rapele bilo ze bi shegka za rihashala marisha. ¹⁹ Gka gore malatsji uwong e dha go be e le malatsji a pitagano e tyona, jwagka go isi go dhe go rihagale tshimologo ya lehatshe, e Morimo o e rihileyo, go hithelela hombe, nnyaa ,le gona ha go kita go rihega gatshi. ²⁰ Mme go hithella Morimo a khutswahaja malatsji uwong, ha gona motyho yo o gka bologkwa. Mme iye a khutshwahaja malatsji gka lebagka la mba iye e ba ikgetyela. ²¹ Jhanong ha nngwe a gka re, 'Bona Jheso koyo! ' kana 'Bona ,ko yo uwa gko ,' le shegka la rumela. ²² Gka gore go dha go zoga bo Keresete mba ba mano le baporofita mba ba mano mme ba dha go riha metholo le rikgakgamajo e le go tsietsa, ha go kgonega, le mba ba ikgetyhwego. ²³ Le ityise! Iye gka le kela bilo ze zothe pele ga nako. ²⁴ "Mme mojwa ga pitagano ya malatsji uwong, 'leatsji le dha go hihala, kgweri le yona ha ngke e ntshe leseri layo, ²⁵ rinyeleri ri dha go wa go jwa mo lehauhaung, mme rityatyha je ri magorimong ri dha go tshikinyega. ²⁶ Jhaanong ba dha go bona morwa mothyo a dha a le marung gka tyatyha e tyona le kgalalelo. ²⁷ Jhaanong o dha go roma baengele bagwe le go phutyha bothe mba iye e ba ikgetyhela rintheng jothe ja lehatshe go ya bokhuthong jwa legorimo. ²⁸ Le ithyutye tyhutyo mo sethareng sha mofeige. Ha rigkala ja sho ri ntsha mathare, le ze gore silemo she hautshwane. ²⁹ Heri jwalong, ha le bona bilo ze bi rihagala, lemoga gore le ena o hautshwane, go bapa heri le shetswalo. ³⁰ Ammaaruri ke le kelago, kokomane ye ha ikita e hetya go hithelela bilo ze bi rihagala. ³¹ Legorimo le lehatshe ri dha go hetya, mme lehogko lame ha ngke le hela. ³² Mme gka ga leatsji le leyong kana oura,ha gona yo o zeyo,le ha e le baengele legorimong kana Morwa, ha e se Rara heri. ³³ "Ela thogko !bona, gka gore ha le ze nako ye e yona. ³⁴ Go chwana le mothyo yo o mo leetyong -o sije itu yagwe a be a naya mothanka wagwe tyaolo yayo, ngwe le ngwe mo tyihong yagwe, a be e laela bathogkomeri go rula kelothogko. ³⁵ Jhaanong rula kelothogko gka gore ha le ze gore monyi itu u dha leng gaya; e gka rula maitsebowa ,kana bosigo gare ,ha kotyo e lela, kana phakela. ³⁶ Ha a gka dha gka tshoganyejo, le shegka la letelela gore a hithele le leye. ³⁷ She ke she le kelago ke raya batyho bothe: Bona!"