¹ Jhaanong Jheso a simolola go ba rutja gka bi tshwantsho. A re, "mothyo a lema tshimo ya mofine, a e jweshelela ,a epa shethothelo sha mofine. A jwega lehelo la mothogkomeri a ba a hiriseja balemi ba mofine. A be a dhoga a le mo leetyong. ² Gka nako ye yong ,a roma mothanka go ya baleming ba mofine go ya go tshola mangwe a maungo a tshimo ya mofine. ³ Ba mo tshola ba mbetsa, ba be ba moleleka a sha tshotse shengwe. ⁴ A boya a roma mothanka nngwe, ba mo ntsha rithyo mo thogong ba jwelela gka go mo thabisa rithong mo goye. A romela nngwe gatshi, mme ena ba mbolaya . ⁵ Ba jwelela gka go chwara mba bangwe heri gka tsela e chwanayo, ba betsa bangwe le go bolaya bangwe. ⁶ Ya shana le nngwe yo o gka mo roma, morwa wagwe yo o mo ratyileyo iye ele wa bohelo go mo roma gobo. A re ,"Ba dha go tota morwaagke." ⁷ Balemi ba mofine ba raana bare, " yo ke mojha boshwa. A he mo bolaye gore boshwa bo rihe jwecho." ⁸ Ba mo chwara ba mbolaya, ba mo tolopela gkaite ga tshimo ya mofine. ⁹ Jhaanong,monyi wa tshimo wa go riha jwang? O dha guda abe a bolaya balemi ba mofine abe a naya bathyo basele tshimo. ¹⁰ Iye la shegka la bala lekwalo le? ' Lijwe le baagi iye be le thoboga iye la rihwa pilara. ¹¹ She iye shejwa Moreneng, sheshe nte marong echo." ¹² Mojwa ga she bahetjeleri pele baba Juta ba loga leano la go chwara Jheso gka gore iye ba thaloganya gore o logka gka shetshwantsho sheshe kgathanong nabo. Jhaanong iye be chaba boiriiri jwa batyho.Ba mo lesha ba dhoga. ¹³ Jhaanong ba roma mba bangwe ba Bafarasai le Baherote gore ba ye go mo chwara gka mahogko. ¹⁴ Habe dha, ba mo raya bare, "Morutyi, she bathyo ba she akanyago hase shengwe mo gowe gka gore ha o kgetholole nngwe. O rutja tsela ya Morimo. A go gkaha molaong go ruela lekgetho goo Kaisara kana nnyaa? He gka ruwela kana ha shegka ha ruwela?"

¹⁵ Jheso iye e ze boitomokanyi jwabo a ba raya a re ,"Ke shing le ntyegka? Nnaya leri ke le labe." ¹⁶ Ba naya Jheso leri. A ba raya are, "Shetshwantsho le mokwalo o ke zha ganye?" Ba re, "zaga Kaisara." ¹⁷ Jheso are , "Naya Kaisara bilo zagwe e be le naya Morimo zee leng zagwe." Ba mo hakgamalela. ¹⁸ Jhaanong Basadukai, mba ba re ha gona tsogo ba dha mo goye. Ba mboja bare, ¹⁹ "Morutyi, Moshe iye a he kwalela, ha monona a shwa a siya mozalwa naye a siya le mosari wagwe a le bochelong, mme ba sena motyhwana ,mozalwa naye o chwaneye a tshola mosari yo, mme a gorisheja mozalwa naye batyhwana.' ²⁰ Ga bo go na le barwa motyho ba le supa ,wa ntha go ngwala mosari a shwa, a sena batjhwana. ²¹ Wa boberi a ngwala mosari yo le ena a shwa a sena motjhwana ,wa boraro le ena jwalong. ²² Bosupa jo jwa shwa bo sena batyhwana. Labohelo mosari yo le ena a shwa. ²³ Mo tsogong ha bashwi be zoshwa gatshi mosari yo e dho gobe e le wa ga yo o heng?Gka gore iye a le mongwalwe ke barwa ba motyho mba supa." ²⁴ Jheso are, "A she ha se lebagka la gore abe le rimela, gka gore ha leze rikwalo kana tyhatya ya Morimo? ²⁵ Gka gore ha be zoga bashwing, ha ba ngwale kana ha ba ngwalwe, jhaanong ba chwana le baengele legorimong. ²⁶ Jhaanong gka bashwi mba ba dha go zoga ,ha se le bale mo lekwalong la ga Moshe ,gka she ya shee bona mo nageng, ha Morimo e logka naye ere , 'Ke Morimo wa ga Aborehama gatshi ke Morimo wa ga Isaka le Jhakoba'? ²⁷ Ha se Morimo wa bashwi ke Morimo wa bachiri. Lena le rimelago." ²⁸ Ngwe wa bakwari a dha a uzwa go logkisana gabo; a bona gore Jheso nta a ba araba shente. A ba boja , "Ke molao ohe o bothogkwa go e hetya yothe? " ²⁹ Jheso a hetjhola are ," she she bothogkwa ke gore, 'Uzwa, Isiraele , Morena Morimo wecho, Morena o mo yengwe. ³⁰ Ratjya Morena Morimo wago gka pelo yago yothe ,gka moya wago othe, gka thaloganyo yago yothe le thyatya yago yothe. ³¹ Thyaelo ya boberi keye, ' ratjya mabapi wago jwagka o ithyatya.' Ha gona thyaelo e hetya ye." ³² Bakwari bare ," Morutyi ,yo molemo! iye ware Morimo o me engwe, ha gona nngwe gatshi nteng gagwe. ³³ Go mo ratjya gka pelo yothe le gka thaloganyo yothe le gka thyatya yothe , le go ratya mabapi wago jwaagka o ithyatya gona le bithabelo zothe ze be hisijwego le meneelo." ³⁴ Ha Jheso a bona gore nte a ba araba gka bothale, a mo raya are ,"Ha o kgakala le bogoshi jwa Morimo." Mojwa ga mohong, ga shegka ga rula le yo o legka go boja Jheso ripojo. ³⁵ Ha Jheso a nje a rutjya mo tempeleng are, " Go dha jwang gore bakwari ba re Keresete ke morwa Dafite? ³⁶ Dafite gka boena ,a le moyeng o boitshepo are, 'Morena a raya Morena wame, "Rula mo lebogong lame la mojha go hithelela ke baya baba bago gka datshe ga rinoyo jago." ³⁷ Dafite gka boena iye a mbija 'Morena', jhaanong Keresete a gka rula morwa Dafite jwang?" Boiriiri jwa reeja gka boitjumelo. ³⁸ Motyhutyong yagwe Jheso are ," Ikele thogko bakwaring, mba ba ratjya go shekela gka biaparo ze bityelele ebe ba rumejwa mahelong a thyegkiso ³⁹ ,ebe ba rula bityilong ze bi totegago mo ri Sinagogeng le mahelong a totegago a meriho. ⁴⁰ Ba shena matu a bashwagari ,ibile ba rapela rityapelo je ri tjyelele gore batyho ba ba bone. Batyho mba ba dho go amoshela katholo ye tjyona." ⁴¹ Jheso a rula hatshe ha lepokising la meneelo mo tempeleng; iye a labeleye batyho jwagka ba tsjenya mari abo mo lepokising. Bontsi jwa bahumi ba ntsha mari uwa mantsi. ⁴² Jhaanong moshwagari wa mothogki a dha gka majana a le maberi a riha peni. ⁴³ A bija barutwya bagwe a ba raya are "Ammaaruri ke le ra yago, moshwagari yo wa mohumaneshi nte a neela gole gontsi gona le bothe mba nte be rula le sheabe mo lepokising la meneelo. ⁴⁴ Bothe nte be neela go jwa mahumong abo, mme moshwagari yo, go jweng mo lethogkong lagwe ta tsjenya mari othe uwa o chwaneye go chela gkao."