¹ E ke tsimologo ya thyero ya mahogko uwa molemo aga Jheso Keresete, Morwa Morimo. ² Heri jwa-agka go kwarilwe mo go Isaeya wa moporofiti, "Bona ke romela morongwa wame mogonye, yo ena oda-go baakanya tsela. ³ Lezwe layo o gowayo monageng, 'baakanya tsela ya Morena; thamalajha mebila yagwe." ⁴ Jhohane ada, e kolobetsa monageng le go rera kolobetso ya boikwathao le boichwarelo jwa bibe. ⁵ Naga yothe ya Jutea le bathyo bothe ba Jerusalema baya goye a ba kolobetsa mo nogkeng ya Jhorotane, be ipolela bebi. ⁶ Jhohane yee apere sheaparo sha maboya a kammela le lebante la ledalo manogkeng agwe, e jha tsiyakgope le lemepe la naga. ⁷ Iye e rera ere,"mongwe yo o da go dha gka mojwa game, yoo nonohile thytya go naleno, rikgole jha mpechane wagwe ha ke legkanye go ya dhatshe ke ri boholola. ⁸ Kele kolobetsa gka maze ,mme ena o dile gole kolobetsa gka Moya oo Boitshepo." ⁹ Ga rihagala gore malatsji uwong Jheso ade ejwa Nasaretha wa Galalea, mme a kolobetswa ke Jhohane mo nogkeng ya Jhorotane. ¹⁰ Mme yare Jheso ejwa mazeng, a bona magorimo e bulega mme moya wa holoshela mo goye jwagka lephoi. ¹¹ Lezwe lajwa magorimong lere, "Yoo ke Morwa-agke yo ke mo atilego, Yoo ke ityumela thyatha mo goye." ¹² Moya wa mo goshela nageng. Mme ya le mo nageng malatsji ale masome mane e legkwa ke Saatane. ¹³ Iye ena le riphologolo ja naga le baengele be mo rihela. ¹⁴ Iye yare mojwa ga Jhohane ala chwarwa ,Jheso a tjena Galalea a rera mahogko uwa a molemo a Morimo. Mme are, ¹⁵ "Nako iye yada mme bogoshi jwa Morimo iye jwa atshumela. Ikothae e be le rumele mahogko uwa molemo." ¹⁶ Mme ha e nje e shekela ha letshitshing la lewate la Galalea ,a bona Simone le Anterea yo ele leharana lagwe be lathela ritowa mo lewateng gka gko iye ele bachwari ba rithapi. ¹⁷ Jheso a ba raya are , "da gkanno ,ntshala mojwa mme ke da go le riha bachwari ba bathyo. ¹⁸ Gka bojogko ba latha ritowa jabo ba mo sala mojwa. ¹⁹ Mme ha Jheso e shekela hapejana ,a bona Jhakobe morwa Zebedee ena le leharana lagwe Jhohane, be rogka ritowa jabo. ²⁰ Aba bija mme ba siya ise wabo ebong Zebedee mokorong ena le malatya uwa iye be hirilwe, mme bamo sala mojwa. ²¹ Mme habe goroga Kaperanaume ,gka leatsji la Sabata, Jheso a tsjena mo Sinagogeng a rutya. ²² Mme ba hakgamajwa ke thyutyo ye iye e rutya, gka iye e rutya jwa agka nngwe yo ona le tyaolo eseng jwaagka baze-rikwalo be rutya. ²³ Iye yare ena mohong mo Sinagogeng gabo gole monona mongwe yo iye ena le moya yo mashwe a gowela gorimo ²⁴ are, "O bata he rihe jwang Jheso wa Nasaretha? Ah o dile go he nyeleja? Ke ze gore o anye.O Morwa Morimo yoo itshephileyo!" ²⁵ Mme Jheso a kgalemela letimona are ,"khala o jwe mo goye!" ²⁶ Moya yo mashwe wamo lathela hatshe mme wa jwa mogoye o gowa gka lentswe le le e gorimo. ²⁷ Batyho bothe ye be kgakgameye,mme ba bojana," go ke shing go? Thyutyo ye tsha ye e na le tyaolo! Mme ebile o laela mewa ye mashwe ebe emo ikokobeletsa!" ²⁸ Rikgang gka ye ja amana le kgaolo yothe ya Galalea. ²⁹ Ha ba sena gojwa mo Sinagogeng, ba dha mo itung yaga Simone le Anterea, bana le Jhakobe le Jhohane. ³⁰ Jhanong mogwashari waga Simone abe e rapalee e khama bolwetsi jwa moteteselo, mme ba kela Jheso gka ye. ³¹ Mme ada amo chwara gka lebogo amo emisa gka rinoyo mme bolwetsi jwa moteteselo jwa jwa mogoye, aba a simolola go ba rihela. ³² Maitseboeng uwong leatsji ela rwa ba be be nere bathyo bothe goye maba iye be khama le mba iye be tsjeninwe ke mewa ye mashwe. ³³ Toropo yothe ya be e kokoane ha kgorong. ³⁴ A horisa bathyo bothe mba iye be khama malwetsi uwa harologanego aba a leleka matimone ale mantsi, mme a shegka a leta gore matimone a logke gka gore iye e moze. ³⁵ A zoga go sha makuku thyatya go sha letatana; a jwa a tsjena mo lehelong la shephiri mme a rapela. ³⁶ Simone le mba iye e na nabo ba mo senka. ³⁷ Bamo hithela mme bamo raya bare, "bathyo bothe bago senkago." ³⁸ Mme aba raya are," a heye golo gongwe go sele gkaite heye ritoropong jeri hautshwane ,gore kede ke kgone go rera gkayo boobo, to shona she ke she deego. ³⁹ A shekela naga yothe ya Galalea, e rera mo ri sinagogeng jabo e leleka le matimone. ⁴⁰ Molepero ada goye. A mo rapelela; a khubama hatshe abe emo raya ere ," hao ratya o gka nntahaja." ⁴¹ Ashekejwa ke kutsoborogko a othyolola lebogo lagwe amo ama, a mo raya are ,"Ke batago.Ntahala." ⁴² Gona heri mohong lepero la jwa mo goye, mme abe a ntahala. ⁴³ Jheso amo laya thyatya abe emo leta gore a doge. ⁴⁴ A mo raya are, ruruhaja gore hao kele nngwe shengwe mme doga, o itshupeje baperesiti oye go riha ntehajo heri jwaagka moshe iye e laya, ele bopaki mo gobo. ⁴⁵ Mme a jwela gkaite a simolola a gasa lehogko mo eleng gore Jheso ya sha kgone go tsjena mo toropong, a rula mahelong a shephiri. Mme leha go nje jwalong bathyo bona ba jwelela be da goye bejwa mahelong uwa harologanyego.