¹ Ha Jheso e boyela Capernaum mojwa ga malatsjinyana, ga uzwana ale mo gaya. ² Boiriiri jwabo bo kgobokane gkayo mo iye go sina phatha, le ha lebakjing tyotya, mme a ba kela lehogko. ³ Mohong banona bangwe ba dha goye mba iye be nerile monona yo o kwakwaneyo; batjho bale bane ye be mo chwaraganee. ⁴ Iye ya re basha kgone go atjumela gka lebagka la boiriri, ba phunya marulelo uwa yale gorimo ga ga Jheso ba isa dhatshe moalo o monona yo o kwakwaneyo iye a robee mo go o. ⁵ Go bona tjumelo yabo, Jheso a raya monona yo o kwakwaneyo are, "Morwaagka, maleu ago ntaa ichwarelwa." ⁶ Jhaanong baze rikwalo babe be nje mohong mme ba itshekisa mo ripelong, ⁷ "Ke eng monona yo e logka gka tsela ye, iitimokanya. Ke anye yo a gka ichwarela bibe haese Morimo a naongwe?" ⁸ Gka bojogko Jheso a ze mmoyeng wagwe she bashe akanyijego motjeng gabo. Aba raya are, "Ke eng le akanyije jwa mo ripelong jeno?" ⁹ Ke shehe she she mothoho, go raya monona yo o kwakwaneyo ore ' maleo ago ntaa ichwarelwa' kana gore 'metshe, tshola moalo wago odhoge?" ¹⁰ Mme gka thulaganyo ledhe leze gore Morwa Mothyo ona le tyaolo mo lehatshing go ichwarela maleo . ¹¹ Araya yo o kwakwaneyo are; "Ke go raya kere , metshe, tshola moalo wago mme o dhoge oye tung yago." ¹² A ema mme gka bojogko a tshola moalo wagwe mme a jwela gkaite ga itu ha pele ga mongwe le mongwe ,gore bothe ba makale mme ba isa rikgalalejo Morimong. ¹³ A jwela gkaite gatshi ha lecheng ,mme boiiriri jwa da goye, mme a ba rutya. ¹⁴ Iyaare ha e hetya a bona Levi morwa Alphaeus e nje ha tanteng ya mokgekjhisi mme a mo raya are , "Ntshala mojwa."A emelela mme a mo sala mojwa. ¹⁵ Jheso iye e jha gojha tung ya ga Levi le bakgekjhisi ba le bantsi le baleuhi be jha naye le barutjwana bagwe gka iye bale bantsi le mbaba mo seye mojwa. ¹⁶ Ha baze rikwalo mba iyee le Bafarasai, be bona Jheso a jha le baleuhi le bakgekjisi ba raya barutjwana bagwe bare ," Ke gka go reng e jha le bakgekjhisi le baleuhi?" ¹⁷ Ha Jheso e uzwa she a ba raya are , "Bathyo mba ba nonohilego mbeleng ha ba thogke mohorisi, bathyo heri mba ba khamago ba mo thogkago. Ha ke dhee basiami ,mme baleuhi." ¹⁸ Jhanong barutjwa baga Jhohane le Bafarasai ba le mo ikjimong gojha. Bathyo bangwe badha goye ba mo raya bare, " gka go reng barutjwa ba ga Jhohane le barutjwa ba mafarasai be ikjima gojha ,mme barutjwa bago ba sha ikjime gojha?" ¹⁹ Jheso a ba raya are ,"A balaleriwa ba lengwalo ba gka ikjima gojha mongwari a shantse e na nabo? Heri ha mongwari a shantse e na nabo ,hangkagke ba ikjima gojha. ²⁰ Mme malatsji a dha gudha uwa mongwari dha be nta tsholwa mo gobo, malatsjing uwong ba dha go ikjima gojha. ²¹ Ha gona nngwe yo gka rokjelela shebatya she she tsha mo sheaparong she she gologolo ka jwalong shebatya she kgagoga she jwa,she she tsha mo go she she kgologolo mme go rihe lekgasa le le hetyelego. ²² Ha gona yo nne a tsjenye mofine o mosa mo lekukeng la mofine le le kgologolo. Gka jwalong mofine ono o tjhume ledhalo mme mofine le ledhalo jothe bi lathege. E chwaneye mofine o mosa o tsjenywe mo lekukeng le lesa." ²³ Gka leatsji la Sabata Jheso a jwela gka retshimong ja mabele, mme barutjwa bagwe ba buta bihagko ja mabele ha be nje be jwelee le moshekele. ²⁴ Bafarasai ba mo raya bare , "Bona ke gka goreng be riha she she sha letelelwe ke molao gka leatsji la Sabata?" ²⁵ A ba raya are," Hase lebale gka she Tafita iye a she riha ha a le mo lethogkong le tala -ena le banona mba iye e na nabo - ²⁶ jwaagka e tsjena mo tung ya Morimo ha Abiathar a shanje ele moperesita yo motyona, mme e jha borothyo jwa shetshubelo, jo iye e se gka ha molaong go bo jha e se moperesita, mme a naya gka thangwe ba iye ena nabo?" ²⁷ Jheso are," Sabata e rihweye mothyo e sing mothyo e rihweye Sabata. ²⁸ Gka jwalong ,Morwa mothyo ke Morena, le wa Sabata tyotya."