¹ weno ngoli kukwetu atwe twa koro mulipuro tuna hepa kukwafa vaghunyetu vana piro nkondo ovo vana karo mumaghudito, kapishi tuku pakere tupu mbili na ghumwetupu. ² Kehe ghuno apakere mbili vaghunyendi muku varuwanena ghuwa, mposhi vakore mulipuro. ³ Mbyovyoshi nampili Kristus kapi akupakilire mbili mwene. Nani ngoli, yira momu tupu ghatanta matjangwa ashi, ''Matuka ogho kava mutukanga weno papande ngoli anakara.'' ⁴ Kehe vino vatjanga mumatjangwa kwavitjangera mo ashi tuvhure kukoronga tukare nalididimiko ntani namukumo mposhi ngatu kare na lihuguvaro lya kutunda kumatjangwa. ⁵ Karunga ogho akaro na lididimiko kumwe na mukumo ndi amupe makuyuvho mukatji kenu yira momu tupu ghavishanena Jesus Kristus. ⁶ Tuna hepa kuruwana vino mposhi natuvantje kumwe ngatu fumadeke na kupanda Karunga mwaHompa wetu Jesus Krsistus. ⁷ Tamburernu vaghunyenu, yira momu ghamutambura nanwe Kristus, makura Karunga ngawane mfumwa. ⁸ Ame kuna kumutantera ashi Kristus kwakara mukareli wavaJuda ngashorore ghushili waKarunga, ghuye ngatikitemo matwenyidiro ogho vatapire kuva kurona vavo, ⁹ mposhi navapagani navo ngava fumadekerepo Karunga mughufenkenda wendi. Yira momu atanta matjangwa ashi, ''Mposhi ame ngani kufumadeka mukatji kavapagani ntani ngani yimbira mulidina lyoye.'' ¹⁰ Ntani kwatjanga nka ashi, ''Anwe vapagani, Hafenu, kumwe na muhoko waKarunga.'' ¹¹ Ntani nka shimpe ashi, ''Anwe vapagani namuvantje, pandenu Hompa; dimuhoko nadintje dimutange.'' ¹² Jesaya kwaghamba nka ashi, ''Mulira lya Isayi ngamu tunda, ghumwe ogho ngava tuma ngapangere vapagani; Dimuhoko nadintje ngadi kara nalihuguvaro mumwendi.'' ¹³ Karunga ogho atapango lihuguvaro ndi amuyude ruhafo na mbili mulipuro lyenu, mposhi nkondo da mpepo yakupongoka ditikitiliremo lihuguvaro lyenu. ¹⁴ Name weno nayiva ngoli ashi anwe vaghunyande. Ntani nka name nayiva ashi anwe kuruwana ghuwa ntani mbyo mwakara na ghukonentu. Nampili name nayiva ashi anwe kuvura kuronga vaghunyenu. ¹⁵ Ame kuna kumutjangera na nkondo mukumuvhurukita vininke vimwe, ame kuna kuruwana vino mukonda yankenda oyo atapa kukwande Karunga. ¹⁶ Ghushwi wande ame kwantuma ngani kare mukareli waJesus Kristus kuva pagani, ngani kare mushiruwana shaghu Pristeli wambudi yaKarunga, mposhi vapagani ngava kare ndjambo oyo atambura Karunga, mbyo yapongokera mumpepo yakupongoka. ¹⁷ Ame nakara nakonda yakukupandayika mwaJesus Kristus muviruwana vyande ovyo vyahameno kwaKarunga. ¹⁸ Mbyovyoshi ame kapi nahoro kughamba navyo peke vyahana ashi mbyovo na ruwanena mwaKristus ashi vapagani valimburuke kwaKarunga. Vino kwavi ruwana munkango dande na muviruwana vyande, ¹⁹ kwatapa kukwande nkondo, naviyito ntani na kuruwana vitetu, munkondo yampepo yakupongo. Ame mbyo natikitiremo kuyivita mbudi yaruhafo yaKristus kutunda mu Jerusalem, namavango ghapepi nagho ghakughure dogoro ku Ililikum. ²⁰ Mundjira yande, kwashanine kutwara mbudi yaruhafo, kumavango ogho vapira kuyuvha rumwe lidina lya Kristus, mposhi nganipire kutungira pa litateko lya ghunyande. ²¹ Yira momu ghatanta matjangwa ashi: ''Ovo vapiro kumuyiva ngava mumona, ntani ovo vapiro kumuyuvha ngava muyiva.'' ²² Vino mbyo vyankwato shirugho shashire mukupira kuya kukwenu. ²³ Weno, namana viruwana vyande muno muvirongo vino, ntani nakara mwaka dadingi kapi namumono weno nahoro kuya kukwenu. ²⁴ Ame kuna shana nganiyamumone opo nganiyapita mundjira yande yakuyenda ku Spaniya, mposhi ngamuya nkwafe muruyendo rwande, ene ngoli nganiya kara tanko kumwe nanwe dogoro ngaruyapwe rutjima rwande ntani nganiya pitakana. ²⁵ Ene ngoli ame kuna tamba ku Jerusalem, ngani karuwanene mbunga yakupongoka yaKarunga. ²⁶ Mbyovyoshi mbunga Kriste damu Makedoniya na mu Akaniya kwatokora mukutapa vitapa kuva pongoki vava hepwe vamu Jerusalem. ²⁷ Mo ngoli, vino vavene vavitokoro, morwa vakara na hepero yakutapa mbatero kukwavo. Nkeneshi vapagani vawanako kumaghushwi ghapampepo, ogho vaweka vaJuda kutanta shi pakara hepero ashi navo vawaneko mbatero yaliparu. ²⁸ Opo ngani mana kutikitamo shino shiruwana shina tikimo, ntani nganuyenda ku Sipaniya mundjira yande ntani nganuya mupita. ²⁹ Ame nayiva ashi opo nganuya kukwenu nganu muyitira maghushwi ghakutikiliramo ghakupongoka mwaKristus. ³⁰ weno ame, nakumukorangeda, vakuru, kupitira mwaHompa wetu Jesus Kristus, na mushihoro shampepo yakupongoka, mukondje kumwe name mukukanderera kwaKarunga. ³¹ Nturenu mundapero denu mposhi nivhure kumanguruka nitunde kuvantu vahana lipuro vamu Judeya, ntani navitapa evi nakutwara ku Jerusalem ashi vapongoki ngava kavitambure maghoko maviri. ³² Kandererenu ashi nganiye kukwenu naruhafo mushihoro shaKarunga, nganiye, ngatuya gwanekere ngatuya peperere kumwe. ³³ Karunga wambili akare kumwe nanwe namuvantje. Amen.