¹ Yino ntjangwatumwa kuna kutunda kwamuApostoli Paul, mukareli waJesus Kristus, ogho atoghorora Karunga akare muApostoli, ngayuvite mbudi yaRuhafo, ² Oyo aghambilire mutunwa twavaPorofete mumatjangwa ghakupongoka, ³ kuhamena kwamonendi ogho ngava shampuruka ngatundo mulira lya David. ⁴ Pakumuvhumbura ku ufe, mpepo yakupongoka kwashorora nkondo dadinene ashi Hompa wetu Jesus Kristus ne mona Karunga. ⁵ Mumwendi mo nawanena nkenda nikare muApostoli ashi ngani kune lipuro mudi muhoko nadintje vapure nakulimburukwa, mukonda yalidina lyendi. ⁶ Modino dimuhoko, nanwe mpomuli mumbunga yavo vatoghorora vahamene kwaJesus Kristus. ⁷ Yino ntjangwatumwa kuna tamba kukwenu nanuvantje mwakaro muRoma ava ahora Karunga mbyo amu toghorora mukare vantu vendi vakupongoka: Karunga shetu naHompa wetu Jesus Kristus vamufere nkenda ntani vamupe mbili. ⁸ Pakutanga, Ame kuna kutapa mpandu kwaKarunga wande kupitira mwaJesus Kristus mukonda yenu namuvantje, mbyovyoshi lipuro lyenu lyayuvika Udjuni naghuntje. ⁹ Karunga mwene ndje mbangi yande ashi, ame kumuruwanena namushima wande naghuntje mukuyuvita mbudi yaRuhafo yamonendi, ghuye ayiva ashi ame kumuvhuruka kehe pano mumakanderero ghande. ¹⁰ Ame kehe pano kushungida Karunga mundapero ghampeko shirugho mushihoro shendi shashiwa niwane shirugho shakuya mudingura. ¹¹ ntani ame kuna horo kumumona, nganiya mupeko maghushwi ghapa mpepo, ngamukare muna koro. ¹² Ovyo nahoro kughamba mbyovino ashi, natuvantje ngatuyawane likwafo, anwe ngamuwane mbatero kulipuro lyande, ntani name nganiwane mbatero kulipuro lyenu. ¹³ Vakwetu, ame kuna horo kumupukurura ashi ame rwarungi kushana nuye kukwenu (ngoli kehe pano kudumwa mukonda yamakulimbo ghangandi), kuna horo niya kune nyango mumwenu, yira momu narughana muvapagani navantje. ¹⁴ Ame kuna kara nashinka kwanavantje vakare vaGereka navantunda virongo, vakurongi navapiro kukuronga. ¹⁵ Vino, mbyo, vina kuntumangedo ashi ngani yamuyuvhitire mbudi yaRuhafo nanwe mwakaro muRoma. ¹⁶ Ame nakufashi ntjoni kumbudi yaRuhafo, mbyovyoshi yayo ndjo nkondo daKarunga dakuparura kehe ghuno wakuyipura, pamuhovo kuvaJuda ntani kuvaGereka. ¹⁷ Vyashoroka mumbudi yaRuhafo ashi, lipuro ndyo litateko nauhura omo ghavhuranga Karunga kuhungameka vantu, yira momo vavitjanga ashi,'' Vahungami kuparuka mulipuro.'' ¹⁸ Ugara waKarunga ngautunda muliwiru mukurwanita po navantje vaghudini Karunga naghuntje naghudona naghuntje wavantu ovo valyato ghushili naghudona wavo. ¹⁹ Navintje ovyo vahepa kuyiva vyakuhamena Karunga vyava kenena. Karunga mwene aviva kenitira. ²⁰ Mbyovyoshi nkalito yendi yakupira kumoneka, nkondo dendi danaruntje naghu Karunga wendi, nkoko wakatwa Udjuni kuvimonenena virughana vyendi, ngavivalimbe mukukupopera. ²¹ Nampili moomo vayiva Karunga, ngoli kapi vamufumadeka ndi ashi vamupandure yira moomo vyawapera. Kwagovapeka maghano ghavo ntani mudimushima davo kwashovagana, mwato ndunge dashovagana. ²² Vavo kukutwenya ashi vanandunge, mbyo vakarera magova. ²³ Vavo kapi vatongamenanga Karunga waghuyerere wakukarererapo, vavo kutongamena mafano ghavishwi vyavantu vyakupira kukarererapo, mafano ghavidira, vikorama, ntani navivyakughovana, mbyo vatongamenanga. ²⁴ Karunga mbyo ashuva madovo ghadimushima davo dinyate, mposhi marutu ghavavene ghava yitire ntjoni. ²⁵ Vavo mbyo vapirura ghushili waKarunga ghukare vipempa, makura mbyo vatongamenanga nakukarera vishitwa kupitakana mushiti ogho awapero kumufumadeka naruntje na naruntje. Amen. ²⁶ Mukonda yavino, Karunga mbyo avapa lifingo lyamadovo ghamadona, vakamali vavo kwapirura maghukaro ghavo ghapa shina ghuntu ghakare yira ghavi korama. ²⁷ Vakare vakafumu navoshi, vashuva ghukaro walishito wakugwanekera navakamali mbyo vahamweka rushonda mukuku hora vene-na-vene. Vano vakafumu kukuruwana vene-na-vene vyakuyita ntjoni, makura mbyo vawanenamo mfuto muviruwana vyavo vyavidona. ²⁸ Mukonda shi vavo vashwena kulimburukwa vayive ghuhungami waKarunga, naKarunga naye mbyo ava shuva varuwane vyamumaghayaro ghavo ghama dona, varuwane vyahana mulyo. ²⁹ Vavo kwayura ghumbudi, ghudona, makurulya ntani naghukorokotji. Vavo vayura mfudu, varudipaghi, mutininiko, vimpempa ntani naghurunde. Ntani vavo rughambo, ³⁰ ghudwa, vanyengi Karunga, ndino, lishandu, vakunenepita ntani vavo kehe pano kushana ndjira yayipe varughane ghurunde; ntani vavo vadina vakurona vavo. ³¹ Vavo kapi vayuvanga ashi valimburukwe, kwato lipuro, vadimutjima koka ntani kwato nkenda. ³² Vavo vayiva nawa-nawa veta daKarunga ashi, ovo varughanango vino mfuto yavo ne mfa. Nampili moomo vayiva vino, vavo nka kuronga vaunyavo vavi rughane.