¹ Apa atundire Yesusi muntembeli aka yende, ghumwe wavakashishongero vendi amutantere ashi, "Mushongi, kenga ogho mawe ghamawa namatungo ghamawa!" ² Yesusi amutantere ashi, "Ghuna kughamona ghano matungo ghamanene? Ngava ghadyonaghura kundereko nampiri liwe limwe olyo ngali karo pawiru yaghunyalyo." ³ Apa ashungilire pandundu yamaghuywe akuvyuke nantembeli, Peturusi, Yakopu, Yohanesi, naAndriyasi mpo vamupulire kumpengi ashi, ⁴ Tu tantere, ruvede munke nga vishoroka vino vininke? Ntani vinke nga vikaro viyivito ashi vino vininke ntantani ngavi horoke"? ⁵ Yesusi mpo avatantilire ashi, "Karenu muna vangarara ashi kundereko ogho nga mupukito. ⁶ Vangi ngavayo mulidina lyande, ngava ghambo ashi, ame Kristusi, vavo makura ngava pukite vavangi. ⁷ Ngoli apa nga muyuvha vita namukukumo wakuvita, ngasha vi mutukukita; vino vininke vina hepa kushoroka, ngoli ghuhura waghudyuni shimpe kapi ghuna tiki. ⁸ Mpo ngolishi dimuhoko ngadi kushapaghukira- shapaghukira, ntani mapangero nagho ngagha kupiraghukira-piraghukira. Ngaghakarako makankamo ghalivhu kumavhango ghamangi, nalirumbu. Navintje vino ntundiliro tupu yamaghudito. ⁹ Karenu muna vangara, ngava mutapa kuvapanguli, naku mutoghona muntembeli. Ngamuka yimana kumeho yavapangeli navahompa mukonda yande, ngamukare ghungambi ku-kwavo. ¹⁰ Ngoli mbudi yaruhafo ngava yiyuvhita tanko kudimuhoko nadintje. ¹¹ Apa ngava mukwata vamutape, kapishi nga mukudivikire ashi vinke ngamu ghamba. Muviri ndyoyo ngava mupa ovyo ngamu ghamba, kapishi nwe nga mughambo, nani ngoli Mpepo Mupongoki. ¹² Mukurwa muntu nga tapa mughunyendi vaka mudipaye, ano shamuntu naye nga tapa monendi ngava mudipaye. Vana ngava shapukira vakurona vavo muku vanyenga naku vashweda vava dipaye. ¹³ Navantje ngava munyenga mukonda yalidina lyande. Ano keheghuno nga didimiko nange kughuhura, nga paruka. ¹⁴ "Opangamumona lidjonaghuko lyamashwaghu kuna kushoroka oko vyapirakuwapera kushoroka," (muvaruli atede) "avangava karo muYudeya vadukire kumandundu, ¹⁵ ogho ngakaro pawiru yandyuwo ngasha dumpuka ayende mundyuwo aka shimbe vininke vyendi kehevino. ¹⁶ nagho ngakaro mulifuva ngasha vyuka nka kumundi aka shimbe vyuma vyendi. ¹⁷ Ngoli lihudi shiri kwavo ngava karo namara nava ngava yamweko mumayuva ogho. ¹⁸ Raperenu ashi kapishi ngavi shoroke pakufu. ¹⁹ Mukondashi ghagho ngaghakara mayuva ghamadito, ogho ghapiro kukarako rumwe kutunda kulishito, apa ashitire Karunga ghudyuni, dogoro weno, ntani narumwe kapi ngagha karako nka. ²⁰ Ndi kapi agha sheshupita Karunga mayuva ogho, ndi kundereko ogho ngaparuko. Ngoli mukonda yava atoghororwa, ovo atoghorora mo, ghuye nga sheshupita mayuva ogho. ²¹ Makura nangeshi ghumwe nga mutantere ashi, 'Kengenu, Kristusi ne oghuno! ndiposhi 'kenga, oghunya!' kapishi ngamu vipura. ²² Mukondashi vaKristusi vavipempa navaporofete vavipempa ngava moneka naku muku ruwana vineghedo nakuruwana vitetu muku mupukita, nangeshi kuvhura, nampiri vatoghororwa. ²³ Karenu muna rungarara! Namutantera vininke navintje kumeho yaruvede muku murondora. ²⁴ ''Muruku rwamayuva ghamadito, liyuva ngali dima, kakwedi kapi ngaka tapa shite shako, ²⁵ ntungwedi ngadiwa kutunda kuwiru, ntani nkondo damuliwiru ngadi kunyunganga. ²⁶ Ntani ngava mona Mona Muntu kuna kuya pamaremo nankondo dendi nashikoda shendi. ²⁷ Ghuye nga tuma vaengeli vendi ngava pongayike vatoghororwa vendi pamwe mumashonga mane ghampepo, kutundilira kughuhura waghudyuni nange kughuhura waliwiru. ²⁸ Kushongerenuko kushitondo shaghukuyu. Tupu ditameka kushoka dimutavi mahako ghamape, muna yiva kare ashi kurombo ana tiki. ²⁹ Ntani nka, apa ngamu mona vininke vino kuna kushoroka, ngamuyive ashi ghuye ana tiki ngoli, pepi nalivero. ³⁰ Shiri-shiri naku mutantera ashi vantu avava ntantani kapi ngava pwerererapo vyavininke vino vyahana kushoroka. ³¹ Liwiru nalivhu ngavi shagha ngoli nkango yande kapi ngayi shagha. ³² Ngoli, kuhamena kuliyuva olyo ndi viri oyo, kundereko ogho avi yivo, nampiri vaengeli vamu liwiru, ndi Monendi, ngoli Sha tupu. ³³ Vangararenu! Mukenge, Mbyovyoshi kapi mwayiva ashi shirugho munke. ³⁴ Vyavyo kuna kara yira mukafumu ogho ana kuyendo ruyendo- ghuye kushuva ndyugho yendi nakushuvira vapika vapangere ndyugho yendi, keheghuno naviruwana vyendi, nakupangera vatakamiti varungarare. ³⁵ Mpo murungararera mukondashi, kapi muna yiva ruvede oro ngaka vyuka mwenya mundi; kuvhura aka vyuke ngurova ndi pakashi ka matiku, ndi pakuyiya vikondomboro, ndi ngura ngura. ³⁶ Nange aya wangu-wangu, kapishi ngaya muwane nda mwararera. ³⁷ Vino naku mutantera ame kuna kuvitantere navantje ashi; Rungararenu!''