¹ Pa kutanga kwakalire po Nkango, Nkango kwakalire naKarunga, ntani yino Nkango Karunga. ² Yayo kwakalire naKarunga pakutanga kumeho yalishito. ³ Lishito nalintje kwaliturapo kupitira muNkango, ntani kwato shaku vhura kukarapo pahana Nkango, navintje kwaviturapo kupitira muNkango. ⁴ Monyo kwakalire muNkango, ntani monyo kutapa shite muvantu. ⁵ Shite kutapa ghukenu mumundema, ntani mundema kapi wafunda shite. ⁶ Karunga kwatumine murume, walidina Yohanesi. ⁷ Ghuye kwayire nga tape ghumbangi waku hamena kwashite, mposhi mukonda yaghumbangi wendi waghushili vantu navantje ngava pure mumwendi. ⁸ Yohanesi kapi shi ndye shite, ano ngoli ghuye kwayire tupu nga tape ghumbangi waghushili kuvantu waku hamena kwashite. ⁹ Oshino shite shaghushili, shaku tapa shite muvantu navantje, ntani shite kwayire mughudyuni. ¹⁰ Nkango kwakalire kare mughudyuni, ntani Ghuye ndye aturopo ghudyuni ghukare po, ano ngoli ghudyuni kapi wamu yivire Ghuye. ¹¹ Ghuye kwayire kuvantu vendi, ano ngoli vantu vendi kapi vamu tambulire. ¹² Ano ngoli vantu vavayingi ovo vamu tambuliro, vaku pura mulidina lyendi, ghuye kwatapa nkondo kukwavo ngava kare vana vaKarunga. ¹³ Ovano vanuke kapi shi vaku shampuruka muhonde, kapi shi vapa nyama, ntani kapi shi vaku shampuruka mushihoro shamukafumu, nane ngoli vanuke vaku tunda kushihoro shaKarunga. ¹⁴ Makura Nkango ayi kara muntu ntani Ghuye akara mukatji ketu. Atwe kwamona ghuyerere wendi, ntani ghuye kwaneyeda ghuyerere waVashe mumwendi, ntani ghuye kwayura shihoro nankenda ntani naghushili. ¹⁵ Yohanesi kwatapire ghumbangi waku hamena kukwendi, opo aghambire, naliywi lyaku dameka weno ashi, ''Muntu ogho namu tantilire opo naghambire weno ashi, 'Ogho ana kuyo kuruku rwande munene ntani kwapitakana papande, ghuye kwakara po kare kumeho yalishampuruko lyande.''' ¹⁶ Munkenda yendi yaku yura yaku tikiliramo atwe mo twa wanena ghufe nkenda namatungiko ghaku pira ghuhura. ¹⁷ Karunga kwatapire veta dapa matjangwa kupitira mwaMoses. Ano ngoli nkenda naghushili kwaya kukwetu kupitira mwaYesus Kirisitus. ¹⁸ Kwato ghumwe ogho akengo rumwe Karunga namantjo ghendi; nkwandi Monendi ti ahuru Yesus Kirisitus, ogho ashungiro mulivhango lya papepi naVashe, ntani Mona naye Karunga ghuye kwatu neyeda tuyive ashi weni omo afana Karunga. ¹⁹ Yohanesi kwaghambire nkango daweno atape ghumbangi wendi kuva Yuda nava Pirisiteli nava Levi ovo vatundiro kuYerusalemu vayende kukwendi vaka mupure weno ashi, ''Are lidina lyoye?'' ²⁰ Yohanesi kwaghamba atape ghumbangi wendi - ntani ghuye kapi akananine, ghuye kwaghamba atongonone weno ashi - ''Kapi shi ame Kirisitus.'' ²¹ Ntani vavo avamupura nka weno ashi, ''Tutantere lidina lyoye? Ove Eliya ndi?'' Yohanesi avalimburura weno ashi, ''Hawe, ame kapi shi Eliya.'' Vavo avamupura nka weno ashi, ''Nove ghumwe wavaporofete vakare ogho ana kuvyuko ndi?'' Yohanesi alimburura weno ashi, ''Hawe.'' ²² Vavo avamupura nka weno ashi, ''Tutantere lidina lyoye, mposhi natwe tuka tape mbudi nalilimbururo kwavo vana tutumo? Kutwenye naghumoye are lidina lyoye?'' ²³ Yohanesi kwaghamba weno ashi, ame ghumwe ogho vatjanga mumbapira yaYesaya weno ashi, ''Ame ghumwe waliywi, oghu ana kuyiyiro mumburundu weno ashi: 'Wapekenu ndyira navitughura vikare vina wapa ntani vina vyukiliri Hompa kuna kuya kukwetu papepi ana kara ngaya pitemo.'' ²⁴ VaFarisayi navo kwatumine vantu vayende kwaYohanesi, ²⁵ vaka mupure naku ghamba weno ashi, ''Mukonda munke wakushiranga vantu vawane liyoyero lyamu mema nkene shi kapi shi ove Kirisitus ndi Eliya ndi ghumwe wavaporofete vakare?'' ²⁶ Yohanesi kwalimburura, naku ghamba weno ashi, ''Ame kwakushanga tupu vantu mumema. Ano ngoli mpali muntu ghumwe ogho ana yimano mukatji kenu ogho mwapira kuyiva. ²⁷ Ghuye ndye ana kuyo akwame muruku rwande, nampili name shi kapi nahungama kushutura ruwodi rwaku nkaku dendi.'' ²⁸ Ovino navintje kwashorokilire kumukunda waBetaniya musheli munya yamukuro waYorodani, oku ka kushiranga Yohanesi vantu mumema vawane liyoyero. ²⁹ Liyuva lyaku kwamako Yohanesi kwamona Yesus kuna kuya kukwendi makura ghuye aghamba weno ashi, ''Kengenu, Ndywighona yaKarunga kuna kuya kukwetu yayo yaku dongononapo ndyo davantu vamu ghudyuni! ³⁰ Oghuno ndye namu tantera weno ashi, 'Muntu ogho ana kuyo kuruku rwande ghuye munene ntani kwapitakana papande, ghuye ndye ahoviro kukarapo kumeho yalishampuruko lyande. ³¹ Pa kuhova name shi kapi namuyivire ano ngoli weno namuyiva, ame shiruwana shande shaku kusha tupu vantu mumema vawane liyoyero lyaku kushighura dimutjima vatjindye ghukaro naku shayeka kuruwana ghudona mposhi vantu vamuhoko wava Isirayeli ngavaye kukwendi ngava muyive.'' ³² Yohanesi kwaghambire atape ghumbangi wendi, waweno ashi, ''Ame kwakengire Mpepo kuna kusheghumuka yitunde muliwiru mushishwi shaNkuti, makura ayi tembere ayi kara papendi. ³³ Pa kuhova name shi kapi namu yivire ghuno muntu, ano ngoli ogho antumo naku tapa shiruwana kukwande ashi nganu kushe vantu mumema ngava wane liyoyero lyaku dongononapo ndyo davo, ghuye kwantantera weno ashi, 'Nkene ngaghu mona Mpepo kuna kusheghumuka yitunde muliwiru mushishwi shaNkuti makura ngayi kare papendi, yiva weno ashi ghuye ndye ndyegho nga kusho vantu ngava wane liyoyero lyamu Mpepo yaKupongoka.' ³⁴ Ame kwavimona namantjo mbyo naku tapa ghumbangi kukwenu muyive ashi muntu waweno Mona Karunga.'' ³⁵ Liyuva lyaku kwama ko nka, Yohanesi kwakalire kumwe tupu navarongwa vendi vaviri, ³⁶ vavo kwamona Yesus kuna kupita aka yende, makura Yohanesi aghamba weno ashi, ''Kengenu, Ndywighona yaKarunga!'' ³⁷ Vano varongwa vendi vaviri opo vamu yuvire Yohanesi kuna kughamba nkango daweno makura avamushuvu vakwame Yesus. ³⁸ Makura Yesus apiruka akenge kuruku rwendi avamono vavo kuna kumu kwama muruku rwendi, ghuye avapura weno ashi, ''Vinke muna kushana?'' Vavo avamu limburura weno ashi, ''Rabi'' (kutanta ashi ''Murongi''), ''Atwe kuna shana kuyiva ashi kuni nko oku wakara?'' ³⁹ Ghuye avatantere weno ashi, ''Tuyendenu kumwe muka kenge oku nakara.'' Makura avayendi kumwe naye ntani avaka kenga oku akara; ntani avaka kara naye lino liyuva, mukondashi liyuva lina toko kare ntani viri yina piti. ⁴⁰ Ghumwe wavarongwa vaYohanesi vaviri ogho akwamino Yesus lidina lyendi Andriyas, mughunya Simoni Peturusi. ⁴¹ Andriyas kwayenda aka shane mukurwendi Simoni aka mutantera weno ashi, ''Atwe tuna ka wana Muyogholi ''(ku tanta ashi: Kirisitus). ⁴² Makura avayendi kumwe tupu namukurwendi Simoni kwaYesus, ano ngoli Yesus opo akengire Simoni aghamba weno ashi, ''Ove Simoni mona Yohanesi. Kutunda pano lidina lyoye ove Kefasi'' (ku tanta ashi Peturusi, Liwe). ⁴³ Liyuva lyaku kwamako, Yesus kwatunda kuYorodani ayende kuGalileya, makura mundyira yendi awana Felipus amu tantere weno ashi, ''Yakuno kukwande kwame.'' ⁴⁴ Filipus naye kwatunda kushitata shaBetesayida, nkoku vatunda vaAndriyas naPeturusi. ⁴⁵ Makura Filipus naye ayendi aka shane ghunyendi Nataniyeli aka muwana ntani amu tantere weno ashi, ''Atwe tuna kawana ogho vatjanga mumbapira yaMoses, ntani naghu vatjaga mumbapira yavaporofete ogho ngayo kumeho lidina lyendi: Kirisitus waku Nasareti mona Yosefu.'' ⁴⁶ Nataniyeli aghamba weno ashi, ''Ngoli shili muNasareti kutundamo vininke vyaviwa ndi?'' Filipu amu limburura weno ashi, ''Tuyendeko ghuka mukenge.'' ⁴⁷ Yesus opo akengire Nataniyeli kuna kuya kukwendi aghamba weno ashi, ''Kengenu, muIsrayeli mwene -mwene waghushili, mumwendi mwato vimpempa ntani mwato ghudona!'' ⁴⁸ Nataniyeli amu pura weno ashi, ''Weni omo ghuna yiva ashi ame ghuno?'' Yesus amu limburura naku mutantera weno ashi, ''Kumeho ayende Filipus kukoye aka kuwane aku yite kuno kukwande, Ame kuna kukenge, ove ghuna shungiri pentjoye munda yashitondo shaGhukuyu.'' ⁴⁹ Nataniyeli aghamba weno ashi, ''Murongi, ove Mona Karunga! Ove Hompa wava Israyeli!'' ⁵⁰ Yesus amu limburura naku mutantera weno ashi, ''Ove kuna pura, mukonda yankango dino naghamba weno shi, 'Ame kuna kumono ghuna shungiri pentjoye munda yashitondo shaghukuyu,' mbyo ghuna kupura nkango dande ndi? Ove ngaghu kenga viruwana vyavinene ovyo nganu ruwana kumeho vyakupita kana pavino.'' ⁵¹ Makura Yesus aghamba weno ashi, ''Ghushili, vyaghushili, naku mutantera weno ashi, anwe ngamu kenga liwiru lina paturuka lina gharuka, ntani shirondero shina katwa muliwiru vaEngeli vaKarunga kuna kuronda muliwiru ntani vamwe kuna kusheghumuka vaghurumuka vaye kukwande ame Mona Muntu.''