¹ Makura kuruku rwamwaka murongo nane ame anu yendi nka ku Yerusalemu na Baranabasi, makura anupitura nka na Titusi. ² Ame kwayendire mu konda yalishororo naku ka vatantera Mbudi YaRuhafo oyo nayuvitanga mukatji kavahedana. Anughamba nava mpititi mukaholya-holya, ame kwaruwanine vyaweno mposhi vavo ngava tambure mbudi oyo nayuvitanga - mpo ashi - viruwana vyande kapishi ngavi kare vyamaghoko-ghoko. ³ Ano ngoli na mpili Titusi, ogho a kaliro name wamu Gereka, kapi vamu tininikire vamu ruwane vyavanda. ⁴ Vakareli vavipempa kwayire mu mbunga yetu vakenge naku nomena viruwana vyetu vyamwaYesus Kirisitusi. Vavo kwashanine vatuture vapika, ⁵ ano ngoli atwe kapi twa limburukilire ku kwavo pashirugho osho, mposhi Mbudi YaRuhafo yaghushili ngayi kare mu mwenu. ⁶ Ano ngoli vampititi (mwa kehe mapundi ogho vakalire nagho vavo kwato mulyo ku kwande, Karunga kapi ahangura vantu)- vampititi, vamapundi ghamanene, kapi vawederelire ko kehe shino ku mbudi yande. ⁷ Nane ngoli, vavo kwamonine ashi Ame kwantuma nganu tware Mbudi YaRuhafo yayiwa kwavo vapira kuruwana vyavamba, ntani Peturusi kwamutuma nga tware Mbudi YaRuhafo yayiwa kwavo varuwana vyavamba. ⁸ Ano ngoli Karunga, ogho aruwanango namu Apositoli Peturusi waku twara Mbudi YaRuhafo ku vantu ovo varuwana vyavamba, ndje nka aruwanango name Paulusi waku twara Mbudi YaRuhafo ku vahedana. ⁹ Ano ngoli Yakopu, Kefasi ntani Yohanesi ovo vakaliro ngundi mu mbunga yaKirisitusi, opo vakengire naku dimburura ghushwi wankenda ogho atapa ku kwande Hompa Karunga, vavo ava tapa nkondo na lipulitiro ku kwande ntani naku kwaBaranabasi yamukuruwana ghukareli Karunga ku mbunga. Navo ava tapa lipulitiro ashi atwe ngatu tware mbudi ku vahedana ntani vavo ngava tware mbudi ku vantu ovo varuwana vyavamba. ¹⁰ Vavo kwashungida tupu ku kwetu ashi tuna hepa kupakera mbili vantu varuhepo, ntani ame kwatokomena kare ku ruwana vyaweno. ¹¹ Ano ngoli Kefasi opo ayire ku Antiyoko, ame kwamutantera kumeho ntani kwashweninine ghukaro wendi waghudona kumeho yendi. ¹² Ovino kwashorokire weno, kumeho Yakopu ayende kuno ku shirongo, Kefasi kalyanga kumwe navahedana. Ano ngoli opo vayatikire vano vakafumu mu shirongo, ghuye kwashayeka kulya na vantu vahedana nava hedana. Ghuye kwakalire naghoma na vantu vaku tininika vahedana ashi vavaruwane vyavya vamba. ¹³ Ntani nka vaYuda navo ava kupakerere mu kushwaghura vahedana. Ntani Baranabasi naye aku pakerere kumwe navo vashwaghure vahedana. ¹⁴ Opo na kengire ashi ghukaro wavo kapi ghuna hungama ntani kapi vana ku kwama Mbudi YaRuhafo yaghushili, ame na tantere Kefasi kumeho yavantu navantje weno ashi, ''Nkene shi anwe vaYuda kapi mwakwamanga veta nanwe kwafana ghukaro yira vahedana, ntani mbyo muna kutininika vahedana vakwame mpo yavaYuda?" ¹⁵ Atwe kwatu shampurukira mu mpo na mulira lya vaYuda ntani atwe kapi shi vahedana vandjo; ¹⁶ ntani atwe twayiva nawa-nawa ashi kwato muntu waku hungama mukonda yaviruwana vyendi vyaku kwama veta yaMoses nane ngoli kupitira mulipuro lyaku tunda mwaYesus Kirisitusi mposhi ngatu wane lipuro lya ghuhunga lya Yesus Kirisitusi, kapi shi lyaku tunda ku viruwana na veta. Kwato muntu waku hungama mukonda yaviruwana vyendi ntani naku kwama veta. ¹⁷ Ndi weni, nkene shi atwe kwahungamena mwaKirisitusi, atwe vantu vandjo vaku kwama veta, vyaweno kutanta ashi Kirisitusi kwahora ndjo? Hawe kapi shi ghushili! ¹⁸ Nkene nganu kwama veta odo kanu kwamanga pa kuhova, vyaweno ndi ngavi moneka ashi ame muntu waghumuwrunde ntani mutjoli veta. ¹⁹ Mukonda yakulimburuka ku veta ame mbyo na fa ku veta, mposhi nganu kare na liparu lyaku karera Karunga. ²⁰ Ame kwampampara kumwe na Yesusi Kirisitusi pa Shikuruse. Pa weno kapi shi ame naku paruko, nani ngoli Kirisitusi ndje ana kuparuko ogho akaro mu mwande. Olino liparu lyapa nyama na kuparuka pa weno lyaku tunda kulipuro lya Mona Karunga, ogho akaro na shihoro shashinene ku kwande mbyo aku tapa mwene ku ndjo dande. ²¹ Ame kapi na shwena nkenda yaKarunga, ntani nkene shi ghuhungami kughuwana kupitira mu veta, kutanta ashi Kirisitusi nkwandi kwafa tupu maghoko-ghoko!