¹ Paulus, mupostoli waKristus Yesus kupitira mulishano lyaKarunga, kuvantu vavapongoki vaKarunga vamuEfeso, ovo vapuliliro mwaKristus Yesus. ² Ghufenkenda kukwenu ntani mpora yaKarunga shenu ntani Hompa Yesus Kristus. ³ Kumwe Karunga ntani shaHompa wetu Yesus Kristus vamushamberere, ogfho atungiko atwe nakehe litungiko lya pampepo mumavango ghamuliwiru mwaKristus. ⁴ Karunga atuhorowire atwe mumwendi kutundilira kulitateko lya ghudyuni, ashi ngatupongokere ntani ngatupire ghundyoni kushipara shendi mushihoro. ⁵ Karunga kwatuwapayikira atwe mukukara vana kupitira mwaYesus Kristus, kutwara kughuwa wamwene mulikuyuvo lyendi. ⁶ Ghupingwa wetu kwatundamo lishamberero lya ghufenkenda waghuyerere olyo atupa atwe mwaghumwe ghuye ahora. ⁷ MwaYesus Kristus atwe twawana liyovoko kupitira muhonde yendi ntani nalighupiropo lyandyuo detu, kutwara kumaghungagho ghaufengenda wendi. ⁸ Ghuye kwavukitire ghuno ghufenda kukwetu naghukonentu naghuntje ntani nandunge. ⁹ Karunga ayivitire kukwetu virughana vyavinene omo avi shanena mwene, kutwara kovyo vyamuhafitiro mwene, ntani ovyo ghuye arughanitire mwaKristus, ¹⁰ namafanayiko ghamawapayiko ghapashirugho shakuyulilira, mukuyita vininke navintje kumwe, vininke navintje vyamuliwiru ntani napalivu, munda yamutwe ghumwe, nampili Kristus. ¹¹ MwaKristus atwe atuhorora tukare vapingwa. Mumafanayiko kutwara kulighano lywendi ogho arughanango navintje kutwara kushitambo shomo avi shanena mwene. ¹² Karunga atu hororwire atwe tukare vendi, atwe twahovo kuhuguvara mwaKristus, ngatuvure kukara vashambereli vaghuyerere wendi. ¹³ MwaKristus, anwe nanwe, opo mwayuvire nkango yaghushiri, mbudi yayiwa yaliyovoko lyenu, anwe mwapulire mumwendi ntani vamuyudire namutwenyedeli Mpepo Mupongoki, ¹⁴ ogho twawana mughupingwa wetu dogoro liyovoko lyaghuwo, kumashamberero ghaghuyerere wendi. ¹⁵ Mukonda yavino, kutunda opo nayuvire kuhamena lipuro lyenu mwaHompa Yesus ntani shihoro shenu shakuvantu vavapongoki navantje vaKarunga, ¹⁶ Ame kapi nashayeka kupandura Karunga mwarwenu opo ame namutwenyaghuranga mundepero dande. ¹⁷ Ame kuraperera ashi Karunga waHompa wetu Yesus Kristus, she waghuyerere, ngatapa kukwenu mpepo yaghukonentu ntani lihororo lya mundunge dendi. ¹⁸ Ame kuraperera ashi mantjo ghadimushima denu vaghatemite, ashi anwe ngamuyive lihuguvaro olyo amuyitira anwe ntani namaghungawo ghaghupingwa waghuyerere mukashi kanavantje vantu vakupongoka vaKarunga. ¹⁹ Mundapero dande Ame kupura ashi anwe muyive vyakupira kushetakanita ghun ankondo wewndi atuhamitira atwe ovo twapuro, kutwara kuviruwana vyaghunankondo waghuyerere. ²⁰ Ovino ngo nka shimpe ghunankondo wakukufana ntani nakumushungidika kurulyo rwendi mumavango ghamuliwiru. ²¹ Ghuye kwashungikire Kristus ghure kuwiru yaveta nadintje ntani ghuna nkondo naghupangeli naghupititiri, ntani kehe lidina olyo varukire. Kristus ngapangera, kapishi momu tupu mushiruwo shino, nani ngoli namu shiruwo osho ngashiyoko. ²² Karunga kwatura vininke navintje mulikwatakqano munda yampadi daKristus ntani amutapire ghuye kuNkirishe yira mutwe muvininke navintje. ²³ Nkirishe ndyo rutu rwendi, liyuliliro lyendi ogho ayudango navintje munavintje.