¹ Makura mupristeli wamunene amu pura ashi, ''Odino nkango vana kughamba ne daushili ndi?'' ² Stefanus avalimburura ashi, ''Vakurona ntani nanwe vaghunyande, tererenu kukwande: Karunga waghuyerere kwamonikilire kwanyaku lyetu Aburahamu ghuye shimpe mushirongo shamesopotomiya, kumeho yaku diruka aka tunge mushirongo shaHarani; ³ ghuye amu tantere ashi, 'Tunda mushirongo shenu ntani tunda kuva likoro lyoye ghuyende kushirongo osho nganu kuneyeda.' ⁴ Makura mpo atundire mushirongo shavaKalidiya ayende aka tunge mushirongo shaHarani; ghuye momo, vashe avadohoroka, makura Karunga amu tantere adirukire mushirongo, shino muna kara weno. ⁵ Ano ngoli Karunga kapi atapire livango nampili lya lididi lyaku tika pampadi yendi ashi likare ghupingwa wendi, ani hawe. Nane ngoli ghuye kwatapa matwenyedero - kwaAburahamu ghuye shimpe kapi ana kara namwanuke pashirugho shino - anongoli ghuye kwatwenyedera ghupingwa kukwendi washirongo kumwe naruvharo rwendi nga shikare shavo. ⁶ Karunga kwamutantilire dino nkango daweno mukonda ayivire ashi, vantu varuvharo roye ngava katunga muvirongo vyapeke vyahana vyavo, makura vantu vamo muvirongo ngava kava weka ngava kakare mughupika ntani ngava kava hepeka mwamu dona ghure wamwaka mafere mane. ⁷ Karunga atanta ashi, 'Muhoko oghu ngauva hepeko naku vatura ghupika,' Karunga ngaghu pangura naku tapa matengekero kukwavo, ntani ngava ghupamo vatundemo omo mushirongo ngava kavyuke kushirongo shama twenyidiro ngava karaperere naku ruwana ghukali waKarunga.' ⁸ Makura Karunga atantere Aburahamu vamu ruwane vyampo yavamba shikare shiyivito naligwanekero nalikukwatakano kumwe naye, Abraham naye ayita monendi Isaka, makura amu ruwana naye vyampo yavamba muliyuva lya utano nautatu; Isaka naye ayita monendi Yakopu, ntani Yakopu naye ayita vana vendi murongo navaviri vavarume. ⁹ ''Ovano vakurona vetu kwakalire namfudu kwaYosef, makura avamughulita kuva Egipite; Ano ngoli Karunga kwakalire kumwe naye ¹⁰ makura ghuye amu popere kuma udito naghantje ogho agwanekilire nagho. Karunga kwatapire ushwi wankenda naukonentu kwaYosef mposhi Hompa Farao washirongo shaEgipite akare nashihoro kukwendi, ghuye amu tura akare mupangeli washirongo nashintje shaEgipite rambangako naMbara yendi nayintje. ¹¹ Makura upyakadi nalirumbu lya linene alingene muEgipite naKanani nayintje, vakurona vetu kapi vavhulire kuwana ndya mushirongo shavo. ¹² Yakopu opo ayuvire ashi kuEgipite nko kuna karo mahangu, makura atumuko vana vendi rukando rwakuhova. ¹³ Muruyendo rwavo rwauviri Yosef ntani ashorokire aku tongonone kuva kuru-vendi avamudimburura, makura Farao ntani ana kuyiva oku atundilira Yosef. ¹⁴ Makura Yosef atumu vakuru vendi vaka tantere vashe Yakopu nalikoro lyendi navantje ngava yende kushirongo shaEgipite, shivaro shavantu navantje kwatikikire kudimurongo ntano-na mbiri navantu vatano. ¹⁵ Makura Yakopu ayendi aka tunga kuEgipite, dogoro aka dohoroka, kumwe navana vendi navantje. ¹⁶ Vimpu vyavo avavitwara kuShekemu vaka vavhumbike muntoko yalivhu olyo aghulire Aburahamu navi maliva vyaSiliveli kuvana vaHemoro vamu Shekemu. ¹⁷ ''Opo shakalire shirugho shama twenyedero kuna kutikiliramo, osho vatwenyedelire Karunga kwaAburahamu, shivaro shavantu vendi muEgipite navo avavhuka unene vaku wederere, ¹⁸ makura aku kwama Hompa wapeke kughuhompa wamu Egipite, oghuno Hompa ghuye kapi ayivire Yosef. ¹⁹ Ghuye kahepe-kanga vantu vamuhoko wetu, katini-nikanga vakadi vature vakeke mumwi vafe kumwi ntani ghuye katini-nikanga vakadi vavhukumine vakeke mumukuro vafe. ²⁰ ''Paruvede runo mpo vashampurukire Moses; ghuye kwakalire mwanuke wamuwa unene kushipara shaKarunga, makura ghure wamakwedi matatu avamutura vamurere mumundi wavashe. ²¹ Opo vayendire vaka muhoreke pandye, makura mona Farao wamukamali aka muwana amughupu aka murere akare yira monendi waku yita mwene. ²² Moses aku rongo marongo naukonentu naghuntje wava Egipite, ntani ghuye kwafumanine unene mukonda yankango daukonentu ntani naviruwana vyendi vinene. ²³ ''Moses opo akalire namwaka dimurongo ne, makura akara narutjima ayendi aka dingure ko muhoko wendi wava Israeli. ²⁴ Opo akenga muntu wamu Israeli kuna kumuhepeka, Moses makura amu popere adipaya ghuno murume wamu Egipite: ²⁵ ghuye kwaghayalire ashi vaghunyendi kuva dimburura ashi Karunga kuna mutumu aya vapopere avaghupe mughupika, ngoli kapi vavo kapi vavidimburulire. ²⁶ Liyuva lyaku kwamako awana varume vaviri vava Israeli kuna kurwana makura avagaghununa avatantere vakupe mbili, ghuye avatantere ashi, ''Anwe varume, anwe vantu namunyendi vinke muna kurwanena muku remeke? ²⁷ ''Ano ngoli oghu aruwanino udona kwaghunyendi makura ayundura Moses amu tantere ashi, ''Are oghu ana kuturo ghukare mupangeli ntani namupanguli wetu? ²⁸ Ndi walye kuna shana ghundipaye name yira momu ka udipaya ghunya murume wamu Egipite yona?' ²⁹ Moses opo ayuvha dino nkango makura aduka atjwayuka; aka kara muna virongo mushirongo shaMidiyani, ghuye aka kwara aka yitiramo vanuke vaviri vavamati. ³⁰ "Kuruku rwamwaka dimurongo ne, muEngeli waHompa amonekere Moses mumburundu kuNdundu yaSinayi mushishwa shaku twera mundiro mara ngoli naku veva shi. ³¹ Moses atetuka unene, opo amonine shishwa shaku twera mundiro; makura ashwena papepi aka shimone nawa, makura liywi lya Hompa ali ghamba kukwendi ashi, ³² 'Ame Ame Karunga wavakurona voye, Karunga waAbraham, naIsaki ntani naYakopu.' Makura Moses atameke kukankama kapi nka ashanine kukenga kushishwa. ³³ ''Hompa amu tantere ashi, shutura ko nkaku kumpadi doye, lino livango ghuna yimana lya pongoka. ³⁴ Ame namono ruhepo narunyando rwamuhoko wande muEgipite; ame nayuvhu nkugho yavo naliywi lyavo omo vana kulira, makura weno ame kunaya nughurumuke nuka vayowore mughupika; weno yakuno, ame kuna kuku tuma ghuyende kuEgipite.' ³⁵ "Moses ndyeghu vashwenine pakuhova, opo vaghambire ashi, 'Are ana kuturo ghukare mupangeli ntani namupanguli wetu? - ghuye ndye atumine Karunga akare mupangeli wavo namuyogholi wavo. Karunga kwamutumine Moses kumwe namu Engeli oghu aghambiro kukwendi mushishwa shaku twera mundiro. ³⁶ Moses ndye avaghupiromo vatunde mushirongo shaEgipite, ghuye kwaruwanine vitetu vyankondo naviyivito mushirongo shaEgipite namulifuta lya ligeha, ntani namumburundu ghure wamwaka daku tika kudimurongo ne. ³⁷ ''Ghuno Moses ndye atanteliro mbunga yavaIsrael ashi, 'Karunga nga toghorora muporofete waku tunda mumbunga yenu, ngakare muporofete waku fana yira me'. ³⁸ Ghuno murume Moses ndye ghumwe apongiro kumwe nambunga yavantu mumburundu; ntani ndye aka ghambiro namu Engeli kundundu yaSinayi, ghuye ndye atapiro mbudi kuva kurona vetu, ntani ghuye ndye vakapire dimuragho daHompa makura adi tapa kuva kurona vetu vavo avaditapa kukwetu. ³⁹ Ano ngoli vakurona vetu kapi vashanine kulimburuka kukwendi; vavo kapi kava pakeranga mbili ovyo kava tanteranga, vavo kwashanine shimpe kuvyuka kuEgipite. ⁴⁰ Vavo avatantere Aroni ashi, 'Turuwaneneko vaKarunga vatu pititire kumeho. Oghuno Moses, oghu atughupiro muEgipite, kapi tuna yiva ashi kuni nko ana kara ntani vinke vina ka shoroko kukwendi. ⁴¹ Vavo avaruwana lifano lya ntana yagorodo mumayuva ngogho avadyambere kuva Karunga vavimpempa, makura avashamberere viruwana vyamaghoko ghavo vavene. ⁴² Karunga makura avapa mughongo ntani avashuvu vatongamene liyuva naka kwedi nambungururu daku liwiru mposhi ditikemo dino nkango vatjanga vaporofete ashi, 'Anwe vaIsraeli? Opo kamu dipayanga vikorama mudyambe ndjambo denu mumburundu ghure wamwaka dimurongo ne, odino ndjambo denu ne ushili kukwande kamudi dyamberenga ndi? ⁴³ Anwe mbyo mwatambura muruwane ntembeli yaMoleki ntani nambungururu daKarunga wenu Rafani mbyo kamu dishimbanga muyende nado kehe kuno, anwe mbyo mwaruwana mafano ghava Karunga venu ovo mwatongamenanga: Ame nganu mughupamo mushirongo shenu nganu mutwara kumavhango ghaku ghure ghamu musheli munya kupitakana virongo vyaBabiloni.' ⁴⁴ ''Vakuro vetu kwakalire nalimbangu lyama kupakerero mumburundu lya umbangi waKarunga, Moses kwali ruwanine lifane yira momu amu tantilire naku muneyeda Karunga, ashi mo ngali fana. ⁴⁵ Kunyima, vakuro vetu, muli pititiro lya Yoshua, vavo avashimbi limbangu lyama kupakerero naKarunga vayende nalyo opo vayendire vaka ghupe shino shirongo tuna kara weno shikare shaupingwa wavo. Hompa Karunga kwaghupire shino shirongo kuva pagani makura avatjidamo atapa shirongo kuva kurona vetu. Makura limbangu lya makupakerero ali kara momuno mushirongo dogoro muruvede rwaHompa David, ⁴⁶ oghu ahungamino kushipara shaKarunga, ghuye ashungida kukwendi ashi ngatunge ntembeli yaKarunga waYacob ngali kare livhango lya ndapero lyava Israeli. ⁴⁷ Ano ngoli Salomon ndye atungiro ntembeli yaKarunga. ⁴⁸ ''Ano Ngoli, Karunga wamu liwiru kapi atunga mundyugho oyo vatunga vantu namaghoko, yira momu tupu vatanta vaporofete ashi, ⁴⁹ 'Liwiru lipundi lya uhompa wande, ntani livhu ghulyatero wampadi dande. Ndyugho yaku fana weni ngaghu vhura kutunga ngayi kare yande? mo ana kutanta nka Hompa ashi, livango lyande lya ghupwiyumukiro kuni nko lina kara po pano? ⁵⁰ Nane kapishi ame nashito navintje mbyo naturapo vininke navintje vikarepo? ⁵¹ ''Anwe vantu kwarunda dimutwe, dimutjima denu dikukutu yira davapagani ntani matwi ghenu ghaku mbandera mupire kuyuva nkango daKarunga, ntani anwe kukanana Mpepo yaKupongoka; yira momu kava ruwananga vakurona venu. ⁵² Muporofete munke ogho vapilire kunyenga naku hepeka vakurona venu? Vavo kava dipayanga vaporofete navantje ovo vahoviro kupita kumeho ovo kava pumbango ndyira yaMuhungami waKarunga ashi mundyira ana kara; makura anwe nanwe mbyo mwaya mudipayire, ⁵³ anwe vantu mwawano veta yaKarunga oyo vatapire vaEngeli kukwenu, anongoli anwe kapi mwalimburuka ntani kapi mwayi tikitamo.'' ⁵⁴ Makura matimbi opo vayuvhire dino nkango, adivakeke unene kumutjima, vavo avagarapa unene makura avakukwetje mayegho kwaStefanus. ⁵⁵ Makura ghuye, murume ayuro Mpepo yaKupongoka, akankuka akenge anwiki kuliwiru, makura amono ghuyerere waKarunga; ntani amono Yesus kuna yimana kurulyo rwaKarunga. ⁵⁶ Makura Stefanus aghamba ashi, ''Kengenu, Ame kuna kumona liwiru lina gharuka, ntani ame kuna kukenga Mona Muntu ghuye ana yimana kurulyo rwaKarunga.'' ⁵⁷ Pa shirugho mpopo matimbi makura avayiyiri naliywi lya linene, makura avakukwata kumatwi, makura avamurundu-mukiri navantje nashitambo shimwe tupu. ⁵⁸ Vavo avamurupwita pandye yashitata makura avamutoghona namawe. Vambangi ovo vamu toghonino makura avashutura vikoverero vyavo avavitapa kwamumati ghumwe walidina Saul avikunge, vavo vamu toghone tanko. ⁵⁹ Vavo kuna kumutoghona namawe Stefanus, ghuye kuna kukanderera kwaHompa ashi, ''Hompa Yesus, tambura monyo wande. ⁶⁰ ''Makura atongamene pangoro aliri naku yiyira naliywi lya kudameka unene ashi, ''Hompa, kapishi ghutape undyoni kukwavo kwavino vana kuruwana.'' Opo amanine tupu kughamba dino nkango, makura awere palivhu afu.