¹ Saul naye kwapandire lidipayo namfa daStefanus. Liyuva ndyolyo mpo vatamikire kutoghona nakuhepeka unene mbunga-kriste yamu Yerusalemu; vapuli navantje avakuhanene kuvirongo vyapeke vyaku Yudeya naku Samaria, nkwandi vaapostoli tupu mbo vakaliromo. ² Varume vamwe vaku tjira Karunga avakavhumbika rutu rwaStefanus makura pamfa dendi avakara liguvo unene ntani avamuliri unene. ³ Saul kwashanine kudyonaura po ngereka nayintje. Ghuye kwayenda tunda mundi yenda mundi angene mundyugho, atoghone naku kwata varume nava vakamali, avatware mudorongo. ⁴ Ano ngoli vapuli ovo vatjwayukiro kuvirongo vyapeke avakatwikira kuyuvita Mbudi yaRuhafo yaku hamena Yesus Kristus. ⁵ Filipus kwayendire kushitata shaSamariya aka yuvite mbudi yakuhamena Kristus kukwavo. ⁶ Mbunga yavantu avaterere unene vakwame nkango odo aghambire Filipus; makura vantu navantje vamu mbunga avakara namutjima ghumwe tupu vayuvhe nkango dendi, ntani napo vamonine vitetu vyavinene ovyo aruwanine. ⁷ Mpepo dadidona adi tundu muvantu vavayingi ovo vakaliro nado, dado adi takuma unene, ntani navirema vyamu ndambo navirema vyaku kushuva-shuva kwaveruka mpopo navantje. ⁸ Vantu vamu shitata shaSamariya avakara naruhafo rwarunene. ⁹ Mushitata mwakalire murume ghumwe walidina Simoni, ghuye karuwananga vitetu naghupure namatura ghendi; ghuye katetukitanga vantu vamu Samariya ntani ghuye ka kutwenyanga mwene ashi ndye Kamana-Kandongo. ¹⁰ Vantu navantje vamu Samaria, kutamekera kwavanuke dogoro kuva kurona, kava kengeranga kukwendi; naku ghamba ashi, ''Oghuno murume kwakara nankondo dakutunda kwaKarunga odo vatwenya ashi daNkunguru.'' ¹¹ Vavo kava tereranga kukwendi mukondashi vavo vapwa kare kupura naku tetuka muviruwana vyendi vyaghupure. ¹² Filipus kwayuvitire Mbudi yaRuhafo yaku hamena untungi waKarunga ntani nalidina lya Yesus Kristus, vavo makura avapura munkango dendi, mpopo tupu navantje varume navakamali avava kushu. ¹³ NaSimoni naye apura, avamukushu ghuye ka karanga kehe pano naFilipus. Ghuye kwatetuka pakumona viruwana vyavinene vyankondo navitetu naviyivito kuna kushoroka. ¹⁴ VaApostoli ovo vakaliro muYerusalemu opo vayuvire ashi vaSamariya vana tambura mbudi yaKarunga, makura avatumuko kukwavo vaPeturusi naYohanesi. ¹⁵ Opo vaka tikire, avakaraperera kumwe nambunga-kriste ovo vatambuliro nkango daKarunga, mposhi vawane Mpepo yaKupongoka. ¹⁶ Pa ruvede runo, Mpepo yaKupongoka yayo shimpe kapi yinaya papavo; vavo kwava kushire tupu mulidina lya Hompa Yesus. ¹⁷ Makura Peturusi naYohanesi avavakambeke mahoko ghavo papavo, makura vavo avawana Mpepo yaKupongoka. ¹⁸ Simoni opo amonine ashi vaApostoli paku kambeka muntu maghoko mpo vatapire Mpepo yaKupongoka, makura naye atapa vimaliva kuva Apostoli. ¹⁹ Ghuye aghamba ashi, ''Name mpenuko dino nkondo, mposhi kehe ghuno nganu kambeka mahoko ghande naye ngawane ko Mpepo yaKupongoka.'' ²⁰ Ano ngoli Peturusi amu tantere ashi, ''Nove navimaliva vyoye ngamu yenda kumwe ngamu kadyonauke mumundiro wanaruntje, ove kuna kughayara ashi ushwi waKarunga kughu-ghura navimaliva. ²¹ Ove kwato kuwana livhango mwavino ntani ove kwato kuwana upingwa mwavino viruwana, mukondashi mutjima ghoye kapi wahungama kushipara shaKarunga. ²² Kushighure ghutunde kughudona waviruwana vyoye, ntani kanderera kwaHompa, mposhi walye kwakughupirapo kumaghayaro ghoye ghama dona ghamu mutjima. ²³ Ame kuna kukumona ashi ove kuna kara namfudu nanyengo ntani naghurunde ove mbyo wakara mumango yandyo.'' ²⁴ Simoni alimburura naku ghamba ashi, ''Ame kuna kushungida kukwenu mukanderere munkundike ame kushipara shaHompa, mposhi ovi muna ghamba vyakuhamena kukwande navintje kapishi ngavi shoroke kukwande.'' ²⁵ Opo vamanine kutapa umbangi makura avayuvita nkango daHompa, opo vavyukire vaPeturusi naYohanesi kuYerusalemu, makura avayuvita Mbudi yaRuhafo mudi mukunda dadi yingi damu Samaritani. ²⁶ MuEngeli waHompa atantere Filipus naku ghamba ashi, ''Shapuka weno yenda kughucuma kushitaura shaku tunda kuYerusalemu shighurumuke kuGasa.'' (Shino shitaura shapito mumburundu.) ²⁷ Filipus makura ashapuka aka yenda. Mpopo tupu, akenge, murume walikuto waku Etopiya, lirenga lya linene lya Hompa washirongo, Hompa wamukadi walidina Kandasi. Lino lirenga kwakalire nashiruwana shaku pungura vimaliva naushwi nalimona lya Hompa mushirongo. Ghuye kwayendire kuYerusalemu aka raperere naku tongamena ngoro kwaKarunga. ²⁸ Mundyira yendi yaku kavyuka ghuye kwashungilire mulitemba lya Karu-kara, makura apenuna mumbapira yamu Porofete Isaya kuna kuvarura. ²⁹ Mpepo yaKarunga ayi tantere Filipus ashi, ''Yenda ghuka kare pepi nalitemba lya Karu-kara.'' ³⁰ Makura Filipus aduka ayende kukwendi, ghuye ayuvhu omo ana kuvarunga mbapira yamu Porofete Isaya, makura amu pura ashi, ''Kuna kuvi yuvha tupu ove ovyo ghuna kuvarura ndi?'' ³¹ Lirenga alimburura ashi, ''Omo nuvi yuvha ne weni, nkene shi kwato oghu ana kudi fwatururo?'' Ghuye makura ayita Filipus arondo mulitemba avashungiri kumwe. ³² Matjangwa ogho avarulire lirenga lya Hompa wamu Etopiya lino ashi, ''Ghuye kwamu twalire yira ndywi vana kutwara kukatomeno vaka yidipaye, ndywighona paku yidyupa huki dayo yayo kuna mwena teyete, kwato kuyashuka kanwa kendi. ³³ Ghuye kwamu dina mbyo vamu pangulire mwamudona. Kwato wendi ogho akaliropo ashi akare mbangi kwavi vyashorokiro kukwendi? Ghuye kwamu dipayire vafupipite liparu lyendi lyapa ntunda yalivhu.'' ³⁴ Murume walirenga apura Filipus ashi, ''Na kukanderere, ntantere oghuno muporofete kuna kughamba vyaku hamena kwamwene ndi, vyaku hamena kwamuntu wapeke?'' ³⁵ Filipus makura atameke kumuronga lino litjangwa, makura ayuvita Mbudi yaRuhafo kukwendi ntani atapa marongo kukwendi ghaku hamena Yesus. ³⁶ Vavo kuna kuyenda mushitaura, makura avawana mema makura lirenga aghamba ashi, ''Kenga, mema oghano ana karo pano. Vinke vinkwato ovyo ghupire kunkusha nuwane liyoyero?'' ³⁷ ''Filipus amu tantere ashi, "Nkene shi ove ghuna pura namutjima ghoye naghuntje, ame kuvhura kukukusha ghuwane liyoyero.'' Murume walirenga alimburura ashi, "Ame napura ashi Yesus Kristus Mona Karunga''''. Matjangwa ghamwe ghakare mwato yino velise 8:37. ³⁸ Murume walirenga aghamba vayimike litemba lya Karu-kara. Vavo vaviri avadumpukamo mulitemba avayendi mumema, navantje makura Filipus amukushu mumema awana liyoyero ghuno murume walirenga lya Hompa. ³⁹ Tupu vatundamo mumema, Mpepo yaHompa ayi mudamu Filipus ayi mutwara, ghuno murume walirenga kapi nka amu monine, anongoli murume walirenga ayendi mundyira yendi naruhafo. ⁴⁰ Makura Filipus aka moneka kushirongo shaAsidodo ana kara, ayendi ayuvite Mbudi yaRuhafo muvitata navintje dogoro aka tika kuKasareya.