¹ Kutunda pano Paulus atundu mo muAtena ayende kuKorinte. ² Ghuye aka gwanekera namurume wamu Yuda walidina Akwila, wamvharera yamu Pontusi, ghuye ntantani tupu ka tunda kuRoma-Italiya namu kamali wendi Prisila, mukondashi Klaudius Hompa waRoma kwatantilire vaYuda navantje vatunde mo muRoma. Makura Paulus ayendi kukwavo, ³ mukondashi naye viruwana vyendi vyaku ruwana tende, makura aka kara navo avakaruwana viruwana, vyaku tenda tende. ⁴ Paulus kayuvitanga kehe pano muSinagoge kehe liyuva lya Sabata, kuva Yuda navaGereka ashi ndi vapure. ⁵ Opo vayatikire vaSilas naTimoteusi vatunde kuMakedoniya, avayawana Paulus ghuye kuna kuyuvita kunkango naghupampi nankondo, antape umbangi kuva Yuda ashi Yesus ndye Kristus. ⁶ VaYuda avashwena kutambura vapure mbudi yendi avatameke kumu shwaghura naku mutuka, makura Paulus aku kumuna mbundu kuvi dwata vyendi aghamba ashi, ''Honde yenu yikare padimutwe denu naghumwenu; Ame kwato ngoli undyoni. Kutunda pano ame kuna kuyenda kuva Hedana.'' ⁷ Ghuye makura atundu mo, ayendi mumundi wamurume walidina Titius Yustus, murume waKarunga. Mundi wendi kwakalire pepi naSinagoge. ⁸ Ano ngoli Krispus, mupititiri waSinagoge, ghuye apura mwaHompa, kumwe nalipata lyendi nalintje; ntani navantu vavayingi vamu Korinte ovo vayuviro yino mbudi avapura avavakushu. ⁹ Hompa atantere Paulus kumatiku mulimoneko ashi, ''Kapishi ghukare naghoma, twikira kuyuvita yino mbudi kapishi ghushayeke ghumwene teyete. ¹⁰ Ame nove nakara, ntani kwato oghu avhuro kukukwata parutu roye, mukondashi ame nakara navantu vavayingi unene muno mushitata.'' ¹¹ Makura Paulus akara momo ghure wamwaka ghumwe namakwedi mantano na-ghumwe, muku yuvita nakuronga nkango daKarunga kukwavo. ¹² Makura opo akalire Galiyo mupangeli wamu Gereka-Akayiya, vaYuda avakuyongo avakuyuvhu kumwe vahomokere Paulus vamu kwate vamu tware kumpanguro; ¹³ vavo avaka ghamba ashi, "Oghuno murume kuna kuronga vantu vatongamene Karunga munkedi yapeke yaku kulimba naveta yava Yuda. ¹⁴ Opo ashanine Paulus kughamba, makura Galiyo atameke kughamba atantere vaYuda ashi, ''Anwe vaYuda, oghuno murume ashi ndi kuna dyono kuveta yava Roma, ame ndi kunuvhura kuterera kukwenu kwakehe vino mughamba. ¹⁵ Ano ngoli vino vyaku hamena kumpo yenu naveta yenu nalipuro lyenu naviruwana vyenu ntani namadina ghenu, kupangurenu naghumwenu. Ame kapi napanguranga vyaweno.'' ¹⁶ Galiyo avatjidamo vatunde mo mulivhango lya mpanguro. ¹⁷ VaGereka makura avakwata Sostenes mpopo, mupititili waSinagoge, avamutoghona momo mulivhango lya mpanguro. Ano ngoli Galiyo nambili ko shi ghuye kwanavintje vyashorokiro. ¹⁸ Paulus, kwakalire mayuva ghamayingi unene muKorinte, makura aku gaghunuka nava vaghunyendi ayende yamema kuSiriya kumwe naPrisila ntani naAkwila. Kumeho vashapuke muruyendo vayende yalifuta, kuKenkereya, Paulus atete huki damu mutwe wendi mukondashi ghuye kwaghanine mughano. ¹⁹ Opo vaka tikire muEfeso, Paulus ashuvu Prisila naAkwila, ghuye aka yenda muSinagoge aka ghambe navaYuda. ²⁰ Vavo avashungida Paulus akare kumwe navo mayuva ghamayingi, ghuye ashwena. ²¹ Opo ashapukire aka yende avarekere, naku ghamba ashi, ''Nkeneshi Karunga ana vipanga ame nganu kavyuka nka kuno kukwenu.'' Makura ashapuka atundu muEfeso aka yenda yamema. ²² Opo aka tikire kuKesereya, aka kanduka aka kukunde nambunga Kriste muYerusalemu ntani aka ghurumukire kuAntiyokiya. ²³ Ghuye aka karamo shirugho, ntani aka tundiremo apiti muvirongo vyava Galatiya nava Filigiya makura akoreke naku korangeda vapuli navantje. ²⁴ Murume ghumwe wamu Yuda walidina lya Apolo, wamvharera yaAleksandriya, kwayire muEfeso. Ghuye kwayiva kughamba liraka ntani kwayiva unene matjangwa. ²⁵ Apolo kwakalire mushongi wamatjangwa ghaHompa. Ghuye kwayulire mpepo yakuyuvhita nawa, naku shonga nawa-nawa mbudi yaku hamana Yesusi, anongoli ghuye kwayivire unene vyakuhamena liyoyero lya Yohanesi muyoyi. ²⁶ Apolo ka shonganga na nkondo ntani kayuvhitanga naghu pampi muSinagoge ahana ghoma. VaPrisila naAkwila opo vamuyuvhire omo ana kushonga, makura vavo avamuyita aye kumundi wavo avaya mushongo matjangwa nakumuneheda ndyira yaKarunga yauhunga. ²⁷ Opo ashanine kuyenda ku Akayiya, vaghunyendi avamu korangeda avatjanga mbapira yiyende kuAkayiya yakuva shungida vamutambure. Opo aka tikire, ghuye aka tapa mbatero yayinene kuvapuli mukonda yaghufe-nkenda waKarunga. ²⁸ Apolo kwayuvhitire mbudi yankondo unene kuvaYuda, muku vaneheda matjangwa omo atanta ashi Yesus ndye Kristus.