¹ Vavo kwayendire vapiti muvitata vyamu Amufipolisi namu Apoloniya, dogoro avaya tiki mushitata shaVakaTesaronika, omo yakalire Sinagoge yava Yuda. ² Muliyuva lya Sabata, Paulus ayendi, aka yuvita naku ronga matjangwa yira momu aruwananga nakare, avaneyede ashi Yesus ndye Kristus, ghuye kwava rongire ghure wavi vike vitatu. ³ Ghuye kwarongire matjangwa kumwe naku faturura ashi vyakalire hepero kwaKristus akare murunyando namu mahepeko ntani ghuye aka vhumbuka nka mumfa. Ghuye avatantere ashi, ''Oghuno Yesus naku yuvita kukwenu weno ghuye ndye Kristus.'' ⁴ VaYuda vamwe adi vagumu dino nkango kumutjima avapura avakupakerere naPaulus naSilas, kuturako nambunga yayinene yavantu vaku ghamba liraka lya Rugereka navo avapura, ntani nambunga yavagholikadi vavayingi kumwe nava mpititiri vavo. ⁵ Ano ngoli vaYuda vakupira kupura, avakara namfudu yayinene, avapongeke varume vavarunde vakurenda-renda vatunde kumavhango ghama ghulitiro, avapongo mbunga yayinene, makura avayita ndyorongani mushitata. Vavo avahomokere mumundi waYasoni, vashane Paulus naSilas varupukemo mumundi vaye kukwavo. ⁶ Ano ngoli kapi vava waninemo, makura avakoko Yason navaghunyendi vavatware kumeho yavampititi vamu shitata, vavo kuna kulira ashi, "Vantu ovo vayito ndyoro-ngani mughudjuni weno vana yatiki nakuno kukwetu. ⁷ Ovano varume ghuna tambura ove Yason vavo kwakulimba nampo yetu naviruwana naveta yaHompa waRoma walidina Kayifasa; vavo kwaghamba ashi mpwaliko Hompa wavo wapeke lidina Hompa-Yesus.'' ⁸ Dino nkango kwayitire ndyorangani kumbunga naku vapangeli vamu shitata opo vadi yuvire. ⁹ Vapangeli avatengeke Yason navaghunyendi vafute vimaliva makura avatundumo mumango, avava shuvu vaka yende. ¹⁰ Matiku ngogho vaghunyendi avava tumu wangu-wangu Paulus naSilas vayende kuBereya. Tupu vaka tikire, avakayenda muSinagoge yava Yuda. ¹¹ Vantu vamo kwakara nambili unene kapishi yira vamu VakaTesaronika, vavo avatambura nawa dino nkango davo mumutjima, avadikona-kona namatjangwa kehe liyuva vadi kenge nkene shi ushili mo ngoli. ¹² Vantu vavayingi avatambura dino nkango vakare vapuli mukonda yamarongo ghaPaulus, kumwe navantu vakamakuto vaku ghamba RuGereka varume vavayingi navakamali. ¹³ VaYuda vamu VakaTesaronika opo vayuvire ashi Paulus mpwali kuna kuyuvita Mbudi yaruhafo na nkango daKarunga kuBereya, vavo avayendimo vaka kuyaghuke vantu naku yita ndyorongani kumbunga. ¹⁴ Mpopo tupu, makura vaghunyendi avatumu Paulus ayende kuruha rwalifuta, anongoli Silas naTimoteusi avakara momo. ¹⁵ Vantu ovo vayendiro naPaulus avamu twara kwaghure unene dogoro aka tika kushitata shaAtena. Tupu vaka vyuka vaka tike kuBereya, Paulus atumu yiywi ashi vaSilas naTimoteusi vayende kukwendi pawangu-wangu. ¹⁶ Paulus ghuye mushitata shaAtena kuna kuterera vaghunyendi, mpepo yendi ayi patakana mumutjima wendi, paku mona shitata omo shayura mafano ghava Karunga vavimpempa. ¹⁷ Ghuye kayendanga kehe pano muSinagoge aka ronge vaYuda navaGereka ovo vakarerango Hompa Karunga, ntani ghuye kayendanga kumavango ghamaghulitiro aka yuvite mbudi kwavo vakaromo. ¹⁸ Makura Paulus agwanekere navarongi vamwe vavakonentu vamu Epikureya ntani navo vamu Sitoya. Varongi vamwe avamupura ashi, ''Vinke ana kushana kughamba ghuno muntu wakupira kukuronga?'' Ovano vamwe avalimburura ashi, "Ghuye kwamu tuma aya shane vantu ovo vakarerango vakarunga vapeke-peke,'' mukondashi ghuye kwayuvitanga Mbudi yaRuhafo yaku hamena kwaYesus namfa dendi nalivhumbuko lyendi. ¹⁹ Vavo avamukwata Paulus avamu twara kulivhango olyo vatwenyanga ashi Areyopagus kutanta ashi livhango lyaku ponga pashigongi, makura avamupura vapangeli ashi, "Natwe kuna shana kuyuvha marongo ghoye ghamape ogho ghuna kuronga vantu nta ntani? ²⁰ Ove kuronga marongo ogho twapira kuyuvha rumwe. Atwe kuna shana ghushingonone tuyive ovyo ana kutanta.'' ²¹ (Weno vantu navantje vamu Atena ntani nava ntunda virongo ovo vatungomo mbyo tupu vana kughamba ndi mbyo tupu vana kuterera, vyaku hamena yino mbudi yayipe.) ²² Paulus ayi mana mukatji kavo mulivhango lya vigongi lya Areyopagus aghamba ashi, ''Anwe varume vamu Atena, ame kuna kumu mona ashi anwe vakareli vavaKarunga vene-vene. ²³ Ame kuna dingura mavhango naghantje mbyo namono naku wana mavhango ghenu ghaku pongoka omo mwatongamenanga vaKarunga venu ntani mbyo nawana vidyambero vyenu, vimwe kwavi tjanga ashi, "MFUMWA KWA KARUNGA WAKU PIRA LIDINA." Anwe kutongamena kuva Karunga ovo mwapira kuyiva, weno ame kunaya nuya muronge vyaku hamena kukwavo. ²⁴ Karunga mushiti waghuno udyuni, ghuye ndye Hompa waliwiru nalivhu, ntani kumwe nanavintje ovyo vyakaromo, ghuye kapi akara muntembeli oyo vatunga namaghoko ghavantu. ²⁵ Ntani nka ghuye, kwato osho ahepa osho varuwana namaghoko ghavantu, mukondashi ghuye ndye wakutapa monyo namunku wanaruntje kwanavintje. ²⁶ Pa kutanga ghuye kwatokora kare ashi dimuhoko davantu vapalivhu ngadi tunda mumuntu ghumwe tupu, ghuye mbyo aturapo virugho navi nema ovyo ngava paruka namuvirongo omo ngava kara ntani nadi murudi davirongo vyavo, ²⁷ Karunga kwashana ashi vantu vamu shane vamuwane vavo vaye kukwendi. Ghuye kwakara pepi nakehe ghuno. ²⁸ Mukonda yaKarunga atwe mbyo tuna kara namonyo tuparuke, tuyendaghure ntani tukare po, yira momu tupu yina kutanta yino ntjumo yenu ashi, 'Atwe tu vana vendi.' ²⁹ Momu, tuna yiva ashi atwe kwatunda kwaKarunga, kapi vyahungama ashi atwe tufaneke shishwi shaKarunga shifane yira lifano lya Ngorodo, ndi Siliveli, ndi mawe-ogho varuwana nandunge naukonentu wamuntu. ³⁰ Virugho ovyo kava ruwananga ghurunde weno vina kapita, Karunga kuna shana vantu navantje vaku shighure. ³¹ Mukondashi ghuye kwaturapo liyuva olyo nga pangura vantu vamu udyuni mughuhunga kupitira mwaMurume ogho atoghorora. Karunga kwatapa ghukenu naku neyeda kehe ghuno opo amu vhumbulire kughu fe.'' ³² Varume vamu Atena tupu vayuvha vyaku hamena livhumbuko lyava fe, vantu vamwe avatameke kushepa Paulus avaghamba ashi, ''Atwe kuna shana nka ngaghu kavyuke ngaghuya ronge vyaku hamena yino mbudi.'' ³³ Opo amanine, makura Paulus atu ndupo aka yenda. ³⁴ Makura vantu vamwe avapura avaku pakerere naye avakara vapuli, ghumwe mukatji kavo kwakalire Diyonisius waku Areyopagite ntani namukamali walidina Damaris, kumwe nava ghunyavo.