¹ Mbapira yino kuna kutunda kwaPaulusi, apositoli waYesusi Kirisitusi muvipanga vyaKarunga, naghunyendi Timoteusi, yiyende kumbungankirishe yaKarunga oyo yakaro muKorinte, nakuva pongoki navantje ovo vakaro mushirongo shaAkayiya. ² ndi nkenda nampora yaKarunga Shetu naHompa Yesusi Kirisitusi yikare nanwe. ³ Ndi Karunga Sha Hompa Yesusi Kirisitusi. Ghuye Shetu kwayura nkenda ntani ghuye Karunga kutuvatera kehe pano. ⁴ Ghuye ndye wakutuvatera mumaudito ghetu naghantje, mposhi natwe tuvatera ovo vanakaro mumaudito ghakuku shuva-shuva. Atwe kuvavatera nambatero oyo atapa Karunga kukwetu tuvatere vaghunyetu. ⁵ Yiramomo tuna kunyanda natwe kumwe naKirisitusi murunyando rwendi rwarunene, nalishengawido lyetu lyamwa Kirisitusi nalyo mulyo. ⁶ Ano ngoli atwe ntjene shi tunakara mumaudito, kutanta ashi mukonda yambatero naliparu lyetu; Vino mposhi mbatero yenu yitikiliremo mukare nalididimiko nanwe yira lino tunakara nalyo kukwetu. ⁷ Atwe twa muhuguvara ghunene, mukondashi twa yiva ashi munakara namaudito ghaku fana yira ghetu, nanwe nka ngava mushengawida yira momo vana kutushengawida atwe. ⁸ Vaunyetu, atwe kuna shana muyive, maghudito ogho twa gwanikilire nagho mushirongo shaAsiya. Ghudito ghuno twa kalire nagho waghunene ntani waturemikire ghunene kapi twa yivire ashi kuvhura tuparuke. ⁹ Atwe, kwavimonine ashi vino kuna tutokwere mfa. Vino kwashorokire mposhi tupire kukuhuguvara munkondo detu, nani tuhuguvare Karunga, wakuvhura kuvhumbura nampili vafe. ¹⁰ Ghuye ndye atuyogholiro tutunde mumaghudito ghamanene ghamfa, ntani nka ghuye shimpe kuna kutuyoghorora mo mumfa. Atwe nka mbyo shimpe tuna kumuhuguvara ashi ngaka tuyoghorora mo nampili kumeho oko. ¹¹ Ngaviruwana vino yiramomo mutuvatera mundapero denu. Mposhi vantu vavangi ngavatape mpandu mukonda yamatungiko ogho ngavawana ghakutunda kundapero davo. ¹² Atwe kukufumadekera vino ashi: Liywi lyamu dimutjima detu kutapa ghumbangi ashi atwe muno mughudyuni atwe kwakara mo naghupongoki naghukushuki waKarunga, kapishi mughukonentu wavantu, nani mulifero nkenda lyaKarunga. ¹³ Atwe kumutjangera mbyovyo tupu muvhura kuvarura nakuvikwata lighano ¹⁴ yira momo tupu mwayiva vino vyakuruha rumwe tupu, mposhi nanwe ngamukafumanene mumwetu kuliyuva olyo ngakaya Hompa wetu Yesusi, natwe nka ngatu kafumanena mumwenu. ¹⁵ Ame kuna kara nalihuguvaro lino ashi, pamuhovo kuna shana kuya kukwenu, mposhi nga muyawane nkenda yaghuviri. Ame kuna shana kuya mudingura mundyira yande ntani ngani yatwikira kuyenda kuMakedoniya. ¹⁶ Ntani opo ngani kavyuka nitunde kuMakedoniya nganiya mupita nka ngamuya ngwapayikire nkuta yamundyira yande yakuyenda kuYudeya. ¹⁷ Opo nafanikire runo ruyendo rwande, kapi nafanikire nawa? Ame kwatulirepo ruyendo rwande mukutwara pamaghano ghapashinaghuntu, ani tokora kumwe nakughamba ashi "Nhii, nhii" ntani "Hawe, hawe" pashirugho shimwe tupu? ¹⁸ Ano ngoli Karunga muwa, atwe nakuvhurashi tughambe ashi "Nhii ntani Hawe" pashirugho shimwe tupu. ¹⁹ Mbyovyoshi Mona Karunga, Yesusi Kirisitusi ogho twayuvitanga kukwenu name, naSilivanusi, ntani naTimoteusi, kapi atantanga ashi "Nhii" atambe ashi "Hawe." Ano ngoli ghuye kughamba tupu ashi "Nhii" kehe pano. ²⁰ Ghuye kehe pano kughamba tupu ashi "Nhii" kumatutwenyidiro naghantje ghaKarunga, Yesusi ndye ghatikitiliromo matwenyidiro naghantje. Mumwendi motwa taperanga mpandu kwaKarunga, tutante ashi "Ameni." ²¹ Karunga mwene ndye atukoreko atwe kumwe nanwe mulikukwatakano kumwe naKirisitusi mbyo atupongora kumwe nakututura mushiruwana shendi, ²² makura mbyo atura viyivito vyendi papetu ntani mbyo atupa Mpepo yaKupongoka mudimutjima detu, yikoreke ashi matumbwidiro ghendi ngaghatikiliramo. ²³ Naningoli, Karunga mwene ndye mbangi yande mukondashi ghuye ayiva ovyo vyakaro mumutjima wande ashi ovyo napilire kuya kuKorinte kapi nashanine ashi niyamupe runyando mukonda yande. ²⁴ Atwe kapi tunashana kumupangera mukondashi anwe kwakora mumapuliro. Nani ngoli, atwe kuruwana kumwe nanwe mposhi anwe mukare naruhafo, mukonda yamumapuliro ghenu ghakutikiliramo.