¹ Mpo ngoli ashi, pamuhovho kwanavintje, ame kunakumu korangeda ashi mashungido, ndapero, makugwanekero ntani nakutapa mpandu vavirughane vantu navantje, ² kuva hompa ntani nava nana vantje ovo vakaro mulipangero mukurenkera ashi nauvantje tuvure kuparuka mumpora ntani naliparu lyakuvyukilira mughu hungami naghuntje nalikuto. ³ Evi ne viwa ntani vyapulitira kumeho yaKarunga muyogholi wetu. ⁴ Ashana vantu navantje vayoghoke ntani vaye kuliyivho lya ghushiri. ⁵ Kwakara Karunga ghumwe tupu, ntani kwakara muhangakaniti ghumwe tupu waKarunga navantu, ndye Kristus Yesus. ⁶ Akutapire mwene akare shighoyolito kunavantje, mukukara ghungambi pashirugho shaghuhunga. ⁷ Nashitambo ashi ame kwaneyire nikare mutapi mbudi ntani muApostoli- ame ushiri nakumutantera- ame kapi nakumukonga ntani murongi wavanandyo mulipuro namughushiri. ⁸ Mpo ngoli ashi, ame nashana vakafumu mumavango naghantje varaperere nakuyerura maghoko akupongoka pahana ugara ndi po kuku kanyeka. ⁹ Mundyira yimwe nka vakamali vanahepa kudwata mudwato wakuwapera, nalikudidipito ntani nakukupangera naghumwavho, kapishi nahuki dakukutakera ndi po ngorodo ndi po vikundjambera pamutwe ndipo vidwata vyandiro, ¹⁰ anongoli naghuhunga waweni kuvakamali vaku tamburako ghukarunga kupitira muvirughana vyaviwa. ¹¹ Mukamali ana hepa kukuronga kumwena ntani nalikudidipito nalintje. ¹² Ame kapi napulitira mukamali arongite ndi po akuyombelite mpangero kuwiru yamu kafumu, nani ngoli kuparuka mukumwena. ¹³ Kondashi Adamu ndye vahovhire kughunga, ntani Eva. ¹⁴ Adamu kapishi ndye vapukitire anongoli mukamalo ndye vapukitire ntani mbyo akalire mutaghuruki veta. ¹⁵ Nampiri ngoli ghuye ngaka yoghokera kupitira mukuyita kwendi vana, namgeshi ngava twikira mulipuro ntani mushihoro nalikupongoro namaghano ghamawa.