¹ Kukwenu naghumwenu mwaviyiva, vaghunyande, ashi liyo lyetu kwenu kapishi lya nyara-nyara. ² Yira momu mwaviyiva, nampiri ndi momo twa nyandire nakututekura mwamudona muFilipi. Atwe kwakolire mwaKarunga wetu tuya vhure kughamba kukwenu mbudi yayiwa nampiri ndi momo twa pitiremo naghudito waghunene. ³ Atwe makorangedo ghetu kapishi ghalipuko ndi po ghaghufweke ndi ghakumupukita. ⁴ Mukurenka ashi, momu atutambura Karunga nambudi yayiwa, atu ghamba, kapishi tuhafite vantu, anongoli Karunga. Uye ndye akona konango dimushima detu. ⁵ Atwe kapi twayire nankango damukaholya-holya shika momo munaviyiva, ndi kundereko nka vyakudifuka Karunga ndye mbangi yetu. ⁶ Ndi po tushana-shane nfumwa kuvantu, vikareshi kukwenu ndi kuva ghunyenu. ⁷ Nampirindi momo twakara naghu nankondo waku mupangera mukukara ashi atwe vakashishongero vaKiristusi, mulivangolyavyo, kwayaklire nawa mukashi kenu yira nyokwa muntu ana kushengawido vana vamwe. ⁸ Murupe runo atwe twamuhora. Atwe Vyatuhafitire mukukugawinina nanwe mbudi yayiwa yaKarunga ngoli kapishi mbyovyo pantjako, nani namonyo detu nka. Kukwenu ko ngoli anwe munakara yira vakwavo vanene kukwetu. ⁹ Kukwenu ko anwe vhurukenu, vaghuni vetu, viruwana vyetu naghupampi. Matiku namwi ka turuwananga shankondo-kondo mposhi kapishi tunyeghenyitepo ghumwe wenu apa ka tumuyuvitiranga mbudi yayiwa yaKarunga. ¹⁰ Anwe vambangi naKarunga ndyeghu, ghupongoki waweni, ghuhungami nalipirondyo wakaliro mumaghukaro ghetu kukwenu anwe vapuli. ¹¹ Murupe ndoruno munayiva ashi weni omo twa yakalire nakehe ghumwe wenu, yira shamuntu navana vamwene, ¹² kuna kumu korangedo, naku mushengawida, nakumupampirikida muye pankedi yakuwapera Karunga ogho amukugho mughuntungi namulifuno lyendi. ¹³ Kukukonda dyoyino natwe nka kuna kupandura Karungu mwamunene, apa mwatambulire mbudi yaKarunga oyo mwayayuvhire kukwetu, anwe kwayayitambulire yira kapishi nkangoyamuntu, nani yira shinike shaghushi, nkango yaKarunga, odo dina kuruwano mumwenu vapulimo. ¹⁴ Kukwenu ko anwe, vaghuni vande, mwakara vihoninita vyankirishe daKarunga odo dina karo muYudeya mwaYesusi Kristusi. kukwenuko anwe nanwe kwahepire murupe rwakukufana kuvantu vamushirongo shanghumwenu, yira momo vavi varuwanine vaYuda ¹⁵ Ovo vadipagho Hompa Yesusi navaPorofete, novo vatutjidiromo. Vavo naku yendashi Karunga kumushima, mulivango lyavyo, vavo kukunyengita kuvantu navantje. ¹⁶ Vavo kutushweneka kuyuvhita mbudi yayiwa yinya yina kushano kuvaparura Vitundwamo vyapo mbyovo tupu vyakuwederera ndyo davo. Ane ngoli ghugara nga ghuvafunda muruhura. ¹⁷ Ano Atweko, Vaghuni vetu, vatu hangura kukwenu pakarugho kakafupi, paghuntu kapishi mumushima. Twakalire nalirura, nalitokomeno lyalinene, mukumona vipara vyenu. ¹⁸ Atwe kwashanine kuya kukwenu - kukwandeko ame, Paurusi, ndi navyukilireko- anongoli Satana atu kondilire mukuya. ¹⁹ Mukutwara mulihuguvaro lyetu, ndi ruhafo, ndipo nkata yalifumano kumeho yaHompa wetuYesusi apa nga ya? kapishi anwe? ²⁰ Anwe anwe lifumano lyetu naruhafo rwetu.