¹ Nkene umwe ana kara namutangu naunyendi, vinke akashana kuva panguli vavapagani ahana kuyenda kwavantu vaKarunga? ² Kapi mwayiva ashi vantu vaKarunga mbo ngava kapanguro Udyuni? Nkene ashi Udyuni anwe ngamu kaupanguro, makura vimu vhure ngoli kughupapo vino vyavididi ndi? ³ Kapi mwayiva ashi atwe ngatukapanguro vaEngeli ndi? Rukando rwakutika, kuninko tuvhura kupangura maudito ghakehew liyuva? ⁴ Nkenteshi mpanguro daweno ndo mwakaranga nado kehe liyuva, vinke mutwarera nkango daweno kuva panguli ovo vapiro kuhama kumbunga Kriste? ⁵ Ame kuna kughamba vino mukufe ntjoni. Opo muna kara mukatji kenu nane mwato vakonentu vakuvhura kughupapo maghudito mukatji kenu? ⁶ Makura muntu naunyendi mbyo ngoli mwaku twara-twaranga kuvapanguli-vahana lipuro! ⁷ Ushiri ngoghuno ashi naneumwenu opo munakara nankango mukatjikenu muna shwauka kare. Vinke tupu mudira kushuva vamuruwane mwamudona walye hashako? Vinke tupu mudira kushuva vamukonge nakumushakana ndi hashako? ⁸ Anwe nanwe mbyo mwaruwananga udona nakukonga nakushakana, anwe kuruwana vyaweno nakuvaunyenu! ⁹ Ndi kapi mwayiva ashi vantu vakupira kuhungama kapi ngava kapinga Untungi waKarunga. Mwasha puka. Varushonda, vakareli Karunga vavintjwantjo, vatjoli nkwara, vakukurara varume navarume, varukeshe, ¹⁰ Ndi vawidi, vamakurulya, vankorwe, vakushwaura vaunyavo, vakamashaka kapi ngava kapinga Untungi waKarunga. ¹¹ Vaunyenu vamwe movakalire ngoli. Ngoli anwe mwaku tapa vamukusha ndyo denu, mbyo vamu pongwera Karunga, mbyo mwahungamena mulidina lya muyowoli wetu Yesusi Kristusi namumpepo yakupongoka yaKarunga. ¹² '' Navintje vavipulitira kukwande''. ngoli kapishi navintje kukwafa. '' Navintje vavi pulitira kukwande''. ngoli kapi nganipulitira kehe shino shikare nankondo parutu rwande. ¹³ '' Ndya kwakarerapo lipumba, lipumba nalyo kwakarerapo ndya,'' ngoli Karunga ngaka vidyonaurapo navintje. Rutu kapi rwakarerapo rushonda. Ngoli rutu kwahamena kwaHompa, ngoli Hompa ndye wakurera rutu. ¹⁴ Karunga kwarambwita Hompa Yesusi kughufe ntani natwe nka waro ngatu rambwita kughufe nankondo dendi. ¹⁵ Kapi mwayiva ashi marutu ghenu maruha gharutu rwaKristusi? Makura nughupe ruha rwaKristusi nuruture kumwe naruha rwavantu varushonda ndi? Hawe nakuvhurashi vikare ngoli! ¹⁶ Ndi kapi mwayiva ashi wakugwanekera panyama namukadi warushonda vana hepa kukara rutu rumwe naye? Yira momu atanta matjangwa, '' Vavo vaviri kukara ngoli rutu rumwe tupu''. ¹⁷ Ngoli kogho ana gwanekero naHompa kukara mumpepo kumwe naye. ¹⁸ Tundenuko kurushonda! Kehe yino ndyo yapeke adyonanga muntu, kwakara pantunda yarutu, Ngoli muntu wakushondera kutura ndyo kurutu rwamwene. ¹⁹ Ndi kapi mwayiva ashi marutu ghenu ndo ntembeli daHompa yakupongoka, oyo yatungo mumwenu, oyo amupa Karunga? Kapi mwayiva ashi anwe kapi mwakuweka umwenu! ²⁰ Kwamughura namfuto. mpo ngoli ashi yererepekenu Karunga namarutu ghenu ntani nampepo yenu oyo yahameno kwaKarunga.