¹ Twaya yuvha mbudi ashi mukatjikenu rushonda runa karomo, rushonda orovapira kupulitira nampindi muva pagani: Ghurare namukamali wavasho. ² Ngoli anwe mbyomuna kukunenepita waro! Mwahana kulira, mposhi ogho ana kuruwano vyaweno mumughupemo mukatjikenu? ³ Kuruha rwandeko nampili momu napili kukara kumwe nanwe, ngoli pampepo mponili po. Namupangura kare ogho aruwana vihuna vyaweno, yira nani mpo nakara. ⁴ Nkene tuna pongenu mulidina lya muyowoli wetu Yesusi Kristusi nanwe nakara pampepo, ano nkondo damuyowoli wetu Yesusi Kristusi mpodili papetu, ⁵ Muntu waweno kamutapa kwaSatana nampili rudyonauke rutu rwendi, Enengoli mpepo yendi ngayiparuke muliva olyo ngaya Hompa. ⁶ Kukuknenepita kapi vyawapa. Kapi mwayiva ashi vishashito vyavididi kushashita viduva mudima? ⁷ Kushenumo vimutunde vishashito vyavi kuru-kuru vyandyo mukare vantu vavape, vakuhungama, anwe mukare ngoli yira viduva vyamboroto yayipe yakupira vishashito, makura mukare ngoli yira momu namuyiva ashi momwafana. Weno shipito shetu shaPaska shinapu kuwapayilka mukondashi Kristusi Ndywi ghona yetu, yinapu kudyamba. ⁸ Tudanenu ngoli shipito shetu, ngoli kapishi namboroto daviduvito vyakushasha vyavi kuru-kuru, viduvito vyandyo yaUkaro waUdona nandyo. Nani ngoli, tudanenu namboroto dakukushuka naUshiri. ⁹ Ame kwamu tjangelire mbilive yande ashi walye mwakara nashinanga navantu varuntjo naUkaro waghudona. ¹⁰ Ngoli ame kapi natamba vantu vavadona vamu Udyuni ghuno, ndi vamakurulya, ndi vana vipempa, varuntjo, ndi vakareli Karunga wavi ntjwantjo, kutunda kwavantu vaweno nkwandi ghunahepa kutunda muno mughudjuni. ¹¹ Vyene vyene ame kuna kumutjangera ashi walye mwakara shinanga nakehe ghuno ashi mbyovo ghunyenu mara ghuye munarushondo, ndi munaruntjo, ndi mukareli vaKarunga vakuvintjwantjo, ndi wamakurulya, ndi mushwauli, ndi nkorwe, ndi wawidi wamashaka, ndi muna vipempa. Nakuvhurashi kulya ndya namuntu wakufana weno. ¹² Ame pankedi munke nuvhura kupangura vantu vakaro pandye yangereka? Anwe nanwe kapishi mbovo vamumbunga Kriste mbova kuvhura kupangura anwe? ¹³ Karunga ndye ngapanguro avavapandye. '' Ghupenumo vantu vavadona mukatji kenu''.