¹ Vaunyande, ame kapi navhulire kughamba navo yira vantu ovo vakaro pampepo, nani ngoli yira vantu vamuno mughudyuni, yira vanuke mulipuro lya kupura mwaKristusi. ² Ame kwamurera namashini, kapishi nandja dakutafuna, momu shi kapi damuwapera, nampili namuntji shimpe kapi dina muwapere. ³ Anwe shimpe vamughudyuni ghuno. ovyo muna karere mfudu nadimutangu mukatji kenu, ame shi mbyovyo mwaruwananga yira vyamu Udyuni ghuno, mbyo muna karere naUkaro wamu Udyuni ghuno. ⁴ Nkene umwe aghamba ashi, '' Ame waApolosi,'' nani kapi muna kuruwana yira vamu Udyuni ghguno? ⁵ Apolosi kukwenune are? Are Paurusi? Vavo vakareli vaHompa ovo vayuvhito mbudi mupure, kehe uno kwaruwana shiruwana shendi yiramomu vashimupera. ⁶ Ame kwatapeka Apolosi kwatekera mema, Ene ngoli Karunga ndye wakumenita mbuto yikure. ⁷ Mpo ngoli mutapeki ndi mutekeli navimweshi. Wamunenepo Karunga wakukulita mbuto. ⁸ Mpo ngoli ashi mutapeki namutekeli navantje kumwe tupu, ntani kehe ghuno ngaka wana ndjambi yendi kutwara momu aruwanine viruwana vyendi. ⁹ Mpo ngoli ashi navantje tuva ruwani vaKarunga. Anwe ko lifuva lya Karunga ndi matungo aKarunga. ¹⁰ Kutwara munkenda oyo atapa kukwande Karunga nikare mutungi wamukonentu unene, kwatura po ntjima-ntjima yalitameko ntani vamwe ngava yatungire po. Ngoli kehe uno atakamite ashi weni omo atungirapo. ¹¹ Kwato ghumwe ghavhuro kutateka litateko nalyo peke lyahanashi olyo lyakaro po kare, lyalyo Yesusi Kristusi. ¹² Kehe uno kuvhura ghatunge kulitateko lino aruwanite Ngorodo, Sisiliveli, mawe andiro, vitondo, mushoni ndi virwenge, ¹³ viruwana vyakehe uno ngavi kushorora, ngavi shoroka muliyuva ndyo lyo. Ngavi kushorora mumundiro. mundiro ngongaghu shororo mulyo waviruwana ovyo aruwana kehe uno. ¹⁴ Nkene viruwana ovyo watunga kapi ngavi likana kumundiro, ghuye ngawana mfuto. ¹⁵ Nkene ngavi pya po viruwana vyendi ngakombanita mfuto, ngoli uye mwene ko ngaka paruka, yira ndyegho apitiro mumundiro. ¹⁶ Mwaviyiva nawa-nawa ashi anwe ntembeli daKarunga ntani ashi mpepo yaKarunga mumwenu yatunga? ¹⁷ Muntu nkene adyonaura ntembeli yaKarunga, Karunga naye ngadyonaurapo ogho muntu. Momushi ntembeli yaKarunga kwapongoka, mo nanwe ngoli ndi. ¹⁸ Mwasha kengerera muntu aku pukite mwene. Nkene umwe mukatjikenu akumoneshi ghuye akara naghukonentu wavi vyamu Udyuni, ahove tanko kukara '' mugova'' mposhi ngawanenemo ukonentu. ¹⁹ Mbyovo shi ukonentu wamuno mughudjuni ugova kwaKarunga. Matjangwa kwatanta ashi, '' Karunga kwamanga dimutjima davakonentu.'' ²⁰ Shimpe waro, '' Hompa ayiva una ndunge wavakonentu ashi navimweshi kukwendi''. ²¹ Mukonda ndyoyino, kapishi pakare ogho ana kukunenepitiro vyavantu. Momushi vininke navintje vyenu, ²² Akare Paurusi, ndi Apolosi, ndi Kefasi, ndi Udyuni, ndi liparu, ndi mfa, ndi vyantantani, ndi vyakumeho ko, navintje vyenu. ²³ Anwe kwahamena kwaKristusi, ano Kristusi kwaKarunga.