¹ Kabayatanna, umadon nga ribo a tattao ti nagguummong nga uray la agbibinaddekda iti tunggal maysa, inrugina nga imbaga kadagiti adalanna, "Annadanyo iti lebadura dagiti Pariseo, isu iti panaginsisingpet. ² Ngem awan iti banag a nailemmeng nga saan a maipaakaammo, ken awan iti nailimed nga saan a maammoan. ³ Ta aniaman nga imbagam iti nasipnget ket mangngegto iti lawag, ken aniaman nga iyarasaasmo iti lapayag iti kaunegan nga kuarto ket maiwaragawagto iti rabaw dagiti babbalay. ⁴ Ibagak kadakayo, gagayemko, di kay agbuteng kadagiti mangpatay iti bagi, nga kalpasan iti dayta ket awanen ti mabalinda nga aramiden. ⁵ Ngem ballaagan kayo maipanggep iti pagbutnganyo. Pagbutnganyo isuna, isuna a kalpasan nga mangpatay, ket addaan iti karbengan nga mangitapuak kadakayo idiay impierno. Wen, ibagak kadakayo, agbuteng kayo kenkuana. ⁶ Saan aya nga dagidiay lima a billit ket mailako iti dua nga sentimo? Ngem awan uray maysa kadakuada nga malipatan iti imatang ti Dios. ⁷ Ngem uray pay iti buok ti uloyo ket nabilang amin. Dikay agbuteng. Napatpategkayo ngem dagiti adu a billit. ⁸ Ibagak kadakayo, tunggal maysa nga mangiwaragawag kaniak iti sangwanan dagiti tattao, iwaragawagto met ti Anak ti Tao iti sangwanan dagiti anghel ti Dios, ⁹ ngem isuna nga mangilibak kaniak iti sangoanan dagiti tattao ket mailibakto met iti sangoanan dagiti anghel ti Dios. ¹⁰ Tunggal maysa nga agsao iti maibusor iti Anak ti Tao, ket mapakawanto dayta kenkuana, ngem kenkuana a mangbusor iti Espiritu Santo ket saanto a mapakawan. ¹¹ No ipan dakayo iti sangoanan dagiti sinagoga, dagiti papanguloen, ken agtuturay, saan kayo a madanagan no kasanokayo nga agsao a mangikalintegan iti bagbagiyo, wenno ania iti ibagayo, ¹² ta isuronakayonto ti Espiritu Santo no ania iti rumbeng nga ibagayo iti dayta nga oras." ¹³ Ket kinuna kenkuana ti maysa a naggapu iti kaaduan ti tattao, "Maestro, ibagam ken ni kabsat ko ta pagbingayanmi ti tawid mi." ¹⁴ Kinuna ni Hesus kenkuana, "Lalaki, siasinno ti nangdutok kaniak nga ukom wenno mangibabaet kadakayo?" ¹⁵ Ket kinunana kadakuada, "Annadanyo ta bagbagiyo manipud kadagiti amin a kinaagum nga tarigagay, ngamin iti panagbiag ti tao ket saan nga iti kinaadu ti sanikuana." ¹⁶ Ket imbaga ni Hesus kadakuada iti maysa a pangngarig, a kunana, "Ti bangkag iti maysa a baknang nga tao ket adu iti naapit, ¹⁷ ket inrasonna iti bagina a kunana, 'Ania ngata ti aramidek, agsipud ta awanen ti disso a pagidulinak kadagiti apitko?' ¹⁸ Kinunana, 'Kastoy ti aramidek. Dadaelek daytoy kamarinko ket agpatakderak iti dadakkel ket idiayto ti pagidulinak iti amin nga bukbukelko ken dadduma pay a mausar. ¹⁹ Ibagakto iti kararuak, "Kararua, adun ti mausar nga nakadulin para iti adu a tawen. Aginanaka nga nagin-awa, mangan, uminom ken agragsakka." ²⁰ Ngem imbaga ti Dios kenkuana, 'Maag nga tao, ita nga rabii ket maisubli iti kararuam, ket dagita insaganam nga banbanag, siasinonton ti agtagikua?' ²¹ Kasla kasta ti kaiyaspingan iti `maysa nga agurnong iti kinabaknang para iti bagina ket saan a nabaknang maipanggep iti Dios." ²² Imbaga ni Hesus kadagiti adalanna, "Ngarud ibagak kadakayo, saan kayo a madanagan maipapan iti panagbiagyo, no ania iti kanenyo; wenno maipapan iti bagiyo, no ania ti ibadoyo. ²³ Ta ti biag ket napatpateg ngem taraon, ken ti bagi ket napatpateg ngem ti badbado. ²⁴ Panunotenyo kadi dagiti uwak, saanda nga agmulmula wenno agap-apit. Awan ti pagiduldulinanda wenno kamarinda, ngem pakpakanen ida ti Dios. Ket adayu nga napatpategkayo ngem dagiti billit! ²⁵ Ket siasino kadakayo iti agdandanag ti makanayon ti maysa kasiko iti biagna? ²⁶ No kasta ngarud ket awan ti kabaelanyo nga aramiden uray dayta nga kababassitan a banag, apay ngarud a madanagankayo maipanggep iti daddumapay? ²⁷ Panunutenyo dagiti lirio-- no kasanoda nga dumakkel. Saanda nga agtatrabaho, wenno agabel. Ngem ibagak kadakayo, uray pay ni Solomon iti amin a kinadayagna ket saan a nakawesan nga kasla iti maysa kadagitoy. ²⁸ No dagitinto pay ruot iti tay-ak, nga agbibiag tatta nga aldaw, ket no bigat maibelleng idiay pugon, nangnangruna pay a kawesanna kayo, nagbassit ketdin ti pammatiyo! ²⁹ Saanyo nga sapulen no ania ti kanenyo ken no ania ti inumenyo, ken saan kayo a madanagan. ³⁰ Ta amin nga nasyon iti lubong ket dagitoy a banbanag ti sapsapulenda, ket ammo ti Amayo nga masapulyo dagitoy. ³¹ Ngem birukenyo ti pagarianna, ket dagitoy nga banbanag ket mainayonto kadakayo. ³² Di kay agbuteng, babassit nga karnero, ta iti Amayo ket maayatan nga ited kadakayo iti pagarian. ³³ Ilakoyo dagiti sanikuayo ken itedyo kadagiti marigrigat. Iyaramidanyo dagiti bagbagiyo kadagiti pitaka nga saan a marunot - kinabaknang idiay langit nga saan a maibus, saan nga maasitgan iti agtatakaw ken saan nga dadaelen iti anay. ³⁴ Ta nu sadinno ti ayan ti kinabaknangyo, idiayto met ti ayan iti pusoyo. ³⁵ Kanayon koma a nabariksan ti siketyo ken ti maap-apuyan ti lamparayo, ³⁶ ken agbalinkayo a kas kadagiti tattao nga mangbirbiruk iti amongda no agsubli isuna nga aggapu iti kasaran, tapno inton sumangpet ket agtoktok, dagusda nga lukatan ti ridaw para kenkuana. ³⁷ Nabendisionan dagiti adipen a masangpetan ti amongda nga mangpadpadaan iti isasangpetna. Pudno nga ibagak kadakayo, isaganana ti bagina tapno agserbi ken makitugaw iti lamisaan, ket umay ken pagserbianna isuda. ³⁸ No iti amo ket sumangpet ti maikadua a panagbantay iti rabii, wenno uray pay iti maikatallo a panagbantay, ket makitana ida nga sisasagana, nabendisionan dagita nga adipen. ³⁹ Ngem ammuenyo daytoy, nga no iti amo ti akin balay ket naamuanna iti oras ti isasangpet ti agtatakaw, saanna a palubusan ti balayna a maserrek. ⁴⁰ Agsagana kayo met, ta iti Anak ti Tao ket umay iti oras a saan yo nga ipagarup." ⁴¹ Kinuna ni Pedro, "Apo, ibagbagayo kadi dayta nga pangngarig kadakami laeng, wenno iti amin?" ⁴² Kinuna ti Apo, "Siasino ngarud iti napudno ken nasirib a mangidadaulo nga isunto iti isaad ti amongna kadagiti dadduma pay nga adipenna a mangted kadakuada iti bingayda a makan iti umno nga oras? ⁴³ Nabendisionan dayta nga adipen a masangpetan ti amongna nga ar-aramidenna ti trabahona. ⁴⁴ Pudno nga ibagak kadakayo nga isaadnanto dayta nga adipen tapno agaywan kadagiti amin a sanikuana. ⁴⁵ Ngem no kuna dayta nga adipen iti pusona, 'Itantantan iti amongko ti panagsublina,' ket rugianannanto nga kabilen dagiti adipen nga lallaki ken babbai ket mangan ken uminom ken mabartekto, ⁴⁶ sumangpetto ti among dayta nga adipen iti aldaw a saanna nga mapakadaan ken iti oras nga saanna nga ammo, ket tadtadennanto isuna iti pirapiraso ken ikeddengna ti pagyananna a kaduana dagiti saan a mapagtalkan. ⁴⁷ Dayta adipen, nga ammona iti aramiden ti amongna ken saan a nagsagana wenno inaramid ti pagayatan ti amongna, ket masaplitto iti mamin-adu. ⁴⁸ Ngem iti siasino a saanna nga ammo, ket inaramidna iti banag a rumbeng a panakadangranna, sumagmamanonto iti panakasaplitna . Ngem kadagiti naikkan iti adu, ad ad-adunto kadakuada iti masapol, ken iti naitalkan ti ad-adu, ket ad-adunto met ti dawatenda kenkuana. ⁴⁹ Immayak ditoy daga tapno puorak ti lubong, ket anian nga kayatko a daytoy ket immapoyen. ⁵⁰ Ngem adda buniag a pakabautisarakto, ket anian a parikotko agingga a matungpal! ⁵¹ Ipagarupyo kadi nga immayak tapno mangted iti kapia ditoy lubong? Saan, ngem ketdi, panagsisina. ⁵² Ta manipud ita ket addanto lima iti maysa nga pagtaengan a masinasina-- ti tallo nga tao maibusor iti dua, ken dua nga tao maibusor iti dua. ⁵³ Masinasina danto, ti ama kontra iti anak a lalaki, ken ti anak a lalaki kontra iti ama; ti ina kontra iti anak a babai, ken ti anak a babai kontra iti inana, ti katugangan a babai kontra iti manugangna a babai, ken ti manugang a babai kontra iti katugangana a babai." ⁵⁴ Ibagbaga pay ni Hesus kadagiti tattao, "No makitayo ti ulep nga ngumatngato iti laud, ibagayo nga dagus, 'Umay ti tudo,' ket isu ti mapaspasamak. ⁵⁵ Ket no agpuyupoy ti angin nga aggapu iti abagatan, ibagayo nga, 'Addan to iti makasinit nga pudot,' ket isu ti mapasamak. ⁵⁶ Dakayo nga aginsisingpet, ammoyo no kasano ti mangipatarus iti langa ti daga ken ti langlangit, ngem kasano nga saanyo nga ammo iti mangipatarus iti agdama? ⁵⁷ Apay a saanyo nga maikeddeng no anya iti umno para kadagiti bagbagiyo? ⁵⁸ Ta no mapan kayo iti imatang ti ukom ket adda kabusoryo, iti dalanyo ket ikagumaanyo ti makikappia kenkuana tapno saandakayo nga ipan iti ukom, ken tapno iti ukom ket saannakayo nga iyawat iti opisyal, ken ti opisyal ket saanakayo nga ipan iti pagbaludan. ⁵⁹ Ibagak kadakayo, saan kayonton a makaruar manipud sadiay agingga a nabayadanyo iti kakaisuna a kuartayo."