¹ Napasamak iti maysa nga aldaw a ni Hesus ket nagkararag iti maysa a disso. Idi nalpas isuna, maysa kadagiti adalanna ti nagkuna, "Apo, isuro nakami nga agkararag a kas iti panangisuro ni Juan kadagiti adalanna." ² Kinuna ni Jesus kadakuada, "No agkararag kayo, kastoy ti saoenyo, 'Ama, maidayawmo koma iti nagan mo. Dumteng koma iti pagariam. ³ Ited mo kadakami iti tunggal aldaw ti tinapaymi. ⁴ Pakawanennakami kadagiti basbasol mi, a kas pakawanen mi met dagiti amin a nakautang kadakami. Ket saannakami nga iturong iti sulisog." ⁵ Imbaga ni Hesus kadakuada, "Siasino kadakayo ti addaan iti gayyem, a no mapankayo kenkuana iti tengnga ti rabii, ket ibagayo kenkuana, 'Gayyem, pabulodannak man iti tallo piraso a tinapay, ⁶ gapu ta adda ti gayyemko nga dimmagas manipud iti kalsada, ket awan iti aniaman a maipasangok kenkuana. ⁷ Ket ti adda iti uneg, sumungbat ket mabalin a kunaenna, 'Dinak riribuken. Nakaserran ti ridaw, ket dagiti annakko, ken siak, adda kamin iti pagiddaan. Saannak a makabangon a mangted kenka iti tinapay.' ⁸ Ibagak kadakayo, uray saan a bumangon nga mangted iti tinapay kadakayo, gapu ta sika ket gayyemna, ngem gapu ta awan bainyo nga mangipipilit, bumangonto ket itedna ti kaadu ti tinapay a masapulyo. ⁹ Ibagak pay kadakayo, agdawatkayo, ket maitedto kadakayo; agsapulkayo, ket makabirukkayto; agtuktokkayo, ket mailukatankayto. ¹⁰ Ta iti tunggal tao nga agdawat ket umawat; ken ti tao nga agsapsapul ket makabirok; ken ti tao nga agtuktuktok ket mailukatan. ¹¹ Siasino kadakayo ti ama, nga nu agdawat ti anakna a lalaki iti tinapay ket itedna na iti bato? Wenno ikan, ket itedna ti uleg? ¹² Wenno dumawat iti itlog, itedmo kadi ti manggagama kenkuana? ¹³ Ngarud, nu dakayo a managdakdakes ket ammoyo a mangted iti nasayaat nga sagut kadagiti annakyo, dinto ket ad-adda pay nga ti amayo sadi langit, ited na ti Espiritu Santo na kadagiti agdawat?" ¹⁴ Ita ni Hesus ket mangpakpaksiat iti demonyo nga umel. Idi makaruar daytoy nga demonyo, nagsao daytoy umel nga tao, ket nasdaaw unay dagiti tattao. ¹⁵ Ngem adda sumagmamano nga tattao a nagkuna, "Babaen kenni Beelzebul, nga mangiturturay kadagiti demonyo, mangpakpaksiat isuna kadagiti demonyo." ¹⁶ Dagiti dadduma ket sinuot da isuna ken binirukanda isuna iti pagilasinan nga agtaud sadi langit. ¹⁷ Ngem ammo ni Jesus dagiti panpanunotenda ket kinunana kadakuada, "Tunggal pagarian a nabingaybingay ket maibusor metlaeng kadakuada ken mapanawan, ken ti balay a nabingaybingay ken agbibinusor ket madadael. ¹⁸ No nabingaybingay ken agbibinnusor dagiti pasurot ni Satanas, kasano ngarud nga makatakder iti pagarianna? Gapu ta iti kunayo pakpaksiatek dagiti demonyo babaen kenni Beelzebul. ¹⁹ Nu mangpaksiatak kadagiti demonyo babaen kenni Beelzebul, siasino kadagiti pasurotyo ti mangpapanaw kadakuada? Gapu iti daytoy, isudanto ti mangukom kadakayo. ²⁰ Ngem nu paksiatek dagiti demonyo babaen iti ramay ti Dios, dimteng ngarud ti pagarian ti Dios kadakayo. ²¹ No bantayan ti maysa a napigsa a lalaki nga kumpleto iti armasna ti bukodna a balay, natalged dagiti sanikuana, ²² ngem nu abaken isuna ti napigpigsa a lalaki, alaena ti armas dayta a lalaki ket samsamenna iti sanikuana. ²³ Ti saan a makikadua kaniak ket maibusor kaniak, ket ti saan met a makitipon kaniak ket mawarawara. ²⁴ No ti narugit nga espiritu ket pumanaw iti maysa a tao, lumabas iti saan a madandanoman nga disso ken agsapul iti paginanaanna. Ket inton awan ti mabirukanna, ibagana, 'Agsubliak iti balayko a naggapuak.' ²⁵ Ket iti panagsublina, masarakanna nga dayta a balay ket nawalisan ken naisimpan. ²⁶ Ket mapan nga mangikuyog iti pito pay nga espiritu a nadakdakes ngem isuna ket sumrekda amin tapno agianda sadiay. Ket iti kamaudianan a kasasaad dayta a lalaki ket agbalin a nakarkaro pay ngem iti damo." ²⁷ Ti napasamak ket, idi ibagbagana dagitoy a banbanag, adda maysa nga babai a nangipigsa iti saona iti ngatoen iti kaadduan a tattao ket kinunana kenkuana, "Nabendisionan iti tiyan ti nangipasngay kenka ken iti suso a nangpasuso kenka." ²⁸ Ngem kinunana, "Ad-adda nga nabendisionan dagiti dumngeg iti sao ti Dios ken idulinda dagitoy." ²⁹ Kabayatan nga umad-adu dagiti tattao nga makitaripnong, inrugi ni Hesus a kinuna, "Daytoy nga henerasyon ket nagdakes nga henerasyon. Sapulenna ti pagilasinan, ngem awan ti maited a pangilasinan malaksid iti pagilasinan ni Jonas. ³⁰ Ta kas iti panagbalin ni Jonas a pagilasinan kadagiti taga-Ninive, kastanto met nga ti Anak ti Tao ket agbalin a pagilasinan iti daytoy nga henerasyon. ³¹ Ti Reyna iti Abagatan ket tumakderto iti pangukoman a kadwana dagiti lalaki iti daytoy nga henerasyon ket ikeddengna ida, ta naggapo isuna iti pungto ti daga nga agdenggeg iti kinasirib ni Solomon, ken kitaenyo, adda ditoy ti natantan-ok pay ngem ni Solomon. ³² Dagiti lalaki ti Ninive ket agtakderdanto iti pangukoman a kaduada dagiti tatao iti daytoy nga henerasyon ket maikeddengdanto, ta nagbabawidan gapu iti inkaskasaba ni Jonas, ken kitaenyo, adda ditoy ti natantan-ok pay ngem ni Jonas. ³³ Awan ti siasinoman, nga nu malpasna a sindian ti lampara, ket ikabilna iti nakalemmeng a lugar wenno iti sirok ti basket, ngem ketdi iti pagidisdisuan iti lampara, tapno dagiti sumrek ket masilawanda. ³⁴ Ti matam ket isu iti lampara ti bagim. Nu nasayaat iti matam, iti bagi ket mapunno iti lawag. Ngem nu madi ti matam, iti bagi ket mapunno iti kinasipnget. ³⁵ Ngarud, agannadkayo nga iti lawag nga adda kadakayo ket saan a kinasipnget. ³⁶ Gapo ta no napunno ti bagiyo iti lawag ken awan pulos pasetna iti kinasipnget, ngarod iti intero a bagiyo ket agbalin nga kasla lampara nga aglawag kadakayo." ³⁷ Idi nalpas isuna nga nagsao, dinawat ti maysa a Pariseo nga makipangan isuna iti balayna, ket simrek ngarud ni Hesus ket nagtugaw. ³⁸ Nasdaaw ti Pariseo ta saan a nagbuggo ni Hesus sakbay iti pangrabii. ³⁹ Ngem kinuna ti Apo kenkuana, "Ita ngarud, dakayo nga Pariseo, ugasanyo ti akinruar a paset dagiti tasa ken mallukong, ngem ti kaungganyo ket napunno iti kinaagom ken kinadakes. ⁴⁰ Dakayo a saan nga makaaw-awat a lallaki! Saankadi nga ti nangaramid iti uneg ket inaramidna met ti akinruar? ⁴¹ Itedyo dagiti adda iti uneg a kas datonyo, ket amin nga banbanag ket malinisan para kadakayo. ⁴² Ngem asi kayo pay nga Pariseo, ta itedyo ti apagkapullo dagiti menta ken ruda ken amin a mulmula iti bangkag, ngem baybay-anyo met ti kinalinteg ken ti ayat iti Dios. Masapol nga nalinteg ti ikastayo ken ayatenyo ti Dios, nga saanyo a liwayan nga aramiden dagiti daddumapay a banbanag. ⁴³ Asikayo pay nga Pariseo, ta pagaayatyo dagiti tugaw iti sangwanan dagiti sinagoga ken dagiti narespeto a pammadayaw iti ayan dagiti pagtagilakuan. ⁴⁴ Asikayo pay, ta kaskayla kadagiti awan markana nga tantanem a saan nga ammo dagiti tattao ket badbaddekanda." ⁴⁵ Ket simmungbat kenkuana ti maysa nga eksperto iti linteg ti Hudio a kunana, "Maestro, dayta nga ibagbagam, ket insulto met kadakami." ⁴⁶ Kinuna ni Hesus, "Asikayo pay a manursuro iti linteg! Ta pagbaklayenyo dagiti lallaki kadagiti awit nga nadagsen a baklayen, ngem saanyo a sagiden dagiti dadagsen kadagiti maysa a ramayyo. ⁴⁷ Asikayo pay, ta agipatakderkayo kadagiti pakalaglagipan a tanem dagiti propeta, ngem dagiti met kapuonanyo ti nangpatay kadakuada. ⁴⁸ Isunga maysakayo nga saksi ken immanamong kadagiti aramid dagiti kapuonanyo, ta kinapudnona ket pinatayda dagiti propeta nga akin tanem kadagiti ipatpatakderyo. ⁴⁹ Gapu met laeng iti daytoy, kinuna ti Dios iti kinasiribna, 'Ibaonkonto kadakuada dagiti propeta ken dagiti apostoles, ket parigaten ken papatayenda dagiti dadduma kadagitoy.' ⁵⁰ Gapo iti dayta, daytoy nga henerasyon ti mapabasol para iti amin a dara dagiti propeta nga naibukbok manipud pay iti panakairugi ti lubong, manipud ⁵¹ iti dara ni Abel inggana iti dara ni Zacarias, nga napapatay iti nagbaetan iti altar ken iti templo. Wen, ibagak kadakayo, nga daytoyto nga henerasyon iti mapabasol. ⁵² Asikayo pay nga eksperto kadagiti linteg iti Hudio, gapu ta innalayo iti tulbek ti kinasirib; ket dakayo nga mismo, saankayo nga sumsumrek, ken laplappedanyo pay dagiti sumrek." ⁵³ Kalpasan a pimmanaw ni Hesus sadiay, dagiti eskriba ken dagiti Pariseo ket kinontrada isuna ken nakisinsinungbat kenkuana maipanggep iti adu a banbanag, ⁵⁴ kas palab-og a panangpadasda kenkuana no ania iti matiliwanda a maipabasol kenkuana.