लिउ ७
1
क्षोने गेर्पुकि "दि ताम दि हुतुङ् राङ् हिन् ?" सिनि सिक्यासुङ् ।
2
स्तिफनसकि "उज्युनुप ताङ् आबातिबो, ङे ताम ङ्येन्: अरे पापा अब्राहम हारानला देतुप सिनाङ् गमाला सवाँकि कन्ज्यक् मेसोपोटामियाला खरे चाला क्षार्सुङ् ।
3
खोकि तिला " ख्यरे लुङ्बा ताङ् ख्यरे दाक्पि मितिबाला तोङ् तेमे ङे क्षा तेन्दुप् लुङ्बाला ग्युक ।" सिनि सिक्यासुङ् ।
4
ती तिङ्ला ती कल्दितिबि लुङ्बा नेसुर थेन्नि हारानला लेम्नि देसुङ् । ते खरे आबाति स्यिसिमा कन्ज्यककि तिला दि खिराङ् देतुप् लुङ्बाला टिनि लेसुङ् ।
5
खोकि तिला आबि गिज्या खाङ् साङ् माबिन् , दोजो साक कि, काङ्बि गम्बा योप्सा दासा साङ् मिदुक् । हिन्सिनाङ् अब्राहमकि पेजा च्यिग् साङ् मेसिनाङ् ती लुङ्बा ती तिला गिज्या दके क्यानि तेर्क्यिनक तेमे तितिङ्ला तिकि गिपातिबाला तेर्क्यु सिनि खोरुङ्ला ना क्याल्सुङ् ।
6
कन्ज्यक्कि तिला तिकि गिपातिबा मि लुङ्बाला तुज्ये चेज्यिक् देक्यिनक् तेमे तेकि मि तिबिकि तिबाला यक्पु जोनि लो ग्या स्यि साक् तिबाला नेन्ल्ये क्यिनक् सिनि सिइँ नक् ।
7
कन्ज्यक्कि "तिबा मिरिग् च्येन् दिकि हक्ला यक्पु च्युङ्गिबे, ङा तिबाला ठिम क्यित तेमे ती तीङ्ला तिबा तेसुर् पाङ्ला थेन्नि वानी दि दासाला ङाला सवाँ बुल्ग्यु ।" सिनि सिक्यासुङ् ।
8
तेमे खोकि अब्राहमला क्वाच्येताङ् कि ना खुर्सुङ् । तिकि क्यिसा अब्राहम इसहाककि आबा च्युङ्सुङ् तेमे ङिमा गेला क्वाच्येताङ् क्यासुङ् । इसहाक याकुबकि आबालच्युङ्सुङ् तेमे याकुब गिपा च्यिङ्ङिकि आबा च्युङ्सुङ् ।
9
गिपि क्षेम्बुतिबि योसेफ्कि खाला मिजेर क्यानी मिश्रला चनि ताङ्सिनाङ् कन्ज्यक् ती तानि नक् ।
10
तेमे तिला तेरिग् दुक्पा नेसुर टाल्नि मिश्रकि ग्याल्बु फारोकि दङ्ला तिला काटिन् ताङ् रिक्पा बिन्सुङ् । तोजोला फारोकि मिश्र ताङ् तिकि गिपा तेर्कि ओङ्ज्येन्बा जोसुङ् ।
11
तोजोला तेरिग् मिश्र ताङ् कनान् खाङ् ल्हरे खेल्नि दुक्पि तुज्ये लेसुङ् । तिकि क्यिसाला अरे पागावा तिबिकि खाङ् सामा साप माङ्ये ।
12
हिन्सिनाङ् मिश्र लुङ्बाला चाम्बा ङेक्यीनक् सिनि याकुबकि कोसिमा तिकि थाल्माला अरे पागावा तिबाला ते ताङ्सुङ् ।
13
क्षिमाल् ङिकि ठेताङ्ला योसेफ्कि राङ्ला राङ्गी उज्युतिबि चाला क्षा तेन्सुङ् तेमे योसेफ्की मिछाङ्ला फारो चाला ङोस्यि ताङ्सुङ् ।
14
राङ्गी पापा याकुब ताङ् तिकि दाक्पि मितिबा सिनि रिदाक् खाल्सुम् दाङ् च्याङाला मिश्रला स्यक् सिनि तिकि राङ्गि उज्युतिबाला लेन् ताङ्सुङ् ।
15
तिकि क्यिसाला याकुब मिश्रला गाल्सुङ् । त्ये ति स्यिसुङ् तेमे अरे पागावा तिबासाङ् तेराङ् स्यिसुङ् ।
16
तिबि स्येप् रो शकेम्ला खुर्नि गाल्सुङ् तेमे अब्राहमकि शकेमला हमोरकि पुज्युङ् तिबा नेसुर् ङुल्गि गोङ्ला ङ्योबु तुर्साला तिबाला मिक्तुङ् ग्याप्सुङ् ।
17
कन्ज्यक्कि अब्राहमतानि क्यालुप् तुज्ये चाला हुङ्गिन् क्यिसिन् मि तिबा मिश्रला दोम्बा आला गाल्सुङ् ।
18
ति तिङ्ला मिश्रला ज्येन् ग्याल्बु लेसुङ् तिकि योसेफला ङो मेस्येनक् ।
19
ति ग्याल्बुकि अरे मि तिबाला जिनक् जोसुङ् तेमे अरे पागावा तिबाला दुक् क्यानी मेल्येबा क्यानि राङ्ला ह्रकुप्ला तिबिकि राङ्गि पेजाला पाङ्ला क्युर गोबु गाल्नक् ।
20
ति तुज्येला मोशा केसुङ् । ति ति कन्ज्यक्कि थोङ्दाङ्ला ल्येमु नक् तेमे ला सुम् साक् तिकि पापि खाङ्बाला तिला सोसुङ् ।
21
तिला क्युर्सिमा फारोकि पुम्कि तिला लानि खनि राङ्गी पुज्युङ् दगे क्यानि सोसुङ् ।
22
मोशाला मिश्रकी तेरिग् येन्देन् तिबा लाप्सुङ् तेमे तिकि राङ्गि ताम् ताङ् क्यिताङ्ला ङार्मा च्युङ्सुङ् ।
23
हिन्सिनाङ् तो मिन्सिन् लो खाल्ङी ख्योल्सिमा, तिला राङ्गि उज्युतिबा इस्राएलितिबाला ठेतुप् सेम् लासुङ् ।
24
इस्राएलि मेरा च्यिग्ला मिहक् ग्यापु थोङ्नी तिकि खोला ह्रक्सुङ् तेमे ङ्याप्च्ये क्यिरुप् मि तिला सेसुङ् ।
25
कन्ज्यक्कि ति नेसुर तिकि उज्यु नुक् तिबाला थार ज्यितुप् छोलिन् नक् सिरुप् ति तिबिकि हाक् कोक्यिते सिनि तिकि नासाम् ताङ्सुङ्, हिन्सिनाङ् तिबिकि ति ताम् दि हाक् माको ।
26
तिकि साला तिला ति थामु ग्याकिन् हतुप् इस्राएलि तिबि चाला लेसुङ् । खोकि ति थामु ग्यकुप् तिबाला डिक्स्यित् सिनि “खिराङ् दि पिन् हिन्सिनाङ् च्यिले थामु ग्यापु हिन्?” सिनि टिसुङ् ।
27
हिन्सिनाङ् राङ्गी युल्बाला ना तोङ्गुप् तिला सिनि तिकि खोला पुल्नि सिक्यासुङ् “ख्योला सिकि ङिरे ओङ्ज्येन् क्यिरुप् ताङ् ठिम् क्योङ्गुप् मि जोसुङ्?
28
खाङ् ख्यरेकि दाङ् ति मिश्रिला सेतुप् दगे क्यानि ङाला साङ् सेतुप् सेम् वे?
29
दि कोनि मोशा ति तेसुर टोसुङ् । तिति मिद्यान् लुङ्बाला टोनि गाल्सुङ् तेमि खो ते पुज्युङ् ङिकि पापा च्युङ्सुङ् ।
30
लो खाल्ङि क्याङ्सीमा सिनै लाकि दासा थेरिला छिकिन् क्यिरुप् दोङ्बी नाठिला देवाच्येन्कि थुज्यिक् तिकि दङ्ला थोङ्सुङ् ।
31
मोशाकि ति मे वुरुप् थोङ्सिमा तिला याम्छेन् लासुङ् । ति ल्हाप्ला ति चाला गाल्सिमा तिकि कन्ज्यक्कि ओरु कोसुङ् ।
32
”ख्यरे पागावा तिबा अब्राहम, इसाहक ताङ् याकुबकि कन्ज्यक् ति ङाराङ् हिन् ।“ ति कोनि मोशा ह्रुनि तिकि ल्हाप् नावा माक्या ।
33
कन्ज्यक्की तिला सिक्यासुङ्, “ख्यरे काङ्बी काङ्स्युप् पित् च्यिले सिसिन् ख्योरुङ् लानि हतुप् दासा ति दासा चेङि हिन् ।
34
ङेकि मिश्रला हतुप् ङे मितिबि दुक्पा थोङ्नी वे । ङेकि तिबि दुङाल कोनि वे तेमे ङा तिबाला थार्वा तेरुप्ला मार् पाम्नी हनि वे । ङा ख्योरुङ्ला मिश्रला तोङ्गीत ।“
35
दि मोसाला तिबिकि सेम्ला माला, तिला तिबिकि सिक्यासुङ् , “सिकि ख्योरुङ्ला ओङ्ज्येन् क्यिरुप् मि ताङ् ठिम् क्यिरुप् मि जोसुङ् ?”, तिला राङ् कन्ज्यक्की ओङ्ज्येन् क्यिरुप् मि ताङ् थार्वा तेरुप् मि ङिकार जोनि ताङ् वे । नाठिला मोशा चाला क्षारुप् देवाच्येन्कि थुनेसुर् कन्ज्यक्कि तिला ताङ्सुङ् ।
36
मिश्र, ग्याम्छो मार्मु ताङ् दासा थेरिला लो खाल् ङि साक् याम्छेन्कि लाका ताङ् ता तिबा क्षा तेन्नि मोशाकि तिबाला मिश्र नेसुर् पाङ्ला थेन् टि लेसुङ् ।
37
दि ति मोशा तिराङ् हिन् तिकि इस्राएलीतिबाला सिक्यासुङ्, “कन्ज्यक्की तिबि उज्युनुक् तिबिकि पार्ला ङा दगे लुङ्तेम्बा मेरा च्यिग् यार लोङ्गीत ।“
38
दि ति मि तिराङ् हिन्, ति ति दासा थेरिला हतुप् मिरिग् तानि देवाच्येन्को थु साङ् नक् ति ति सिनै लाला खो तानि ताम् क्याबु हिन् । दि ति मि तिराङ् नक् खो ति अरे पागाबा तिबा तानि हतुप्जा, दि ति मि ति राङ् नक् खोला ओरुङ्ला तेरुप्ला सुङ् सेन्बु तिबा ङेसुङ् ।
39
दि ति मि तिराङ् नक्, अरे पागावा तिबा तिकि काला माङ्येन्। तिबिकि तिला दसुङ् तेमे तिबा राङ्गि सेम्ला मिश्रला लकुप् नासाम् क्यासुङ् ।
40
ति तुज्येला तिबिकि हारुन्ला सिक्यासुङ् “ङिराङ्ला गमा क्यिरुप् ल्हा तिबा जो । ङिराङ्ला मिश्र लुङ्बा नेसुर गमा क्यानि टिँ हुङ्गुप् दि मोशाला खाङ् क्याते ङिराङ्ला क्षा मेत् ।”
41
ति ङिमाला तिबिकि पिउकि कु ज्यिक् जोसुङ् तेमे तिबा राङ्गी क्याबु लाकाला गा क्यासुङ् ।
42
हिन्सिनाङ् कन्ज्यक् तिबा नेसुर खा ग्युर्सुङ् तेमे तिबाला नाम्गि कार्मा तिबि लाका क्यिरुप् ताङ्सुङ् । लुङ्तेम्बाकि थेप् तिबाला टिनि वेः “इस्राएलकि गिपातिबा, खाङ् खिरेकि ङाला लो खाल्ङि साक् दासा थेरिला रिदाक्की जिन्बा ताङ् ज्येन् ज्यिन्बा तिबा पुल्नि वे?”
43
”खिरेकि मोलोक्कि दासा चेङिला ताङ् ल्हा रेफनकि कार्मा ताङ् राङ्गी साङ् देकुप्ला जोबु कुतिबाला सेम्ला ज्याक्सुङ् । तिकि क्यिसाला ङा खिराङ्ला बेबिलोन् सिनाङ् थारे ज्येन् लुङ्बाला टिनि डित ।“
44
दासा थेरिला अरे पागाबा तिबिकि पाङ्बुकि दासा चेङि नक् ति ति कन्ज्यक्कि मोशाला का बिन्दुप् ताप्कि खोकि क्षा तेन्दुप् ताला ल्हानि जोबु हिन् ।
45
ङिरे पागाबातिबि ङोला तिबिकि दि टाकुरला यहोशुतानि राङ् दि लुङ्बाला खसुङ् । ङिरे पागाबा तिबि दङ्ला कन्ज्यक्की ति मिरिग् तिबाला पाङ्ला थेन्नी तिबि लुङ्बा ङिरे मिरिग् तिबि लाक्ला बिन्दुप् ठला दि तुक्षेन् क्षुङ्गुप् यिन् । दाउदकि ङो साक् सिन्दक् राङ् च्युङ्सुङ्,
46
तिला कन्ज्यक्कि थोङ्दाङ्ला सेम्सो ङेसुङ् तेमे तिकि याकुबकि कन्ज्यक्ला सिनि देसा दासा जप्ला गङ्बा स्युसुङ् ।
47
यिन्सिनाङ् सोलोमनकि कन्ज्यक्ला सिनि खाङ्बा ज्यिक् जोसुङ् ।
48
यिन्सिनाङ् लुङ्तेम्बातिबि सिक्याबु दगे तेरि सिनाङ् थ्व कन्ज्यक् लाक्पि जोबु खाङ्बातिबि नाङ्ला मेदेउ;
49
‘देवाच्येन् ङेकि ग्याल्ठिक् यिन्, तेमे जाम्बुलिङ् ङेकि काङ्बा योप्सा यिन् । खिरेकि ङाला सिनि च्येन्डक् खाङ्बा जो थुप्क्यि ?’ सिनि चावा कन्ज्यक्कि सिनि वे । तिकि तेन्दक् ति खाङ् सिसिन्, ‘ङे ङा सोसा दासा खेन् वे ?
50
खाङ् दि तेरिग् ताम् तिबा ङे लाक्पा थनि राङ् जोबु मिन?’
51
ओए खनाक्पा तिबा, सेम् ताङ् नाम्ज्यक्कि च्येत्पा माक्याबु तिबा, खिराङ् नाम्लाङ् थु चेङिकि खाला लानि वे। खिरे पागाबातिबिकि चुक् क्याबे खिरे साङ् तुक् राङ् क्यिइँ वे ।
52
खिरे पागाबा तिबि लुङ्तेम्बा च्येन् दिकि दुक्पा माबिन्? तिबिकि दिक्पा मेतुप् मितिबा हुङ्गुप् सिना साङ् गमाला हबु लुङ्तेम्बातिबाला सेसुङ्। तिकि क्यिसाला तान्दा खिराङ् खोला जिनक् जप् ताङ् खोला सेतुप् मि च्युङ्नी वे ।
53
खिरेकि देवाच्येन्की थुथनी जोबु ठिम् ङेनि साङ् तिला माङ्येन् ।
54
छक्पाकि मितिबिकि दि ताम् तिबा कोसुङ् तेमे तिबा स्तिफनसला थोङ्नी सेम्ला मोडो क्यासुङ् तेमे तिबिकि सा दार्सुङ् ।
55
यिन्सिनाङ् तिकि थु चेङिकि क्येङ्नी देवाच्येन् थाका ल्येमु क्यानि ल्हासुङ् तेमे कन्ज्यक्की क्षेपा ताङ् येशुला कन्ज्यक्कि लाक्पा याबि थाकाला लानि देन् हतुप् थोङ्सुङ् ।
56
तेमे स्तिफनसकि ‘ल्होसा, ङेकि देवाच्येन् खा पेनी हतुप् ताङ् मिकि पुज्युङ्ला कन्ज्यक्कि लाक्पा याबिथाका लानि हतुप् थोङ्नी वे ।‘
57
यिन्सिनाङ् छक्पाकि मि तिबा ओरु गेर्पु तेन्नि चेर ग्याप्सुङ्; तेमे तिबिकि राङ्गी नाम्ज्यक् उप्सुङ् तेमे तिबा तिकि खाला हुर्सुङ् ।
58
तिबिकि तिला ग्यासा नेसुर पाङ्ला टि लेसुङ् तेमे तिला दो ग्याप्सुङ् । थोङ्गुप् मितिबिकि शाउल सिरुप् मि ज्येन्दि काङ्बी चाला राङ्गी फिकि माज्यातिब पिनि ज्याक्सुङ् ।
59
तिबिकि स्तिफनसला दोप्स्युर ग्याकिन् हतुप् ठला तिकि नाम्लाङ् कन्ज्यक्ला रेन्सुङ् तेमे ‘चावा येशू, ङेकि नाम्स्यीला लाङ्ट क्यी ।‘
60
तिकि टिमुङ् चुनि थर ग्याप्नी, ‘ए चावा, तिबिकि दि दिक्पि टिप् मफक्स्यीत् ।‘ दोजोज्यिक् सिक्यासिमा तिकि उ गाल्सुङ् ।