लिउ ३
1
ङिर्मुकि क्षुज्यि सुम्जोला पत्रुस् ताङ् युहन्ना सँ~ देपुप्ला ल्हाखाङ्ला डोइँ नक् ।
2
केइँ नेसुर् राङ् युक् मुथुपुप् मि ज्यिक्ला ते: कि गो च्यिग्ला ङिमि टाङ् ख~नि ज्यकिनक् । ति गो तिला 'गो पामु' सिनक् । ति ल्हाखाङ्ला वुङ्गुप् मि तिबाला टाङ्गा लोङ् थुप्स्यित् सिनि तुक् क्यिनक् ।
3
तिकि पत्रुस् ताङ् युहन्नाला ति ल्हाखाङ्ला डप् छा~लुप् थोङ्नि तिबाला टाङ्गाला~ङ्सुङ् ।
4
पत्रुस ताङ् युहन्नाकि तिबि थाकाला ग्युर्नि "ङिराङ्ला ल्हो" सिनि सिक्यासुङ् ।
5
ति मिकि तिबा नेसुर् सामा तिबा ङेक्यिते: नोनि तिबाला ल्हासुङ् ।
6
ते:मे: पत्रुसकि तिबाला "ङे:लाक्ला से~र ताङ् ङुल् मेसिनाङ् ङाला वतुप् ती ख्योरुङ्ला तेर्कित । नासरत्कि येसु ख्रिष्टकि मि~न्ला यु ।" सिनि सिक्यासुङ् ।
7
पत्रुस्कि तिकि लाक्पा याबाला जिम्नि यार् ला~ङ्सुङ् ते:मे: तिकि काङ्बा ति स्यारि राँबु गाल्सुङ् ।
8
ति मि ति खक्ला~नि युकुप स्युसुङ्, ते:मे: पत्रुस् ताङ् युहन्ना तानिराङ् युकिन्, फिरिन् ताङ् कन्ज्यक्ला सोवाँ देकिन् ल्हाखाङ् नाङ्ला स्युसुङ् ।
9
मि तिबिकि तिला युकिन् वतुप् ताङ् कन्ज्यक्ला सोवाँ देकिन वतुप् थोङ्सुङ् ।
10
खो ति ,ल्हाखाङ्कि गे~चाला लोँगिन् देन् अतुप् ताङ् तिला अतुप् तम्ला याम्छेन् लाबु ति मि तिराङ् नक सिनि तिबिकि थोङ्सुङ् ।
11
तिकि पत्रुस ताङ् युहन्नाकि लाक्पा जिँबु थोङ्नि, तेरिग् मितिबा अाला याम्छे:न् ला~नि तिबा अतुप् सोलोमनकि लाङान खाला क्ष~नि लेसुङ् ।
12
पत्रुसकि ति थोङ्सिमा मितिबाला खा~लेन् क्यानि "अोए इस्राएलकि मितिबा, खिराङ्ला च्यिले: याम्छेन् ला~बु हिन् ? च्यिले: खिरे:कि तिला ङिरे:कि राङ्गि ङार् ताङ् क्षोकि युकुप् जोबु दके क्यानि ङिराङ्ला च्योरि~ ल्हाँ देतुप् हिन् ? सिनि सिक्यासुङ् ।
13
अरे: पागाबा अब्राहम्, इसहाक् ताङ् याकुबकि कन्ज्यक्कि यक्पु येशुला शोवाँ च्युङ् च्यितुप् वे । खो ती खिरे:कि पिलातस् ला च्याक् बिन्सिमा खोकि तिला ताङ्तोङ्गुप् छाल्सिनाङ् खिरे:कि मिन् तोङ्गुप् मेःङ्गु सिनि सिक्याबु ति खोराङ् हिन् ।
14
खिरे:कि चेङि ताङ् क्षो~कि मिला तोङ्गुप् मे:ङ्गु सिनि सिक्यासुङ् ते:मे: खरे: छापुला मि सेतुप् तिला ताङ्तोङ् सिनि गङ्बा स्युसुङ् ।
15
खिरे:कि कन्ज्यक्कि स्यिवा नेसुर लाङ्गुप् मिजिकि ग्याल्बि पुज्युङ्ला सेसुङ् त। तिकि किदुक् ती ङिराङ्ला क्षावे: ।
16
ता खरे: मि~न्ला क्याबु मो~बाकि दि मिला राम्बु जोसुङ् , तिला खिरे: थोङ्गु ते:मे क्षा साङ् वे: । येशुला दिकि क्याबु मोबाकि क्यिसाला खिरे:मिङाला राङ् दिला टे:क् च्यितुप् हिन् ।
17
उज्यु नुक्तिबो, खिरे:कि खिरे: खाला अोङ्ज्ये:न् क्यिरुप्तिबि दके: रिक्पा मे:ता लाका क्याबु ती ङाला क्षावे: ।
18
हिन्सिनाङ् खरे: ख्रिष्टकि दुक्पा खुर्गोक्यु सिनि ति तेरिग् लुङ्ते:म्बातिबि खानेसुर् कन्ज्यक्कि तङ्ला राङ् स्येतुप् ती हान्दा खोकि छे च्यिनिवे: ।
19
तिकि क्यिसाला, सेम् ग्युर्नि लक्सिन् खिरे: दिक्पा ताक्यित, ते:मे: चोवो कन्ज्यक्कि छ्यार्ताङ् नेसुर् साम्बा जप् तुज्ये ति हुङ्स्यिता ।
20
ते:मे: ठिला च्यिन् हतुप् ख्रिष्ट येशुला खिरे: थाकाला तोङ् थुप्कित ।
21
तेरिग् ताम् तिबा लोङ् साम्बा मागाल्बा साक् खोला दे:वाच्ये:न्कि लिङ्गोक्यु, तिकि कला कन्ज्यक्कि खरे: लुङ्ते:म्बा चेङितिबा थ~नि अाला तङ्नेसुर् राङ् ताम् क्यासुङ् ।
22
मोसाकि 'कन्ज्यक्कि खिरे: उज्युनुक्तिबि पार्ला ङा दकेराङ् लुङ्ते:म्बाला तोङ्गित । खरे:कि खिराङ्ला सिरुप् तेरिग् ताम्तिबा ङ्येन्गोक्यु ।
23
ति लुङ्ते:म्बिकि सिक्याबु मेःङ्ये:न्दुप् मिरे: रेरेला मितिबि पार्ला थेरि ना~तोङ्गित ।' सिनि सिक्यासुङ् ।
24
शमुएलनेसुर् खरे: तिङ्ला लेपु तेरिग् लुङ्तेःम्बातिबिकि दि ङिन् तिबि कला स्येन्वे ।
25
खिराङ् लुङ्ते:म्बा ताङ् कन्ज्यक्कि खिरे: पागाबा तिबाला क्यालुप् नाकि पुज्युङ्दिबा हिन् । खोकि अब्राहम्ला 'ख्यरे: गिपानेसुर् राङ् दि जाम्बुलिङ्कि तेरिग् टङ्बातिबाला मलाम थोप्कित ।'
26
कन्ज्यक्कि खरे: यक्पुला ते:क्सिमा खिरे: पार्ने तेरिग्ला खिरे:कि लाका मे:ले:बानेसुर् लक् च्यिनि खिराङ्ला मलाम् तेरुप्ला खोला तङ्ला खिरे: चाला ताङ्सुङ् ।