¹ एक शबाथ दिनमे-बा फरिसीके कोई एक जनि शासकको घरसे खान गओ ।फरिसी बाकी चेवामा बैठेरहए । ² जलग्रह रोगसे पिडित भव एक जनि आदमी बक सामने रहए । ³ येशु व्यवस्थापक पण्डितसे और फरिसीसे पुच्छी “शबाथमे अच्छो करन उचित हए कि नाहए ? ⁴ पर बे चुप लागेरहए ।और बा रोगिके शरिरमे हात धरके अच्छो करि और बाके जान दै । ⁵ तव बा बिनसे कहि, "तुमर मैसे अपन बर्धा औ गधा सबाथ-दिनमे कुईयामे गिर गओ कहेसे बाके तुम ना निकारए गे ?" ⁶ तव बे जा बातकी जवाफ न दैपाई । ⁷ तव भोजमे आए भए पहुना आदरको स्थान छानि देखके बा बिनके एक कहानी कहि । ⁸ “बिहाको भोजमे आए भए पहुना आदरको निउतो पाएहौ कहेसे आदरको स्थानमे मत बैठौ ! तुमसे जाधा ईज्जत बारो आदमी बा हुवा निउतो पाई हुईहए । ⁹ जब बुलाए भए दोनो जनीआमङ्गे बा तुमसे आएके काहाबैगो , जिनके बैठन ठउँ देबौ' और तुम त शर्मके मारे सबसे तरेको स्थानमे बैठन पणैगो । ¹⁰ पर जब तुम निउतो पाएहओ , जाएके तरेके ठाउँमे बैठओ , और मेजमान आएके तुमसे कहबैगो ; ए मित्र उपर जाएके बैठौ । बा समय (बेरा) तुमरसंग खानु खान बैठन बारेक सामने तुमर इज्जत होबैगो । ¹¹ कहेकी हरेक जो अपनएके उचो बनातहए बा निचो होबैगो , और अपनएके निचो बनानबारो उचो बनैगो । ¹² तव बाके निउतो देनबारेसे फिर बा कही ; तुम सबेरे या साँझाके भोज लगातपेती, अपन मित्रके , अपन ददाभैयाके औ तुमर कुटुम्बके औ धनी पडोसीके निउतो मतदेबौ नत बे फिर सट्टामे तुमके निउतो दैके तुमर गुन चुकाएदेहए । ¹³ पर जब तुम भोज लगातपेती , गरिब , लुला , लङडा , अन्धा के बुलाओ , ¹⁴ और तुम अशिष पाबैगे , कहेकी बे तुमर गुण घुमाए ना पामङ्गे । पर मृत्यृसे धर्मीको पुनरुत्थान होत तुम जाको प्रतिफल पाबैगे ।“ ¹⁵ बाकेसंग खान बैठन बारे मैसे एक जनी जे बात सुनके कही, "बा धन्य हए , जो परमेश्चरको राज्यमे भोज खाबैगो ।" ¹⁶ पर बा बासे कही ; कोइ एक आदमी सांझक एक बणो भोज तयार करी ,और बेढमके निउतो दई । ¹⁷ जब भोज तयर भओ बा अपन नोकरके भोजन खान समयमे निउतो पाए भएके आइसो बुलान पठाई ; सब चिझ तयर हए ।' ¹⁸ पर बे सब समान रुपमे एकैहानी बहाना बनानलागे । पहिलो बासे कही , मए एक खेत मोल लओ हौ, मोके बा देखन जान पणैगो , मए बिन्ती करत हओ, मोके माफ करौँ । ¹⁹ फिर दुसरो कही ,मए पाँच गोई ब्रधा किनो हओ , मए बे देखन जएहौ । मए बिन्ती करत हओ , मोके माफ करौँ’ ²⁰ फिर एक और कही, मए बिहा करो हौ , जहेमारे मए नअए पएहौ ।' ²¹ तव नोकर आएके अपन मालिकके जा बात कहीदैइ तव बा दिक्काएके अपन नोकरसे कही , सहेरके डगरमे और गल्लीमे जल्दी जा और गरीब , लुला ,अन्धरा लङडाके हिया भितर लिया ‘ ²² तव नोकर कही , हजुर तुमर आज्ञा करो भओ जैसो काम भव हए , फिरभि और ठाउ खाली हए।' ²³ मालिक नोकरसे कही , मेन डगर और गल्लीमे हुईसे जाएके आदमीके भितर आन कर लगाओ , और मिर घर भरए । ²⁴ कहेकी मए तुमसे कहत हौ , निउतो पाएभएसे कोई फिर भोजको स्वाद चाखन ना पामङ्गे ।' ²⁵ आदमीको बडो भीण बकसंग जातरहए , और बा घुमके बिनसे कही , ²⁶ अगर कोई मिरठीन आबैगो , और अपन दौवा अईया , बैयर , लौणा – लौडिया और ददाभैया , दिदीबहिनीयाके अपन प्राणके समेत तुच्छ नठानैगो कहेसे , बा मेरो चेला न हुईपए हए। ²⁷ जौन आदमी अपन क्रुस बोकके मेरे पिच्छु ना लगत हए कहेसे , बा मेरो चेला न हुईपए हए । ²⁸ तुम मैसे कौन हए, जौन कोई एक धरहरा बनान इच्छा करतहए कहेसे , बा धरहरा बनाएके खतम करन खर्च अपनठीन हए कि नहए कहिके का बा अग्गुसे हिसाब ना करहए का ? ²⁹ नत बा जग बैठाएके पिच्छु निभटाए नापाईहए कहेसे बाके ,देखके सबए बासे अइसो कहीके हँशी उणए हए और काहमङ्गे, ³⁰ ’जा आदमी बनान त लागो पर निभटाए ना पाइ।' ³¹ औ कौन राजा हुइहए जो राजासँग लडई करन जात अपनसँग भव दश हजार बाके विरुद्धमे आनबारो बीस हजार सेनासे लडई करपएहौँ कि नकरपएहौ कहिके पहले बैठके सल्लाह न करहए का ? ³² बा नकरपएहए कहेसे , बा दुसरो राजा दुर होत मिलापको शर्त पुछन राजदुत पठाबैगो । ³³ जहेमारे तुमर मैसे अपनसँग भव सब चिझ नछोणैगो कहेसे बा, मेरो चेला ना हईपए हए। ³⁴ नुन अच्छो हए, और नुन खल्लो भव कहेसे , कासे बा नुनाईन हुइहए ? ³⁵ बा न त जमिनके ताहि , न खादके ताहि काम लागनबारो हुईहए । आदमी बाके मिलाएदेतहए । जौनके सुनन के कान हए , बे सुनए ।”