¹ बही समय हुवा कित्तो उपस्थित रहए , जौन बे गालीलीके बारेमे बासे कही , जो पिलातस हत्या करके बिनको खुन बलि भव पशुको खुनकेसंग मिलाएदैइ रहए । ² तव येशु बिनके जवाफ दाईके कही ,“बे अइसो कष्ट भोगी कहेसे , का तुम मानतहौं , जे गालीलीनके और सब गालीलीसे जाध्दा पापी हए ? ³ मए तुमसे कहतहौँ , अइसो नाहए , पर तुम पश्चात्ताप ना करहौ कहेसे तुम सब अइसीए नाश होबैगे । ⁴ औ का तुम मान्त हौं , बे अठार जनी , जो सिलोआममे धरहरा गिरके मरे रहए , कि बे सब यरुशलेमवासी मैसे जध्दा अपराधी रहए ? ⁵ उइसो नाहए , पर मए तुमसे कहतहौँ , तुम पश्चात्ताप ना करहौं कहेसे , तुम सब अइसीए नाश होबैगे । ⁶ येशू जा काहानी कही ; “कोई आदमी अपनो दाखबारींमे एक दाखको लगाई रहए । बा पेणमे फल फरो कि कहिके बा आऔ, ⁷ तव बा मालिसे कहि , तीन वर्ष हुइगओ , मए जा दाखको फल ठुणत हौ ,पर ना पाओ । जाके काटके गिराएदेओ , जा जमिन कहे अगोटे हए ?‍‍ ⁸ पर माली कही , “हजुर , जाके और एक वर्ष रहन देओ । मए जाके आसपास खोदके मल डारंङ्गो, ⁹ और तव फल फलहै कहेसे ठिकै हुईहए, ना फलहै कहेसे तुम जाके काटके गिरायदीओ ।" ¹⁰ येसू शबाथ-दिन कोई एक सभाघरमे बा शिक्षा देत रहए। ¹¹ हुवा एक बैयर रहए,जोके अठारा बर्षसे बाके कमजोर करन बालो भुत लगो रहए । बा ढुकी हुईगई रहए,और अपन पुरो रुपसे सुध ना हुई पात रहए। ¹² येशु बाके देखी ,और बुलाएके कहि “ए नारी ,तए अपनो कमजोर से मुक्त भव ।" ¹³ तव बा बक उपर अपनी हात धरी,और बा तुरन्तै सुध हुईगई और परमेश्वरको प्रशंसा करन लागि। ¹⁴ सभाघरके शासक गुस्सा भए, कहेकी येशु शबाथ-दिनमे अच्छो करि रहए,और बे आदमीसे कहि , “काम करन छै दिन हए । जहेमारे जा छै दिन भितर आएके अच्छो होबौ,शबाथ- दिनमे ना ।" ¹⁵ पर प्रभु जवाफ दई, कपटी तुम ! तुमर मैसे कौन शबाथ दिनमे सार और तबेलासे अपन बर्धा कि गधा खोलके पानी पिबान ना लैजात हए ? ¹⁶ अब्राहम कि जा लौडिया जो अठारा बर्ष तक शैतानके बन्धनमे रहए , शबाथ-दिनमे जा बन्धनसे ,बा मुक्त होन नाहया का ?" ¹⁷ जब बा जा बात कहि, बके बिरोधी सबए सर्म मे पणगए, पर बाको करोभव सब महिमा मए काममे आदमी आनन्दित भए । ¹⁸ तव येशू कहि “परमेश्वरको राज्य का जईसो हए ? बाको तुलना मए कैसे करऔ ? ¹⁹ बा रायाक बिजको एक दाना जईसो हए , जो एक आदमी लईके अपन बारिमे लगाई,और बा बढके एक रुखा हुईगओ और आकाशके चराचुराङ्गी (चिराईया)बाको हाँगामे घुरघुसला बनाई ।" ²⁰ फिर बा कहि “परमेश्वरको राज्यके मए कौनसे तुलना करौ ? ²¹ बा खमिर जैसो हए,जो एक स्त्री पच्चिस किलो चुनमे मिलाई,और पुरो चुन खमिर हुईगओ।" ²² अब शहर-शहर और गाउ-गाउ हुईके यात्रा करतए शिक्षा देत बा यरुशलेम घेन गओ। ²³ कोई एक जनि बासे पुछि, “प्रभु का उद्धार पान बारो थोरि ही हए ?" पर बा बिनसे कहि ²⁴ पतरो फाटकसे जान प्रयाहस करओ ,काहेकी मए तुमसे कहत हौ , गजब जनि घुसन ढुणङ्गे , पर ना जा पए हए । ²⁵ एक बार घरको मालिक उठके फाटक बन्द करके पिच्छु ,तुम बाहिर ठाणके अईसी कहात फाटक ढक ढकाबईगे , प्रभु हमर ताहि फाटक खोलदेओ , ताकि हम भितर अए सकै। , और बा जवाफ दैके तुम कहाबैगो “मए तुमके ना चिनत हौ औ तुम काहासे आए हओ ? ²⁶ तव तुम कहाबैगे हम तुमर सामने खाए और पिए ,और हमर गल्लीमे तुम शिक्षा दए रहौ ।' ²⁷ बा कही , 'मए तुमसे कहत हौ ,तुम कहाँसे आए हौ, मए तुमके ना जानत हौ । दुष्ट काम करनबारे, मोसे दुर होबौ ।' ²⁸ “जब तुम अब्राहम इसहाक,याकुब और सब अगमबक्ताके परमेश्वरको राज्यभितर देखैगे, तव तुम अपनै बाहिर फेके जईहौ ,तव तुम बिलाप करै गे और दाँत किटकिटा बैगे । ²⁹ आदमी अगर पछार सिरे और दखिन्नसे आएके परमेश्वरको राज्यको भोजमेस बैठाङ्गे। ³⁰ देख,पच्छुबारो अग्गु और अग्गु बारो पिछु हुईहए । ³¹ तुरन्तय कुछ फरिसी आएके बासे कहि, बहुनासे निकरके चले जाबऔ, कहेकी हेरोद तुमके मारन चहात हए । ³² बा बिनसे कहि, “जाएके बा सेरा से कहा ,देख आज और कल मए भुतके भजामङ्गो और अच्छो करन बारो काम करङ्गो,तव तिस्रो दिन मेरो काम पुरो हुइहए । ³³ तव फिर आज कल और परसौ फिर मए लगातार देन जरुरी हए ,काहेकी येरुशलेमसे बाहिर कोई एकअगमबक्ताको मारन उचित ना हए । ³⁴ यरुशलेम ए यरुशलेम तए अगमबक्ताके मारत हए,और तिर ठिन पठाए भएके उपर पत्थर बर्सात हए ! जैसे मुर्गिया अपन बच्चनके पखमा तरे लुकात हए, उइसिए मए कित्तो चोटी तिर बालकके लेन इच्छा करो, पर तए ना मानो । ³⁵ देख , तेरो घर उजणो हए । मए तोसे कहत हौ,जब तक तए, "धन्य हओ प्रमप्रभुको नाउँमे आनबारो " ना कैहओ , तब तक मोके न देखैगे ।"