¹ Karon ang pulong ni Dios gipadayag kang Jonas nga anak ni Amitai, nga nagaingon, ² "Tindog ug adto sa Ninebe, kadtong bantogan nga siyudad, ug pagpamulong batok niini, tungod kay ang ilang pagkadaotan midangat na kanako." ³ Apan si Jonas mitindog aron moikyas gikan sa presensya sa Dios ug moadto sa Tarsis. Milugsong siya sa Joppa ug nakakaplag ug barko paingon sa Tarsis. Busa nagbayad siya sa pamasahe ug misakay sa barko aron mouban kanila paingon sa Tarsis, palayo sa presensya sa Dios. ⁴ Apan nagpadala ang Dios ug kusog nga hangin ngadto sa dagat ug nahimo kining kusog nga bagyo sa dagat. Sa wala madugay ang barko daw hapit na maguba. ⁵ Unya ang mga manlalayag nangahadlok pag-ayo ug ang matag tawo misinggit ngadto sa iyang kaugalingon nga dios. Ilang gilabay ngadto sa dagat ang mga karga sa barko aron mogaan kini. Apan si Jonas mikanaog ngadto sa pinakasuok nga bahin sa barko, ug didto siya naghigda ug nahinanok sa pagkatulog. ⁶ Mao nga ang kapitan miduol ngadto kaniya ug miingon kaniya, "Nganong natulog ka man? Bangon! Tawag sa imong dios! Basin makamatngon pa ang imong dios kanato ug dili kita malaglag." ⁷ Nag-ingnanay sila sa usag-usa, "Dali, magripa kita, aron masayran nato kung kinsa ang hinungdan niining daotan nga nagakahitabo kanato." Busa nagripa sila, ug ang ripa natunong kang Jonas. ⁸ Unya miingon sila kang Jonas, "Palihog sultihi kami kung kinsa ang hinungdan niining kadaot nga nagakahitabo kanato." Unsa man ang imong trabaho, ug asa ka man gikan? Unsa ang imong nasod ug kang kinsa kang katawhan nahisakop?" ⁹ Si Jonas miingon kanila, "Usa ako ka-Hebreohanon; ug adunay akoy kahadlok sa Dios, ang Dios sa langit, nga nagbuhat sa dagat ug sa uga nga yuta." ¹⁰ Unya misamot pa gayod sa kahadlok ang mga tawo ug miingon kang Jonas, "Unsa man kining imong nabuhat?" Tungod nasayod man ang mga tawo nga mipalayo siya sa presensya sa Dios, tungod mitug-an man siya kanila. ¹¹ Unya miingon sila kang Jonas, "Unsa man ang angay namong buhaton kanimo aron ang dagat molurang alang kanamo?" Tungod ang dagat nag-anam pa gayod ug kakusog. ¹² Si Jonas mitubag kanila, "Dayongi ako ninyo ug ilabay ako ngadto sa dagat. Unya ang dagat molurang alang kaninyo, tungod nasayod ako nga ako ang hinungdan nganong nagakahitabo kining kusog nga bagyo kaninyo." ¹³ Apan ang mga tawo mibugsay pa gayod aron mobalik ang barko sa baybayon, apan dili nila kini mahimo tungod misamot pa gayod ang dagat ug kakusog batok kanila. ¹⁴ Busa mitawag sila sa Dios ug miingon, "Nagpakiluoy kami kanimo, Ginoo, nagpakiluoy kami, ayaw kami paantosa tungod sa kinabuhi aning tawhana, ug ayaw kami himoang sad-an sa iyang kamatayon, tungod ikaw, Ginoo, nagbuhat kung unsa ang makapahimuot kanimo." ¹⁵ Busa ilang gialsa si Jonas ug gitambog sa dagat ug ang dagat miundang sa kabangis. Unya nahadlok pag-ayo ang mga tawo sa Dios. ¹⁶ Unya ang mga tawo nangahadlok pag-ayo sa Dios. Naghatag sila ug mga halad sa Dios ug naghimo ug mga pagpakigsaad. ¹⁷ Karon ang Dios nag-andam ug dako kaayo nga isda aron lamyon si Jonas, ug si Jonas anaa sa tiyan sa isda sulod sa tulo ka adlaw ug tulo ka gabii.