¹ Apan si Saulo, sa gihapon nagasulti ug mga hulga bisan sa pagpatay batok sa mga tinon-an sa Ginoo, miadto sa labaw sa mga pari ² ug nangayo kaniya ug mga sulat sa mga sinagoga sa Damasco, aron kung siya makakaplag bisan kinsa nga sakop sa Dalan, bisan lalaki o babaye, siya magdala kanila balik sa Jerusalem. ³ Samtang siya naglakaw, kini nahitabo sa dihang siya duol na sa Damasco, sa kalit lang midan-ag sa iyang palibot ang kahayag nga gikan sa langit; ⁴ ug siya natumba sa yuta ug nakadungog sa usa ka tingog nga nag-ingon ngadto kaniya, "Saulo, Saulo, nganong ginalutos mo ako?" ⁵ Si Saulo mitubag, "Kinsa ka, Ginoo?" Ang Ginoo miingon, "Ako si Jesus nga imong ginalutos; ⁶ apan barog, sulod didto sa siyudad, ug pagasultihan ka kung unsa ang angay nimong buhaton." ⁷ Ang mga tawo nga nagbiyahi uban ni Saulo nagtindog nga wala makatingog, nakadungog sa tingog, apan walay nakita. ⁸ Si Saulo mitindog gikan sa yuta, ug sa dihang gibuka niya ang iyang mga mata, wala na siyay makita; busa sila nag-agak kaniya nga ginunitan ang kamot ug gidala siya didto sa Damasco. ⁹ Sulod sa tulo ka adlaw siya dili makakita, ug siya wala mikaon ni miinom. ¹⁰ Karon adunay usa ka tinon-an sa Damasco nga ginganlan ug Ananias; ug ang Ginoo nakigsulti kaniya sa usa ka panan-awon, "Ananias." Ug siya miingon, "Tan-awa, ania ako dinhi, Ginoo." ¹¹ Ang Ginoo miingon kaniya, "Tindog ug adto sa dalan nga ginatawag ug Tul-id, ug didto sa balay ni Judas pangutana sa usa ka gingalan ug Saulo, usa ka tawo nga gikan sa Tarso; kay siya nag-ampo. ¹² Nakita niya sa panan-awon ang usa ka tawo nga ginganlag Ananias nga misulod ug nagpandong sa iyang mga kamot kaniya, aron makakita siya pag-usab." ¹³ Apan si Ananias mitubag, "Ginoo, ako nakadungog gikan sa kadaghanan mahitungod niining tawhana,unsa kadako sa kadaot ang iyang nahimo sa imong balaang katawhan sa Jerusalem. ¹⁴ Siya adunay katungod gikan sa pangulong mga pari sa pagdakop sa tanan nga ania dinhi kinsa nagatawag sa imong ngalan." ¹⁵ Apan ang Ginoo miingon ngadto kaniya, "Lakaw, kay siya usa ka pinili nga galamiton alang kanako, nga magdala sa akong ngalan sa atubangan sa mga Gentil ug sa mga hari ug sa mga anak sa Israel; ¹⁶ kay akong ipakita kaniya unsa ka dako ang iyang pagaantuson tungod sa akong ngalan." ¹⁷ Busa si Ananias mibiya, ug misulod ngadto sa balay. Gitapion ang iyang mga kamot ngadto kaniya, siya miingon, "Igsoong Saulo, ang Ginoong Jesus, nga nagpakita kanimo sa dalan satang ikaw diin nagpadulong, gipadala ako aron ikaw makadawat sa imong panan-aw ug mapuno sa Balaang Espiritu." ¹⁸ Dihadiha nangahulog ang sama sa mga himbis gikan sa mga mata ni Saulo, ug siya nakadawat sa iyang panan-aw; siya mitindog ug nagpabawtismo; ¹⁹ ug siya mikaon ug nabaskog. Siya nagpabilin uban sa mga tinon-an sa Damasco sulod sa pipila ka mga adlaw. ²⁰ Dihadiha iyang gimantala si Jesus sa mga sinagoga, nga nag-ingon nga siya ang Anak sa Dios. ²¹ Ang tanan nga nakadungog kaniya nahibulong ug miingon, "Dili ba mao man kini nga tawo ang naglaglag niadtong anaa sa Jerusalem kinsa misangpit niining ngalana?Mianhi siya dinhi aron dad-on sila nga ginapos ngadto sa pangulong mga pari." ²² Apan si Saul misamot ka gamhanan,siya ang hinongdan sa kagubot sa mga Judio kinsa namuyo sa Damasco pinaagi sa pagpamatuod nga si Jesus mao ang Cristo. ²³ Pagkahuman sa daghang mga adlaw, ang mga Judio naghiusa pagplano pagpatay kaniya. ²⁴ Apan ang ilang plano nahibaloan ni Saulo. Sila nagbantay sa mga ganghaan adlaw ug gabii aron sa pagpatay kaniya. ²⁵ Apan ang iyang mga tinon-an mikuha kaniya pagkagabii ug gipanaog siya agi sa pader, gitunton siya sa usa ka bukag. ²⁶ Sa dihang siya miabot ngadto sa Jerusalem, si Saulo misulay sa pag-apil sa mga tinon-an, apan silang tanan nangahadlok pa kaniya, wala motuo nga siya usa na ka tinon-an. ²⁷ Apan si Barnabas mikuha kaniya ug gidala siya ngadto sa mga apostoles. ug iyang gisuginlan sila giunsa ni Saulo pagkakita sa Ginoo diha sa dalan ug nga ang Ginoo nakigsulti ngadto kaniya, ug giunsa nga didto sa Damasco si Saulo misulti nga maisugon sa ngalan ni Jesus. ²⁸ Siya kauban nila, sulod ug gawas libut sa Jerusalem. Siya nagsulti nga maisugon sa ngalan ni Ginoong Jesus ²⁹ ug nagkiglantugi uban sa mga Judio sa Gresya; apan sila nagpadayon sa pagsulay sa pagpatay kaniya. ³⁰ Sa dihang ang mga kaigsoonan nasayod niini, sila nagdala kaniya palugsong ngadto sa Caesarea ug gipadala siya palayo ngadto sa Tarso. ³¹ Busa, ang simbahan sa tibuok Judea, Galilea, ug Samaria adunay kalinaw ug nalig-on; ug, nagalakaw sa kahadlok sa Ginoo ug sa kahupay sa Balaang Espiritu, ang simbahan mitubo ang kadaghan. ³² Karon nahitabo nga, samtang si Pedro miadto sa tibuok rehiyon, siya miadto palugsong usab sa balaang katawhan sa Dios kinsa namuyo sa lungsod sa Lida. ³³ Didto niya nakaplagan ang usa ka tawo nga ginganlan ug Eneas, kinsa naghigda sa iyang higdaanan sulod sa walo ka tuig, kay siya paralitiko. ³⁴ Si Pedro miingon kaniya, "Eneas, si Jesu-Cristo ang nag-ayo kanimo. Bangon ug hiposa ang imong higdaanan." Ug dihadiha dayon siya mibangon. ³⁵ Busa ang tanan nga nagpuyo sa Lida ug sa Saron nakakita sa tawo ug mibalik sila ngadto sa Ginoo. ³⁶ Karon didto sa Jopa adunay usa ka tinon-an nga ginganlan ug Tabita,( mahubad kini nga "Dorcas.") Kini nga babaye puno sa maayong mga buhat ug maluluy-on nga nagbuhat alang sa mga kabos. ³⁷ Kini nahitabo niadtong mga adlawa nga siya nasakit ug namatay; sa dihang nahugasan na nila siya, ila siyang gihaya sa taas nga lawak. ³⁸ Tungod kay ang Lida duol lang sa Jopa, ug ang mga disipulo nakadungog nga si Pedro tua pa didto, sila nagpadala ug duha ka tawo ngadto kaniya, paghangyo kaniya, "Kuyog kanamo sa walay langan." ³⁹ Si Pedro mitindog ug mikuyog uban kanila. Sa dihang siya miabot, gidala nila siya ngadto sa taas nga lawak, ug ang tanang mga babayeng balo nagtindog tupad kaniya nga nanghilak, gipakita kaniya ang mga kupo ug mga bisti nga gibuhat ni Dorcas samtang siya uban pa kanila. ⁴⁰ Si Pedro nagpagawas nilang tanan sa lawak, miluhod, ug nag-ampo; unya, miatubang ngadto sa lawas, siya miingon, "Tabita, bangon." Iyang gibuka ang iyang mga mata, ug sa dihang nakita niya si Pedro milingkod siya. ⁴¹ Unya gigunitan ni Pedro ang iyang kamot ug gipatindog siya; ug dihang gitawag niya ang mga balaang katawhan sa Dios ug ang mga babaying balo, gipakita niya kanila nga siya buhi na. ⁴² Kining butanga nasayran sa tibuok Jopa, ug daghang katawhan ang mituo sa Ginoo. ⁴³ Kini nahitabo nga si Pedro nagpabilin sa daghang mga adlaw sa Joppa uban sa usa ka tawo nga ginganlan ug Simon, usa ka magtatabas ug panit sa hayop.