¹ Pagkahuman niining mga butanga si Pablo mibiya sa Atenas ug miadto sa Corinto. ² Didto siya nakakaplag ug usa ka Judio nga ginganlan ug Aquila, usa ka tawo nga Ponto ang kagikan; siya bag-o lang miabot gikan sa Italya kauban ang iyang asawa nga si Priscila, tungod kay si Claudio nagmando sa tanang mga Judio nga mopahawa sa Roma.ug si Pablo miadto kanila, ³ ug tungod kay siya nagtrabaho sa samang bulohaton, siya mipabilin uban kanila ug nagtrabaho, kay sila mga magbubuhat ug mga tolda pinaagi sa patigayon. ⁴ Busa si Pablo nakiglantugi didto sa sinagoga kada Adlaw nga Igpapahulay. Siya nagdani sa mga Judio ug mga Griyego. ⁵ Apan sa dihang si Silas ug si Timoteo milugsong gikan sa Macedonia, si Pablo naggahin saiyang kaugalingon sa pulong, nga magpamatuod ngadto sa mga Judio nga si Jesus mao ang Cristo. ⁶ Apan sa dihang ang mga Judio misupak ug nanginsulto kaniya, si Pablo nagyabyab sa iyang bisti ngadto kanila ug miingon kanila, "Unta ang inyong dugo maanaa sa inyong kaugalingon nga mga ulo; Ako walay sala. Gikan karon moadto na ako sa mga Gentil." ⁷ Unya siya mibiya gikan didto ug miadto sa pinuy-anan ni tito justu, usa ka tawo nga nagsimba sa Dios. Ang iyang pinuy-anan sunod sa sinagoga. ⁸ Si Crispu, ang nangulo sa sinagoga nagtuo ngadto sa Ginoo.uban sa tanan nga nagpuyo sa iyang balay;Ug daghan sa mga taga-Corinto nga nakabati mahitongod niini nagtuo ug nabawtismohan. ⁹ Ang Ginoo miingon kang Pablo sa kagabihion pinaagi sa usa ka panan-awon, "Ayaw kahadlok, apan pagsulti ug ayaw pagpakahilom. ¹⁰ Tungod kay ako uban kanimo, ug walay bisan usa ang mosulay sa pagdaot kanimo, tungod kay ako daghan ug katawhan niini nga siyudad." ¹¹ Si Pablo nagpuyo didto ug usa ka tuig ug unom ka bulan, nagtudlo sa pulong sa Dios taliwala kanila. ¹² Apan sa dihang si Galio nahimong gobernador sa Acaya, ang mga Judio mialsa uban sa usa ka hunahuna pagbatok kang Pablo ug gidala siya didto sa atubangan sa hukmanan; ¹³ sila miingon, "Kining tawhana nangdani ug mga katawhan aron sa pagsimba sa Dios nga sukwahi sa balaod." ¹⁴ Apan sa dihang mosulti na si Pablo, Si Galio miingon sa mga Judio, "Kamong mga Judio, kung tinood kini usa ka butang nga daotan o usa ka krimen, kini makataronganon nga makiglabot kaninyo. ¹⁵ Apan tungod kay kining mga pangutana mahitungod sa mga pulong ug mga pangalan ug inyong kaugalingon nga balaod, husaya kini sa inyong kaugalingon. Ako wala nangandoy nga mahimong usa ka manghuhukom niining mga butanga." ¹⁶ Si Galio nagpapahawa kanila sa hukmanan. ¹⁷ Apan silang tanan nagkuha kang Sostenes, ang tigdumala sa sinagoga, ug gilatos siya sa atubangan sa hukmanan. Apan si Galio wala manumbaling kung unsa ang ilang gibuhat. ¹⁸ Si Pablo, pagkahuman ug puyo didto sa pila pa ka mga adlaw, mibiya sa mga kaigsoonan ug milawig padulong sa Syria kauban ni Priscila ug Aquila. Sa wala pa siya mibiya sa pantalan, sa Cencreae, gikiskisan niya ang iyang ulo tungod kay gikuha niya ang usa ka Nazaretnon nga panaad. ¹⁹ Sa dihang sila niabot sa Efeso, si Pablo mibiya kang Priscila ug Aquila didto, apan siya sa iyang kaugalingon miadto didto sa sinagoga ug nakiglantugi kauban sa mga Judio. ²⁰ Sa dihang ilang gipangutana si Pablo nga magpabilin sa taas pa nga panahon, siya nagdumili. ²¹ Apan sa iyang pagbiya kanila, siya miingon, "Ako mobalik pag-usab kaninyo kung kini kabubut-on sa Dios." Siya dayon milawig gikan sa Efeso. ²² Sa dihang si Pablo midunggo na sa Cesarea, siya mitungas ug nakig-abiabi sa Jerusalem nga simbahan ug unya miadto palugsong sa Antioquia. ²³ Pagkahuman niya ug gahin sa pila pa ka panahon didto, si Pablo migikan ug miadto padulong sa rehiyon sa Galacia ug Frigia ug nagdasig sa tanang mga tinon-an. ²⁴ Karon adunay usa ka Judio nga ginganlan ug Apolos, nga natawo sa Alejandria, niabot sa Efeso. Siya hanas kaayo sa pagpamulong ug makusganon diha sa Kasulatan. ²⁵ Si Apolos natudloan sa mga pagtulun-an sa Ginoo. Isip mainiton diha sa Espiritu, siya nagsulti ug nagtudlo sa tukma nga mga butang mahitungod kang Jesus, apan siya nahibalo lamang sa pagbawtismo ni Juan. ²⁶ Si Apolos nagsugod sa pagsulti nga walay kahadlok didto sa sinagoga. Apan sa dihang si Priscila ug si Aquila nakadungog kaniya, sila nakighigala kaniya ug nagpasabot kaniya sa dalan sa Dios sa mas tukma pa gayod. ²⁷ Sa dihang siya nagtinguha nga molabay sa Acaya, ang mga kaigsuonan nagdasig kaniya ug nagsulat sa mga tinon-an sa Acaya aron sa pag-abiabi kaniya. Sa dihang siya miabot, siya nagtabang ug maayo niadtong nagtuo pinaagi sa grasya. ²⁸ Si Apolos kusganong misupak sa mga Judio sa publikong debate, sa pagpakita pinaagi sa Kasulatan nga si Jesus mao ang Cristo.