¹ Po apa patalipo akolongiwa ku bala babo bali mwa Kilisitu Yesu. ² Pakuti ululaghilo lwa mbepo umwumi mwa Kilisitu Yesu luba bwile ukufuma mu lulaghilo ulwa butula nongwa nu bwufwe. ³ Pakuti shisho ululaghilo lutakabaghila ukubomba papo lukaba lwogha ukwendela mumubili, u Chala akabomba. Akatuma u Mwana wake mukabonekele aka mubiliuwa batula nongwa ukuba likemo lya mubili, sona akashitosha imbibi numubili. ⁴ Akabomba shishishi ukuti fifyo fikulondiwa mundaghilo pamu fingakwanilishiwa mu mwitu, utwe twe tutakwende ukufwana nakumubili. lole ukufwana na mwa mbepo. ⁵ Babo bakwikala ukufwana nakumubili babikite inyinong'ono shabo kufindu ifya kumubili, lole babo bakwikala ukufwana numbepo babikite inyinong'ono shabo pa findu fya mwa mbepo. ⁶ Pakuti inyinong'ono shisho shili ku fwa mubili sha bufwe, lole inyinong'ono shisho shili kufya mwa mbepo bwumi nulutekano. ⁷ Inyinong'ono shisho shili kufya mubili shikumukalalisha u Chala, papo shitakwiyisha ku ndaghilo sha Chala, sona shitangakwanisha ukubomba shishisho. ⁸ Bala babo bali kumubili batangamughobosha Chala. ⁹ Napapo, muta kumubili lole mwa mbepo, linga naloli u mbepo wa Chala akwikala mumwinyu. Lole linga yumo ata numbepo wa Kilisitu, bwo ta wake. ¹⁰ Linga u Kilisitu ali mumwako, umubili ghifwile ukufwana mulutengano wa mubili, lole u mbepo mwumi ukufwana nulutengano wa bugholofu. ¹¹ Linga u mbepo wa yuyo akumususha u Yesu ukufuma kubufwe akwikala mumwinyu, yula yula akamudsusha u Kilisitu ukufuma ku bufwe akwisa ukupa ubwumi kumibili yinyu imifwe ukwendela mwa mbepo wake, yuyonakwikala mumwinyu. ¹² Po ulu, bowamwitu, tuli ningongole, lole yita yakumubili ukuti twikalaghe ukufwana nu mubili. ¹³ Papo linga ukwikala nukufwana nu mubili, bwo uli papipi ukufwa, lole linga mwo mwambepo bwo waghogha imbombo isha mubili, po kwisa ukuba mwumi. ¹⁴ Pakuti abingi babo bakulongoshiwa nu mbepo wa Chala, bababa bo bana ba Chala. ¹⁵ Mutapokelite umbepo uwa batumwa ukutimwikalaghe nubwogha sona; lole mwapokelite umbepo uwa kukwitikisha, ukwendela muyuyo tukukolela, "Abba, Tata!" ¹⁶ U mbepo pamwene akutubikila ubuketi numbepo witu ukuti twe bana wa Chala. ¹⁷ Linga twe bana, po twe bingila pa chilingo, pachilingo cha Chala. Sona tuli pamupene pa chilingo nu Kilisitu, linga naloli tukutamiwa lumulwene nawe kokuti tukise sona tukweshiwe lumulwene nawe. ¹⁸ Popa ngushipima ukuti ukutamiwa kwa kabalilo aka kutangabaghila ukugheleshiwa nu bwikemo bubwo bukwia kusetuliwanga kukwitu. ¹⁹ Pakuti ukuliundilila ukwa lusubilo kuko ubupeli bukulindilila kwa kusetuliwa kwa bana ba Chala. ²⁰ Pakuti ubupeli bulambe kucha kubola, kutakaba kulonda kwake, lole kwa yuyo amulambikite, mu lusubilo ²¹ ukuti ubupeli pabwene bukwisa ukutabuliwa ukufuma mubutumwa ukuya pakubola, sona nukuti bakwisa ukubikiwa mubabuke ubwa bwikemo bwa bana ba Chala. ²² Pakuti tumenye ukuti ubupelibwoshi bukukemanukutamiwa nububafu pamupene mupaka ulu. ²³ Tabwo bubwo bwene, lole nutwe pamupane, twe tuli nifyabupe ifya bwandilo ifya mwa mbepo, tukwibusha mukati, bwo tukulindilkila umwa kutesha ukwa kusaliwa kwitu, nubupoki bwa mibili yitu. ²⁴ Pakuti mulusubilo lululu mwomwo tukapokeliwa. Po ulu ulusubilo ulwa kutesha ta lusubilo. Pakuti wini yuyo akusubilagha chicho akuchibomba? ²⁵ Lole linga tukusubila pachicho chitakuboneka, tukuchilindililagha nubukifu. ²⁶ Musila isa yiyiyi, umbepo wepe akutwafwa mu bwogha. Pakuti tutamenye mumwo tungiputilagha, lole umbepo mwene akutupyeleshekesha utwe musila yiyo tutangayilingania mumashu. ²⁷ Yula yuyo akutendela ubwumi akumanya inyinong'ono sha mbepo, papo akupyeleshekesha mubuyo bwa bandu abikemo aba Chala ukufwana nubwighane bwa Chala. ²⁸ Tushimenye ukuti ku bala babo bamughanite u Chala, ukubomba ifindu fyoshi pamupene ukuti fibendele akisa, kubala babo bakoliwe ukufwana nubwighane bwake. ²⁹ Pakuti bala babo akabamanya akisa sona akabapaghula baghelele mukabonekele nu Mwana, ukuti abe wi katote mukati mubo wamwabo abingi. ³⁰ Bala babo yuyo akabasala, bababa akabakolela sona. Bala babo yuyo akabakolela, bababa yuyo akabakwesha. Bala babo akabagholosha, bababa yuyo akabakwesha. ³¹ Po apa tungayughaki nisha findu fififi? Linga u Chala ali kulubafu lwitu, wini yuyo angalimbana nutwe? ³² Yula yuyo akamukanilila u Mwana wake lole akamutuma mubuyo bwa utwe tweboshi, ngimba angisa apotwe ukwendela muyuyo ukutupa ififndu fyoshi pa bubu? ³³ Wini yuyo angisa nubulongi kubabo basaliwe nu Chala? u Chala weyuyo mwene yuyo abagholoshishe. ³⁴ Wini yuyo akususha? U Kilisitu Yesu weyuyo akafwa--ukukinda apo, yuyo akasushiwa--yuyo ali kukakono aka mwisa aka Chala, sona yuyo akutupyeleshekesha utwe. ³⁵ Wini yuyo angatupaghulania utwe kulughano lwa Kilisitu? Ndamyo, pamu fyakubaba, pamu kufwimiwa, pamu sala, pamu kufwaluka, pamu bupalapala bumo, pamu ngwebo? ³⁶ Isa mumwo fisimbiwe, ''Panongwa ya uwe utwe tukughoghiwa pishiku lyoshi. Tukuwelengiwa isa wi nang'oshi yuyo akuya pakughoghiwa." ³⁷ Mufindu fyoshi ifi utwe tukilite naba ba poti ukwendela kuyuyo akatughana utwe. ³⁸ Pakuti une shingolite ukuti napapo bufwe, pamu bwumi, pamu bandumi, pamu iboma, pamu ifindu fifyo fikwisa, pamu akwisa, ³⁹ pamu ubutali, pamu ukutwiba, pamu ichipeliwa chiklichoshi, chitabaghile ukutulesania utwe kulughano lwa Chala, lulo luli mwa Kilisitu Yesu Malafyale witu.