¹ Fikabombiwa mwo ichilundilo cha bandu chikabungana nukumushungulila u Yesu nukupulukisha amashu agha Chala, akimilila palubafu pa nyanja ya Genesaleti. ² Akaketa amabwato ghabili gha gho bakaghaghusila palubafulwa nyanja. Abaloba baswi batakabamo bakasugha ifilepa fyabo. ³ U Yesu akingila mubwato bumo, bubo bukaba bwa Simoni akamubusha ukuti afumye pabwima nukububika papipi na mashi. Po akakila pase nukumanyisha abandu mukata mubwato. ⁴ Mwo amala pakuyugha, akati kwa Simoni, ''Egha ubwato nukubika pachishiwa ichitali nukubika ifilepa ukuti fikole.'' ⁵ U Simoni akamula akati, ''Songo, twabomba ubushiku bwoshi lole tutakolite nachimo, lole kumashu ghako titubike ifilepa.'' ⁶ Mwo babomba ifi bakakola iswi ishingi, po ifilepa fikakelukagha. ⁷ Po bakabasuma abakolaswi abanine bo bakaba mu bwato ubwungi ukuti bise nukubafwa. Bakisa nukwisusha amabwato ghoshi mabili, po fikanda pakwibila. ⁸ Lole u Simoni Peteli, mwo atesha ifi, akawa pase pafilunda fya Yesu akati, ''Fumako kukwangu pakuti ne mutula nongwa, Malafyale.'' ⁹ Pakuti akaba wakuswigha, naboshi babo akaba nawopabwingi bwaswi shisho bakakola. ¹⁰ Ukongania u Jamusi nu Yohani abana wa Zebede, babo bakaba nu Simoni. U Yesu akati kwa Simoni, ''Utakoghopaghe, papo ukufuma akabalilo aka timukolaghe abandu.'' ¹¹ Mwo babika anabwato ghabo pabwima, bakafileka fyoshi nukumukonga. ¹² Akabalilo kamo mwo ali muchighaba chimo, umulisha yuyo akaba namambombo akaba palapala. Mwo amutesha u Yesu, akaba pamaso ghake nukumuma akati, ''Malafyale, nandi ukulonda, ungambanga ukuti imbe mwelu.'' ¹³ Po u Yesu akatambalasha inyobe yake akamukola, akati, ''Ngulonda. Elupa,'' Papo napapo amambombo ghakamulekela. ¹⁴ Akamumanyisha ukuti manye akamubushe nayumo lole akamubusha ukuti, ''Buka isila yako, nukwibonesha kubaputi nukubika ikemesekesho lya kwelufishiwa kwako, isa mumwo u Mose akabalaghilila, ukuba chishimikisho kukwabo.'' ¹⁵ Lole akapango kake po kakafumushiwa kubutali, po ichilundilo cha bandu chikisa pamupene ukumupulikisha ukumanyisha kwake nukuposhiwa kumbina shabo. ¹⁶ Lole akabalekagha kabilikabili nukuya kubuyo bwa lungalangala nukwiputa. ¹⁷ Shikamanyikwa pishiku limo, mumashiku ghalaghala mwo akumanyisha, pakaba abafalisayi nabamanyishi ba lulaghilo bakikala palapala po bakafuma mukaya koshi aka Galileya, Yudeya nukufuma ku Yelusalemu. Amakagha Malafyale pakuposha ghakaba nawe. ¹⁸ Po abalisha bamu bakisa nu mulisha yuyo bakamunyamula pachinyasi akafwa imbafu, po bakalondagha isila ukuti bamwingishe mukati nukumughoneka pamaso gha Yesu. ¹⁹ Patayayagha isila ukuti bamwingishe chifukwa chachilundilo, po bakakwela pamwanya pakasale ka nyumba nukumwisha pamataliko, pachinyasi chake, pakati pa bandu, pamaso gha Yesu. ²⁰ Mwo atesha ulwiko lwabo, U Yesu akati, ''Mulisha, imbibi shako shaghobokeliwa.'' ²¹ Abasimbi nabafalisayi bakanda pakubushikisha bakati, ''Wini uyu yuyo akayugha ishakutuka? Wini angaghobokela imbibi lole u Chala umwene''? ²² Lole u Yesu, amanya fifyo bakwinong'ona, akabamula akati, ''Choni chicho mukwibusha ifi mundumbula shinyu? ²³ Choni chipepe ukuyugha ukuti, 'Imbibi shako shahowokeliwa pamu pakuti, 'Nyamuka endagha'? ²⁴ Lole pakuti mumanye ukuti u Mwana wa Mundu ali namaka pachisu cha pase pakuhobokela imbibi,''----akamubusha umulisha yuyo akafwa----''Ngukubusha, nyamuka, nyamula ichinyasi chako nuubuka kunyumba yako.'' ²⁵ Papo napapo akanyamuka pandashi pawo nukunyamula ichinyasi cho akaghonapo.Akabuka kunyumba yake, nukumughindika u Chala. ²⁶ Weshi akashigha nukumughindika u chala. Bakisula nubwogha, bakati, ''Twafiwona ififndu fifyo tutafibwenipo lumo umusughu.'' ²⁷ Mwo ififndu ifi fwabombiwa, u Yesu akafumapo pala akamwagha umusongesha songo yuyo akitishiwanga Levi ikile pa ten. Akati kukwake, "Ngonge.'' ²⁸ Po u Levi akanyamuka nukumukonga, akafileka fyoshi kunyuma. ²⁹ Po u Levi akamunoshela u Yesu ulusekelo ulukulu munyumba yake. Pakaba abasongesha songo abingi mulamula sona abandu bamu bo bakeghamila pa tebulo bakalya nawo. ³⁰ Lole abafalisayi naba simbi bakadandabulagha kubafundiwa bake, bakati, ''Choni chicho akulya nukung'wa nabasongesha songo sona nabatula nongwa?'' ³¹ U Yesu akabamula akati, ''Abandu babo balishe akisa batakulondagha umughanga; bene babo babinite. ³² Ndakisa pakwitisha abagholofu, lole ku babomba mbibi ukuti balape.'' ³³ Bakati kakwake, ''Abafundiwa wa Yohani utubalilo utwingi bakufungagha nukwiputa, sona na bafundiwa wa bafalisayi bope bunobuno. Lole abafundiwa wako bakulya nukung'wa.'' ³⁴ U Yesu akati kukwabo, ''Alipo yo ingabapangisha babo bitishiwe numwene bukwati ukufunga pala umwene bukwati akali ali nabo? ³⁵ Lole amashiku tighakise po umwene bukwati takeghiwepo ukufuma papabo, po amashiku ghalaghala tibakafunge.'' ³⁶ Po u Yesu akababusha ichili, ''Atalipo nayumo yuyo akamwenda ka muselekesa umupya nubombesha pakughambika iselekesha ingulu. Pala abomba ifi, tianyapule iselekesha ilipya, sona akamwenda kakwiselekesha imbya katangakolelana numwenda wa selekesha ingulu. ³⁷ Nayumo akubika ubwalwa bwa mafilu ubupya mufyakubikilamo ifikulu, pala abomba ifi, ubwalwa bwa mafilu ubupya bungapundisha ifyakubikilamo, sona ubwalwa bungakupuka, po sona ifyakubikilamo ifya bwalwa bwa mafilu finganangika. ³⁸ Lole ubwalwa wa mafilu ubupya bubikiwange mu fyakubikilamo ifipya. ³⁹ Atalipo nayumo yuyo nandi ang'wa ubwalwa bwa mafilu ubukulu akulonda ubupya, Pakuti akuti, 'Ubukulu bwisa.'''