¹ Po mumashiku ghalaghala, u Kesale Ogasitini akalaghila abandu boshi ukuti babelengiwe mufyisu fyoshi. ² Ukuwelenga uku kukaba kwabwandilo ukubombiwa mubulaghili bwa Kwiliniyasi uwa chisu icha Siliya. ³ Po weshi akaya mukaya kake nukusimbisha. ⁴ U Yosefe wepe akabuka ukufuma mu Galileya, mukaya ka Nazaleti, nukuya ku Yudeya, mukaya ka Deveti, kuko kukwitidhiwa ukuti Betelehemu, papo akaba wa munyumba sona muluko lwa Deveti. ⁵ Akaya kula ukusimbisha nu Maliya, yuyo akamushingila ukuti amweghe sona akaba nulufukwe. ⁶ Mwo bakali bali kulakula, akabalilo kakakwana akakuti asayiwe. ⁷ Akasayiwa u mwana umulisha, u mwana wake ukatote, akamufwingila numwenda nukumughoneka muchakulishikishamwo ing'ombe, papo kutakaba ubuyo munyumba iya bagheni. ⁸ Kukaba abatimi kulubafu kulakula ulwa chisu babo bakikalagha mutengele, bakalindagha nubushiku ing'oshi shabo. ⁹ Ubandumi uwa Malafyale akababonekela, po ubughindikiwa ubwa Malafyale bukabashungulila, po bakisula nubwogha. ¹⁰ Po ubandumi akati kukwabo, ''Koma okohopaghe, Papo nisa namashu amisa ghagho tighise nulusekelo ulukulu ku bandu boshi. ¹¹ Umusughu umupoki abapapiliwa mukaya ka Deveti! Wi Kilisitu u Malafyale! ¹² Ichi chocho chimanyikisho chicho mukwisa ukupeyiwa kukwinyu: Timuye mumwaghe umwana yuyo bamufwingite numwenda sona aghonite muchakulishikishamo ing'ombe.'' ¹³ Umwakunyomoha akaba poka nabandu babo bakaba bingi ukufuma ku mwanya, nukumutufya u Chala ukuti, ¹⁴ ''Ulughindiko kwa Chala uwa pamwanya, sona pachisu icha pasi pabe ulutengano pa bandu babo akuhoboka nabo.'' ¹⁵ Pakafika akabalilo akakuti abandumi bakafuma pakati pabo ukuya kumwanya, abadimi bakati ku uyu numunine, ''Satubuke lululu ku Betelehemu nukutesha ifindu ifi fifyo fyabombiwa, fifyo u Malafyale atumanyisha utwe.'' ¹⁶ Po bakapanga mwalubilo lubilo nukumwagha u Maliya, Yosefe sona u mwana, yuyo akaghona mucha kulishikishamo. ¹⁷ Mwo watesha ifi, bakisa bashimanya shisho shikayughiwa kukwabo isha u Mwana uyu. ¹⁸ Weshi yuyo akapulika akaba bakuswigha fifyo fikayughiwa kukwabo nabatimi. ¹⁹ Lole u Maliya akendelela ukwinong'ona ifindu fyoshi fifyo akapulika, nukufisungilila mundumbula yake. ²⁰ Abatimi bakaghalukila, bakamughindika nukumwimbila inyimbo isha kumukwesha u Chala pa fyoshi fifyo bakapulika nukutesha, isa mumwo bakababushila babo. ²¹ Mwo pakinda amashiku eyiti, mwo atumuliwa, akitishiwa ingamu Yesu, ingamu yiyo akapeliwa nawa ndumi mwo akali nukuwa mulufukwe. ²² Mwo akabalilo akamashiku ghakuti elushiwe ghapululila, ukufwana nindaghilo isha Mose, bakamweghela yuyo ku tempheli mu Yelusalemu nukumulangisha yuyo kwa Malafyale. ²³ Isa mumwo fisimbiwe mundaghilo sha Malafyale, ''Umulisha weshi yuyo ighulila ulufukwe akwisa ukubikiwa kwa Malafyale.'' ²⁴ Po bakabika ikemesekesho ukufwana namumwo fikayughiwa mululaghilo ulwa Malafyale, indoshi shibili pamu utwana tubili utwa ngunda.'' ²⁵ Tesha, pakaba umundu mu Yelusalemuyuyo ingamu akaba wi Simiyoni, sona umundu uyu akaba mugholofu sona ubakumwoghopa u Chala. Akalindililagha ukupokiwa kwa Isilayeli, sona umbepo mwikemo akaba papake. ²⁶ Fyikafumbuliwa kukwake ukuti atakwisa ukuketa ubufwe mwo akali akumutesha u Kulisitu Malafyale. ²⁷ Ukulongoshiwa numbepo, u Simiyoni akingila mu tempeli. Mwo aba papi bisa nu mwana u Yesu, ukubomba kukwake ukufwana nulwiho lwa ndaghilo, ²⁸ akamwegha nukumubika mutukono twake sona nukumupalisha u Chala, sona akati, ²⁹ ''Apa leka umubomba mbombo wako abuke mulutengano, Malafyale, ukufwana namashu ghako. ³⁰ Pakuti amaso ghangu ghatesha ubupoki bwako, ³¹ bubo usenganishe pamaso gha bandu: ³² Ubwelu bwa kufumbula aba Kuse sona ulughindiko ku bandu bako Isilayeli.'' ³³ U tata nu mama wake bakaswigha fifyo fikayughiwa kukwafyana na yuyo. ³⁴ U Simiyoni akabasaya sona akati kwa Maliya ung'ina, ''Tesha, umwana uyu asaliwe ukubawisha nukubakwesha kumwanya abandu abangi mu Isilayeli sona ichimanyikisho ichakukaniwa--- ³⁵ sona ichilwilo chikwisa ukulasa indumbula iya yuwewe-- ukuti inyinong'ono isha ndumbula ishingi shifumbuliwe.'' ³⁶ U mukunguluka yuyo akitishiwanga Anaakaba palapala. Akaba mwana wa Fanuweli muluko lwa Asha. Akaba mughosi. Akikala numulume wake ifyinja seveni ukufuma kubulindu bwake, ³⁷ sona akaba mufwilwe pa fyinja eyite folo. Atakalilekapo itempeli lole akafungagha nukwiputa, ubushiku numusi. ³⁸ Pakabalilo kalakala akisa kupipi kukwabo sona akanda ukumupalisha u Chala, sona akayugha isha mwana ku ali weshi yuyo akalindililagha ukwabuliwa kwa Yelusalemu. ³⁹ Mwo bamalisha fyoshi fifyo bakabaghila ukubomba ukufwana ni ndaghilo isha Malafyale, bakaghalukila ku Galileya, kukaya kabo mutawuni iya Nazalati. ⁴⁰ Umwana akakula sona akaba namaka, amahala ghakakula, sona ichisa icha cha Chala chikaba papake. ⁴¹ Apapi bake bakabukagha ku Yelusalemu ichinja choshi ku lusekelo ulwa chakulya icha pasaka. ⁴² Mwo akwanisha ifyinja twelovu, bakabuka sona isa lwiho pakabalilo aka pasaka. ⁴³ Mwo bikala amashiku aghakukwanila palusekelo, bakanda ukughalukila kukaya. Lole umulumyana u Yesu akashalikila mu Yelusalemu sona abapapi bake batakashimanya isha ishi. ⁴⁴ Bakinong'ona ukuti akaba pamupene nichilundilo chicho chikendagha nabo, po bakenda ishiku lyoshi. Po bakanda akumulonda yuyo mubakamu nabamanyani babo. ⁴⁵ Mwo batamwagha, bakaghalukila ku Yelusalemu sona nukwanda ukumulonda yuyo kulakula. ⁴⁶ Fikisa fyabombiwa ukuti mwo pakinda amashiku ghatatu bakamwagha mu tempeli, ikalite pakati pabamanyishi, akubapulikisha babo nukubabushikisha amabusho. ⁴⁷ Boshi babo bakamupulika bakashigha mumwo akapulikishilasha sona namumwo akamulilagha. ⁴⁸ Mwo bamutesha, bakaba bakuswigha. U mayi wake akati kukwake, ''Mwana, choni chicho batunyasha utwe musila iyi? Tesha, Ughuso sona nune twali bakupasha pakukulonda uwe.'' ⁴⁹ Akati kukwabo, ''Choni chicho mwandondagha une? Ka mutamanyagha ukuti nabaghikle ukubomba ubwighane bwa Tata wane? ⁵⁰ Lole batakashaghania fifyo akang'anamula pa mashu agho. ⁵¹ Po akaghalukila kukaya pamupene nawo ku Nazaleti sona akaba wa kubapulikila. Ung'ina wake akasunga ifindu ifi mundumbula yake. ⁵² Lole u Yesu akendelela ukukula namahala sona ningomelesho, sona akongelela mu chisa kwa Chala sona nabandu.