¹ abingi beghite imbombo yakubika pamupene ifindu fifyo fikakwanilishiwa pakati papitu, ² isa mumwo fikisila kukwitu ukufuma kubabo bakaba bakwanda ukutesha namaso sona ukuba babombi ba lishu. ³ Po chikaboneka chisa kukwangu nune, papo ingeteleshishe akisa ngani fyoshi ukufuma pabwandilo, ukubasimbila ulubatiko lulo lugholokite, umwe mughindikiwa ngani Teyofilasi, ⁴ ukuti mumanye ubwanaloli boshi ubwa findu fyoshi mumanyishiwe. ⁵ Mumashiku gha Helodi umalafyale wa mu Yudeya kukabako umuputi yuyo ingamu yake akaba wi Zakaliya ukufuma muluko lwa Abija; umukashi wake Elizabeti akaba wa lwa Aroni. ⁶ Boshi bakaba bagholofu pandashi pa Chala, bakendagha ukushita ukuba nakafiki nu mundu mundaghalo shoshi namungomelesho sha Malafyale. ⁷ Lole bataka nu mwana nayumo papo u Elizabeti akaba mughumba sona boshi bakaba bandu abakushi. ⁸ Po kakisa akabalilo kako u Zakaliya akaba pandashi pa Chala, akabombagha imbombo ya buputi ukuyana nulubatiko lya luko lyake. ⁹ Ukuyana nulwiho lwakusala umuputi yuyo aye abombe, akasaliwanga ukwendela mubulaghushi ukuti ingile mutempeli lya Malafyale ukocha utwakufukisha. ¹⁰ Ichilundilo choshi icha bandu chikabonekela nukwima kulufafu ulwakundilo kuchighemo chakufukisha. ¹¹ Po ubandumi wa Chala akabonekela nukwima kulufafu ulwa kundilo kuchighemo chakufukisha. ¹² Mwo u Zakaliya amutesha, akachenuka, akaba nubwogha nukumuwila. ¹³ Lole ubandumi akati kukwake, ''Manye ghoghopaghe, Zakaliya, papo inyiputo shako shapulikiwa. Umukashi wako u Elizabeti ukuya pakupapila umwana umulisha. Tise umwitishe ingamu ya Yohani. ¹⁴ Ukwisa ukuwa nulusekelo nukuhoboka sona nabingi bakuya ukughoka nukupapiwa kwake. ¹⁵ Pakuti akwisa ukuwa mukulu pamaso gha Malafyale. Atakise ang'wepo ubwala pamu ichakung'wa chilichoshi ichikali, sona akwisa ukwisushiwa numbepo mwikemo ukufuma mulwanda lwang'ina. ¹⁶ Abingi abaluko lwa Isilayeli bakuya ukupindukila kwa Malafyale u Chala wabo. ¹⁷ Akwisa pakutangila pandashi pa Malafyale mwambepo namumaka gha Eliya, ukung'anamula indumbula sha bapapi ukuya ku bana sona abashita kupulikila ukuya kumahala gha bugholofu-----ukumunoshekesha umalafyale ku bandu babo bitendekeshiwe ukub a bake.'' ¹⁸ U Zakaliya akayugha ku wandumi, ''Ningashimanya bulele shishishi? Papo ne mundu umughome sona numukashi wangu aghomite ngani.'' ¹⁹ U wandumi akamula nukuti kukwake. ''Une ne Gabiliyeli, yuyo akwimilila pandashi pa Chala. Indumiwe pakuyugha kukwako, ukuti ingubushe amashu amisa. ²⁰ Tesha! Kwisa ukuba myee, ukushita ukuyugha, ukufikila pishiku lilyo ifindu ifi fyabombiwa. Papo utasubila amashu ghangu ghagho ghakwisa ukukwanilishiwa pakabalilo kake.'' ²¹ Po abandu bakamulindililagha u Zakaliya. Bakaswighagha ukuti akeghagha leka akabalilo linga ingila mutempheli. ²² Lole mwo afuma kuse, atakayughagha kukwabo. Bakisa bashaghania ukuti achibona ichisetuka bwo ali mu tempheli. Akendelela ukupanga ifimanyishikisho kukwabo nukusumbashe. ²³ Shikabombiwanga bububwo mupaka po amashiku ghake agha mbombo ghakamalila, akabuka ku nyumba yake. ²⁴ Mwo amashikub agha ghapululila, umukashi wake u Elizabetiakisa aba nulyanda po pamyeshi fayivi akimamagha. Po akati, ²⁵ ''Ifi fyofyo u Chala abomba kukwangu mwo andesha une nichisa ukuti atishe isoni shangu pandashi pa bandu.'' ²⁶ Mumyeshi sikisi iyi, ubandumi u Gabiliyeli akatumiwa ukufuma kwa Chala ukuya mukaya ka Galileya aka mu Nazaleti, ²⁷ ku mukolo yumo yuyo atamumenye lumo umulisha yuyo akashingilishiwa nu mulisha ingau yake akaba wi Yosefe, yuyo akaba wa luko lwa Deveti, umukolo uyu akaba wi Maliya. ²⁸ Akisa kukwake nukuti, ''Ngukulamuka, uwe we muchindikiwa! u Malafyale ali nuwe.'' ²⁹ Lole akayubana leka namashu ghake po akaswigha nukuti kulamuka kwa luko wuli kukuku. ³⁰ Ubandumi akati kukwake, ''Manye ghoghopaghe, Maliya, pakuti wachagha ichisa pandashi pa Chala. ³¹ Tesha, kwisa pakuba nichifuba nukupapa umwana umulisha. Ukwisa ukumwitisha ingamu ya 'Yesu.' ³² Akwisa pakuwa mukulu nukwitishiwa Mwana wa Wapamwanya ngani. U Malafyale u Chala akwisa pakumupa ichitengo cha munyenya wake u Deveti. ³³ Akwisa ukulaghila pa nyumba ya Yakobo akabalilo koshi, po patasukubapo ubumalilo ubwa bunyafyalebwake.'' ³⁴ U Maliya akati kubandumi, ''Shingabombiwa bulele shishishi?'' ³⁵ U bandumi akamwamula nukuti kukwake, ''Umbepo mwikemo akwisa papako, po amaka agha Wapamwanya ghakwisa ukwisa papako. Po umbepo yuyo tise apapiwe akwisa ukwitishiwa Mwana wa Chala. ³⁶ Tesha, umukamu wako u Elizabeti wepe ali nichifuwa icha mwana umulisha mutubalilo atwa bwosongo. Ughi mweshi wa nambala sikisi kukwake, yuyo akitishiwanga ukuba mughumba. ³⁷ Pakuti nachimo chicho chipala kwa Chala. ³⁸ U Maliya akati, ''Tesha, ne bambombo qwa Malafyale umukolo. Leke shibe isa mumwo wayughila kukwangu.'' Po ubandumi akabuka. ³⁹ Po u Maliya akanyamuka amashiku ghalaghala mwalubilo nukubuka muchisu cha maghamba, mukaya ka Yudeya. ⁴⁰ Akingila munyumba ya Zakaliya nukumulamuka u Elizabeti. ⁴¹ Mwo u Elizabeti apulika ukalamuka kwa Maliya, u mwana yuyo akabamulwanda akanyela, po u Elizabeti akisa isula nu Mbepo mwikemo. ⁴² Akakwesha amashu ghake nukuyugha mwapamwanya, '''We musayiwa mukati mubakolo boshi, chisayiwa ichabupi chicho chili mukati mumwako. ⁴³ Choni chicho shabombiwa kukwangu ukuti ung'na wa Malafyale ise kukwangu? ⁴⁴ Ele tesha, mwo ukulamuka kwako kwapulikiwa kufyofwo fyangu, umwana wa mukati mwangu anyelite nulusekelo. ⁴⁵ Musayiwa we yuyla yuyo akusubalila ukuti tifyise fikwailishiwe ifindu fifyo akabushiwa ukufuma kwa Malafyale.'' ⁴⁶ U Maliya akati, ''Indumbula yangu yikumupala u Malafyale, ⁴⁷ sona umbepo wangu ahobokite mwa Chala umupoki wangu. ⁴⁸ Pakuti atesha ukwiyisha kwake ukwamubombi umukolo. Papo tesha, ukwanda ulu ukuya mundashi ingulile yoshi yikuya ukunitisha musayiwa. ⁴⁹ Pakuti yula yuyo wamaka ambomba ifindu ifikulu kukwangu, sona ingamu yake yikemo. ⁵⁰ Ichisa chake chikubako ukuma ingulilo ukuya ukufika ingulilo iyingi ku boshi babo bakumwoghopa yuyo. ⁵¹ Alangisha amakanakakono kake; abafulungania babo bitufyanga ni nyinong'ono isha mundumbula shabo. ⁵² Abishishe abomwene ukufuma pa fitengo nukubakwesha babo bali pase. ⁵³ Abisushishe babo bali nisala nifindu ifyisa, lole abakabi akababwesha ukushita ukubapa chimo. ⁵⁴ Abikite ubutuli ku ba Isilayeli ababombi wake, ukuti akumbukilaghe ukuti alangishishe ichisa ⁵⁵ ( isa mumwo akayughila ku bo tata) kwa Abulahamu nabaluko lwake bwila nabwila.'' ⁵⁶ U Maliya akikala nu Elizabeti imyeshi yitatu po akisa aghalukila kunyumba yake. ⁵⁷ Po akabalilo kakisa kafika kako u Elizabeti akayanga pakupapa umwana wake po akisa apapa umwana umulisha. ⁵⁸ Abapalamani nabakamu wake bakapulika nukuti u Malafyale alangisha ichisa ichikulu kukwake, po bakahoboka pamupene nawe. ⁵⁹ Po shikabombiwa ukuti pishiku lya nambala eyiti bakisa bamutumula umwana. Ngali bakamwitisha yuyo '''Zakaliya'' lilyo likaba lyita lya wise. ⁶⁰ Lole ung'ina akamula nukuti, ''Hagha. Tiitishiwange Yohani.'' ⁶¹ Bakati kukwake, ''Ataliko nayumoyumo mubakamu binyu yuyo akwitishiwa ningamu yiyiyi.'' ⁶² Bakapangagha ifimanyikisho kwa wise ukuti bamanye ingamu yiyo akalondagha ukuti bamwite. ⁶³ U wise akasuma ichakusimbilapo po akasimba, ''Ingamu yake wi Yohani.'' Boshi bakaswigha nishi. ⁶⁴ Papo napapo umulomo wake ghukighuka po nululimi lwake lukasatuka. Akayugha nukumupala u Chala. ⁶⁵ Ubwogha bukabagha boshi babo bakikalagha paufupi nabo. Utupango utu tukasata mwoshi mutwaya utwa maghamba agha mukaya ka Yudeya. ⁶⁶ Boshi babo bakapulikabakaghasunga mundumbula shabo, bakatingi, ''Po umwana uyu tise abe buleghe?'' Papo akakono ka Malafyale kakaba nawe pamupene. ⁶⁷ U wise u Zakaliya akisa isula u mbepo mwikemo nukunguluka, ukuti, ⁶⁸ ''U Malafyale apaliwe, u Chala wa Izilayeli, pakuti isite pakutwafwasona pakukwanilisha ubupoki kubandu bake. ⁶⁹ Atwimikile umupoki ubamaka kukwitu ukufuma munyumba ya mubombi wake u Devedi ⁷⁰ (isa mumwo akayughila mumulomo wa mukunguluka umwikemo ukufuma akabalilo akakunyuma), ⁷¹ ubupoki ukufuma kubalughu bitu nukufuma mutukono twa boshi babo batubengite utwe. ⁷² Akwisa ukubomba ishi pakulangisha ichisa kubotata witu sona nukutukumbusha ubwikemo bwa lilaghano, ⁷³ Ukulapa kuko akayugha kwa Abulahamu u tata witu. ⁷⁴ Akalapa nukupangana ukutupa utwe, nukutufumyamo munyowe isha balughuwitu, twise tumubombele ukushita ukoghopa ⁷⁵ mubwikemo namubugholofu pandashi papa amashiku ghoshi. ⁷⁶ Inga, sona nuwe, mwana, kwisa ukukoliwa numukunguluka uwapamwanya, papo tise uye pandashi pamaso gha Malafyale ukuti utendekeshe isila yake, ukubatendekesha abandu ukwisa kwake, ⁷⁷ ukubamanyisha ukuti bashaghanie isha bupoki ku bandu bake ukwendela mukuhobokeliwa kwa mbibi shabo. ⁷⁸ Ifi fikwisa pakubombiwa chifukwa cha chisa cha Chala witu, papo ukufuma mumwo isuba likufuma ukufumila pamwanya ngani nukwisa pakutwafa utwe utwe, ⁷⁹ ukubalila kubabo bali muchisi na mu chisheshicha bufwe.Akwisa ukubomba fififi pakutulongoshekesha inyayo shitu musila iya lutengano.'' ⁸⁰ Po ulu umwana akukula sona akuba wamaka mwa mbepo, sona akisa aba muchitengele ukwisa ukufikila pishiku lilyo akisa abonekela kuchilundilo cha ba Isilalayeli.