¹ Imos agora, ricos! Chorade e berrade polas miserias que vos veñen enriba! ² A vosa riqueza apodrentou e as vosas roupas foron comidas pola traza. ³ O voso ouro e a vosa prata perderon o seu valor e a súa corrosión testemuñará contra vós e consumirá os vosos corpos coma lume. Vós acumulastes os vosos tesouros para os derradeiros días! ⁴ Mirade, como clama contra vós a paga que, con engano, deixastes de pagar aos labregos que colleitaban as vosas terras, e o pranto dos que colleitaban chegou aos oídos do Señor dos exércitos! ⁵ Aquí na terra levastes unha vida de luxo, e adicástesvos á gran vida, cebastes os vosos corazóns para o día da matanza. ⁶ Condenastes e matastes o xusto, sen que el vos fixera resistencia. ⁷ Polo tanto, irmáns, tende paciencia ata a vinda do Señor. Mirade como o labrego agarda pacientemente polo precioso froito da terra, ata recibir a choiva de cedo e de tarde. ⁸ Vós tamén sede pacientes; afirmade os vosos corazóns, porque a vinda do Señor está preto. ⁹ Irmáns, non vos queixedes uns dos outros, para que non sexades xulgados; mirade que o Xuíz está ás portas. ¹⁰ Irmáns, tomade como exemplo de sufrimento e de paciencia os profetas que falaron no nome do Señor. ¹¹ Nós temos por felices os que aturaron todo. Oístes da paciencia de Xob e vistes o propósito do Señor, porque o Señor é compasivo e moi misericordioso. ¹² Mais, ante todo, meus irmáns, non xuredes, nin polo ceo, nin pola terra, nin por ningunha outra cousa; o voso si sexa si e o voso non sexa non, para que non sexades acusados. ¹³ Hai algún entre vós sufrindo? Que ore. Hai algún ledo? Que cante loanzas. ¹⁴ Hai algún entre vós enfermo? Que chame os anciáns da igrexa para que oren por el unxíndoo con aceite no nome do Señor. ¹⁵ E a oración de fe salvará o enfermo e o Señor levantarao; e se pecou, os seus pecados serán perdoados. ¹⁶ Confesádevos mutuamente os vosos pecados, e orade uns polos outros, para que sexades sandados. A oración eficaz do xusto ten moito poder. ¹⁷ Elías era unha persoa coas mesmas fraquezas que nós, e orou con paixón para que non chovera e non caeu nin gota por tres anos e medio. ¹⁸ E orou de novo e o ceo deu choiva e a terra produciu os seus froitos. ¹⁹ Meus irmáns, se alguén de vós se desencamiña da verdade e outro o trae de volta, ²⁰ saiba que quen fai volver a un pecador do extravío do seu camiño, salvará a súa alma da morte e cubrirá multitude de pecados.